Read Zotung Chin JONAH 2 Bible Online

JONAH 2 - Zotung Chin bible

JONAH 2

¹Jonah nynh ngasaw vue lungkhu te BAWIPAW a Pachia kalan saw a sang:

²“Ka vawsawnaw lungkhu te BAWIPAW kha ka ko zah, aning nynh yn leih; Michi khua lungkhu te ka sia zah, ka roi kha nae thaepya.

³Akhunaw, rili ngaelung langkhe nae vua zah, tui alepaw nynh kae kha yn koihlu; na tuileih hae te nae tuiphue tuh ka vawlan khe popo alua hae.

⁴Tetuh kae nynh, ‘Kae tuh na muihnaw kyate vua ka thua vae; pawtemou na beikinn thyaapaw kha bua ka muih ung cih?’ ka ci.

⁵Tui nynh yn husung zah, akhupaw rili nynh yn koihlu; rili lungkhu e lonua hae nynh ka lu kha yn voi hae.

⁶Mua hae leihpaw langkhe ka rungbung zah, a koikua ccong a khaw zungzaepaw ram kya ka thua; tuhzemah, pou BAWIPAW ka Pachia, ka hiinnaw kha Hunghuapi lungkhu kyate poh nae thuaa.

⁷Ka hiinnaw vyavya athang lyakhe, BAWIPAW kha ka liathui; ka sawsangnaw tuh namaw kalan, athyaapaw na beikinn lungkhu lang a thua.

⁸Ccungkia leipaw zohtuh kha a beik hae paw nynh tuh ahmepaw mih lungzinaw kha a vua hae.

⁹Thuasalama kae nynh tuh lungtuanaw roisawte, namaw kalan silawnaw ka rae cih; pya lan bya ka kinku vae paw kha ka pya cih. Luenaw tuh BAWIPAW kya-e nynh thua!” a ci.

¹⁰Tetuh BAWIPAW nynh ngasaw kha hopah zah, ngasaw nynh Jonah kha laerou kyakhe moh a lua vae.