Read Zotung Chin NAMBAR 13 Bible Online

NAMBAR 13 - Zotung Chin bible

NAMBAR 13

¹BAWIPAW nynh Moses kha,

²“Israel hae kalan ka pya cih hae paw Kanaan ram dophi khylan ccungccaw hae kha saw hae; mih thokeinaw phin raveih kya-e cciakhaetu pise lu kheit cci kha na saw cih hae,” a cipya.

³Tukeiccuze BAWIPAW kawpyanaw thyhte, Moses nynh Israel hae laku e cciakhaetu pise balyn kha Paran ramkaw kyate a saw hae.

⁴E hae hynh mih min nynh thua hae: Reuben phin kyate Zakkur ccapaw Shammua;

⁵Simeon phin kyate Hori ccapaw Shafat;

⁶Judah phin kyate Jefunneh ccapaw Kaleb;

⁷Issakhar phin kyate Josef ccapaw Igal;

⁸Efraim phin kyate Nun ccapaw Hoshea;

⁹Benjamin phin kyate Raphu ccapaw Palti;

¹⁰Zebulun phin kyate Sodi ccapaw Gaddiel;

¹¹Josef phin (e hynh Manasseh phin kyate) kyate Susi ccapaw Gaddi;

¹²Dan phin kyate Gemalli ccapaw Ammiel;

¹³Asher phin kyate Mikhael ccapaw Sethur;

¹⁴Naftali phin kyate Vofsi ccapaw Nahbi;

¹⁵Gad phin kyate Makhi ccapaw Geuel.

¹⁶E hae tuh Moses nynh ram dophi khylan a saw hae paw min nynh thua. Te Moses nynh Nun ccapaw Hoshea min kha Joshua cite a rulae.

¹⁷Moses nynh Kanaan ram dophi khylan minmin kha saw hae zah, “Negeb lang khuin la cceihthung oh lah, mua lang e khua taraw kalan la cceihthung oh,

¹⁸te ram tuh pawmou alo, tuin ram kya um hae paw ccungccaw hae tuh mih thaw asae tou azya tou, alung hae tou azya hae tou,

¹⁹a umnaw hae ram tuh ahoy tou athah tou, a umnaw hae khua tuh lungrua ruakhawkuh tou ruakhawkuh khyh tou,

²⁰te ram tuh a hoirum tou a ryachi tou, tuin kya thingku hae um tou um khyh tou cipaw la do oh. Nae rawthung sah lah, tuin ram kya-e thingthae beihtaraw kha nae phu cih oh,” a cipya hae. Tuh-e ccyh tuh misu thae avoi typaw avoi ccyh nynh thua.

²¹Tukeiccuze minmin nynh cceihthung hae zah Zin ramkaw kyate Lebo-hamath pe, Rehob kyacia ram kha a dophi hae.

²²Negeb lang cceih hae zah Hebron khua athua hae; tuin kya Anak ciihan hae Ahiman, Sheshai te Talmai a um hae. (Hebron tuh Izip ram e Zoan khua a sak maw hae kum sari lyate a la sak hae paw khua nynh thua.)

²³Te Eshkol Ccya kya a thua hae, te tuin kya umpaw misu ange nge kheit alonahpaw aran kha bae hae zah lu ning nynh puihnawpaw te a puih hae. Ccalee thae te eboh thae kha mah a phubia hae.

²⁴Israel hae nynh tuin kyakhe misu nge kha a bae keiccu hae ze, tuh-e hmin tuh Eskhol Ccya a ci hae.

²⁵Nin sung pali aro koute dophitu hae tuh tuh-e ram kyate a ki hae.

²⁶Te minmin tuh Paran ramkaw Kadesh kya um hae paw Moses, Aaron te Israel zapi balyn kalan a thua hae; minmin te zapi balyn kalan khe bya oun phupah hae zah tuh-e ram kya-e thingthae kha a muihsah hae.

²⁷Te minmin nynh, “Kaening nae sawnaw ram kya kae thua; tuh-e ram kya mateitui te khoilutui lua zah hynh-e hynh ram athae nynh thua.

²⁸Tuhzemah tuin ram kya khuasahpaw ccungccaw hae tuh mih thawsae; khua hae tuh lungrua te koihlupaw thua hae zah myarya ale hae; tuh apiaze, Anak ciihan hae kha tuin kya kae muih hae.

²⁹Amalek hae tuh Neged ram kya khuasah hae; Hit hae, Jebus hae te Amor hae tuh mua vaw e khua taraw kya khuasah hae; te Kanaan hae tuh rili pe te Jordan vaw kin kya a um hae,” a cipya hae.

³⁰Thuasalama Kaleb nynh ccungccaw hae kha Moses malang khe zya daesah hae zah, “Atu palou cceih oh sih lah, khah-e ram kha lah kangmaw oh sih, pawccecize khah-e ram kha solei ah tae cih oh,” a cipya hae.

³¹Oute Kaleb ryte a cceihkheih hae paw nynh, “Khah-e ccungccaw hae kha ah dou kho lan khyh oh, pawccecize minmin tuh aening laeze mih thawsaehua,” a ci hae.

³²Tukeiccuze minmin nynh a dophi hae paw ram kong kha Israel hae kya thawthya lante hopah hae zah, “Kae dophipaw ram tuh ram lungkhu a um hae paw kha syrote a aepaw ram nynh thua; te tuin ram kya kae muihpaw ccungccaw balyn tuh mih pynrua myarya ale hae.

³³Tuin kyakhe Nefilim hae (Nefilim kyate a tho hae paw Anak ciihan hae) kha kae muih hae; kaemaw te kaemaw kha tungkhipaw hawte kae muihkuh zah minmin muihnaw kya mah tuhawte nynh kae thua,” a cipya hae.