Read Zotung Chin NAMBAR 10 Bible Online

NAMBAR 10 - Zotung Chin bible

NAMBAR 10

¹BAWIPAW nynh Moses kha hynhte a hopya:

²Ngun mungkae ccangning kha raetua; khah-e hae kha deihping te na rae cih hae; ccungccaw zapi pumnaw elang te ryahmin phounaw elang mungkae hae kha na mang cih.

³Mungkae ccangning kha tuu athua vae ze, zapi balyn tuh na malang tungkunaw bu thuakaw kyakhe a pumkuh cih hae.

⁴Thuasalama ccangkheit kyalya kha tuu athua lanze, Israel phin hae kya-e lupi hae tuh na malang a pumkuh cih hae.

⁵Raeringkunawpaw kha he na tuu te, nithua lang e ryahmin hae kya um hae paw tuh a cceih cih hae;

⁶vaeningnaw raeringkunawpaw kha he na tuu te, alia lang e ryahmin kya-e hae tuh a cceih cih hae. Minmin nynh ccia lan a ci takyh vae hae ze, raeringkunawpaw kha tuu athua cih.

⁷Thuasalama zapi kha suelua lan accan vae ze, na tuu cih, thuasalama raeringkunawpaw roi kha na ccaesah lan khyh.

⁸Aaron ccapaw hae, ranpibawi hae nynh mungkae hae kha a tuu cih hae, e hynh nanning elang nae she takyh kya zungzae tynpaw phungzae athua cih.

⁹Nanning ae tuaasah oh paw nae rhaw hae kha nae ram kya rhawtuk khylan he na ccia vae oh ze, mungkae khate raeringkunawpaw roi kha na ccaesah cih oh, tuhteze nynh BAWIPAW nae Pachia malang khe liathui na thua cih oh zah, nae rhaw hae kyate khum na thua cih oh.

¹⁰Nae lungpaw nin, accyh khyapaw poi hae te nae sawpaw athotakawnaw kyakhe mah nae kya-e maee-ute silawnaw hae te ccawkunaw silawnaw hae vawlan khe mungkae hae kha na tuu cih oh; tuh-e hae tuh BAWIPAW nae Pachia malang khe nysah thuitu lante nanning ccelang rya a lah cih hae: kae tuh BAWIPAW nae Pachia nynh ka thua.

¹¹Kum ningnaw kum, sah ningnaw nin kuin nin khe maeking tuh byakinnaw beikbu vawlan khate ahangkuh thung.

¹²Oute Israel hae tuh Sinai ramkaw kyate san kheit koute san kheit lang a cceih hae, te maeking tuh Paran ramkaw khe a thadyn.

¹³BAWIPAW nynh Moses kyate kaw a pya thyh hae hawte, minmin nynh masaty a ccia hae paw nynh thua.

¹⁴Judah ryahmin kya-e hae tuh aphuphute masaty a cceih hae, tuh-e aphu marya uktu tuh Amminadab ccapaw Nahshon nynh thua.

¹⁵Issakhar phin aphu a uktu tuh Zuar ccapaw Nethanel nynh thua;

¹⁶Zebulun phin aphu a uktu tuh Helon ccapaw Eliab nynh thua.

¹⁷Oute beikbu kha phou thua zah, Gershon phin hae te Merari phin hae nynh beikbu kha puih hae zah a cceih hae.

¹⁸Tukoute Reuben ryahmin kya-e hae tuh aphuphute a cceih hae; tuh-e aphu ccapyn a uktu tuh Shedeur ccapaw Elizur nynh thua.

¹⁹Simeon phin aphu a uktu tuh Zurishaddai ccapaw Shelumiel nynh thua,

²⁰Gad phin aphu a uktu tuh Deuel ccapaw Eliasaph nynh thua.

²¹Oute athyaapaw uccaw hae kha a phu hae paw Kohath phin hae tuh a cceih hae; minmin athua maw hae khe, beikbu kha phe a la thadynsah vae hae.

²²Tukoute Efraim phin ryahmin kya-e hae tuh aphuphute a cceih hae, tuh-e aphu marya a uktu tuh Ammihud ccapaw Elishama nynh thua.

²³Manasseh phin aphu a uktu tuh Pedahzur ccapaw Gamaliel nynh thua,

²⁴te Benjamin phin aphu a uktu tuh Gideon ccapaw Abidan nynh thua.

²⁵Ryahmin balyn kha nulang te a rintu hae Dan ryahmin kya-e hae tuh aphuphute a cceih hae, tuh-e aphu ccapyn a uktu tuh Ammishaddai ccapaw Ahiezer nynh thua.

²⁶Asher phin aphu kha a uktu tuh Okhran ccapaw Pagiel nynh thua,

²⁷Naftali phin aphu kha a uktu tuh Enan ccapaw Ahira nynh thua.

²⁸E tuh Israel hae nynh he a cceih hae te, aphuphute ataruinte a ccia hae paw kha nynh thua.

²⁹Moses nynh amaw a pupaw, Midian minphuinpaw Reuel ccapaw Hobab kha, “Kaening tuh BAWIPAW nynh, ‘Kae pya cih oh,’ oun cipyapaw hmin kalan kae cceih vae, kaening ryte cceihbua, hoyte kae ccuepe cih; pawccecize BAWIPAW nynh Israel hanlan ahoypaw kha bya a kinpyaku vae,” a cipya.

³⁰Thuasalama Hobab nynh Moses kha, “Ka cceihbua lan khyh, ka ram lang te ka puizia hae kalan ka ki cih,” a cipya.

³¹Moses nynh, “Kaening hynh oun cciataw nan, pawccecize nang tuh ramkaw kya ryahmin tahkunaw hmin kha na nyh zah kaening elang mit hawte rya nae lawpah cih.

³²Tuh apiaze, kaening ryte na cciabua lanze, BAWIPAW nynh kaening elang hoynaw a rae thyhte namaw elang hoynaw kha kae raepah cih,” a cipya.

³³Tuhcite minmin tuh BAWIPAW mua kyate nin thum laanccia asawnaw lang a cceih hae, BAWIPAW kya-e byakin thingkua tuh nin thum laanccia asawnaw mih malang khe minmin hanlan haeungnaw hmin ccung khylan a cceih ty,

³⁴ryahmin kyate he a cceih hae te, BAWIPAW maeking tuh khuadae ccyh kya mih luki khe a um.

³⁵Tuh-e thingkua tuh he a ccia takyhte, Moses nynh, “Pou BAWIPAW , thoku tua, na rhaw hae tuh phiariphiarae um hae sah, te na rhaw hae tuh na malang khe ccue hae sah,” a ci.

³⁶Te thingkua tuh a haeung takyh vae ze, Moses nynh, “Pou Israel athong patae hae BAWIPAW , yn kitua,” a ci.