Read Zotung Chin JONAH 3 Bible Online

JONAH 3 - Zotung Chin bible

JONAH 3

¹BAWIPAW bya tuh Jonah kalan vae ningnaw yn thua zah,

²“Thokuh lah, Nineveh khuapi kalan cciatua, kae hopyapaw bya kha siakhae tua,” a cipya.

³Tukeiccuze Jonah tuh BAWIPAW bya thyhte Nineveh khua lang a cceih. Nineveh tuh myaryamaw alepaw khuapi thua zah, a lungkhu kya nin thum laanccia acih.

⁴Jonah tuh khuapi lungkhu lang tee zah, nin kheit he a cceih te, “Nin sung pali aro koute Nineveh khuapi tuh aroh cih!” cite a sia.

⁵Nineveh khuaccaaw hae tuh Pachia a zyn hae; looh-aesung lanpaw kha thaesakuh hae zah, adih ale ccungccaw miakaw nynh buriboei kha a zingku hae.

⁶Tuh-e bya tuh Nineveh siapharan nynh he a thae te, a bawitungkhung kyate thokuh zah a angkiccua kha a khahku, buriboei kha zingkuh zah buhhaw kya a haung.

⁷Tetuh aning nynh Nineveh khua kya thaesahnaw rae zah: “Nineveh siapharan te a kuihkaw e bawi hae nynh kaw a tho hae paw tuh: Ccungccaw nynh thuasah, sahiin nynh thuasah, vaetua phu, tuuphu nynh thuasah looh papin ae lan khyh. Looh na ae lan khyh oh, tui mah na neih lan khyh oh.

⁸Ccungccaw te sahiin hae nynh buriboei na zingkuh cih oh zah, Pachia kalan thawte saw na sang cih oh. Nanning balyn nynh ahoy leipaw nae ziazae kyate thuasah, puathote rya na law oh paw kyate thuasah na paleihkuh cih oh.

⁹Aening ah chi khyh nawlan oh, Pachia tuh a tuanaw paleihkuh zah myarya a thinrianaw kha adae kho, dae kho khyh cipaw hummou a nyh kho?” a ci.

¹⁰Minmin nynh ahoy leipaw mih ziazae kyate paleihkuh hae zah a cyi hae paw kha Pachia nynh he a muih te, minmin tungvaw thuasah lan a ho vae paw vawsawnawpi kong kha Pachia nynh a lungpaleihkuh zah, tuh-e tuh cyih vae khyh.