Read Zotung Chin NAMBAR 12 Bible Online

NAMBAR 12 - Zotung Chin bible

NAMBAR 12

¹Hazeroth kya a um lya hae khe, Moses nynh zu a hoipaw Kush nopinung keiccuze Miriam te Aaron nynh Moses tungvaw thethya a ho hae (pawccecize Moses nynh Kush nopinung kha zu lang a hoiku ccaccing);

²te minmin nynh, “Moses kyate rou tou BAWIPAW nynh bya a ho? Kaening kyate so byaho khyh tou?” a ci hae. BAWIPAW nynh tuh-e tuh a thae.

³Moses tuh laephi vawlan umpaw ccungccaw balyn laeze a lungne huapaw nynh thua.

⁴Vaekheitmawte BAWIPAW nynh, Moses, Aaron te Miriam kha, “Tungkunaw bu kalan nanning lu thum oun pou oh,” a cipya hae. Tukeiccuze minmin lu thum tuh a pou hae.

⁵Oute BAWIPAW tuh maeking tung khate yn rungbung zah bu thuakaw kyakhe a thadyn, te Aaron te Miriam kha ko hae zah minmin tuh parouhte malang khe a pou hae.

⁶Te BAWIPAW nynh, “Ka bya hynh thae oh: Nanning laku kya profeh hae he a um hae te, kae, BAWIPAW nynh minmin kalan khe vizin kya ka nysaku hae; mih maan kya ka hopya hae.

⁷Ka ryalahtupaw Moses kya tuh tuhte thua khyh; aning tuh ka innbyn balyn kya a lungzipaw nynh thua.

⁸Aning kha mitmae hawiliakute bya ka hopya— phohpawbya lante thua leite ccaerarih lan ka hopya; te aning nynh BAWIPAW muinsan kha a muih. Pawcce ka ryalahtupaw Moses tungvaw thethya ho lan na ri khyh oh?” a cipya hae.

⁹Te BAWIPAW thinrianaw tuh minmin tungvaw maee lang arua, te BAWIPAW tuh a ki vae.

¹⁰Maeking tuh bu luki te he a nuekuh te, Miriam tuh vaethya ccinaw kae zah vuiraw hawte a raw. Te Aaron nynh Miriam kalan maeleihkuh zah vaethya ccinaw a kaepaw kha a muih.

¹¹Oute Aaron nynh Moses kha, “Pou ka bawipaw, kae ngaee kae bu keiccuze kae raepaw seinaw hanlan de yn tah nan.

¹²A nung vue kyate he a pou te, a ngesaw angankuh ro thua zah a pui takaw te a chihpaw hawte Miriam kha thuasah nan,” a cipya.

¹³Te Moses nynh BAWIPAW kalan khe, “Pou Pachia, thawccinawte Miriam kha dansah tua,” a cipya.

¹⁴Thuasalama BAWIPAW nynh Moses kha, “A paaw nynh a mae kha a thoi lanze, aning tuh nin sari lungkhu maethyate um lan khyh tou? Miriam kha ryahmin atolang nin sari pousah hae sah, tukoute ryahmin lungkhu lang bua a teekhae cih hae,” a cipya.

¹⁵Tukeiccuze Miriam kha nin sari lungkhu ryahmin atolang a pousah hae; Miriam kha ryahmin lungkhu lang bua teekhae athua makhia tuh ccungccaw hae tuh malang ccia leite a um hae.

¹⁶Tukoute ccungccaw hae tuh Hazeroth kyate cceih hae zah Paran ramkaw khe ryahmin a tahku hae.