Read Zotung Chin NAMBAR 14 Bible Online

NAMBAR 14 - Zotung Chin bible

NAMBAR 14

¹Oute zapi balyn tuh thawte sia hae zah, ccungccaw hae tuh tuh-e khuazi kya a rah hae.

²Te Israel hae balyn nynh Moses te Aaron tungvaw a ccohnuaku hae; zapi balyn nynh minmin kha, “Izip ram kya myng kae la chih sah lah! Tuhkhyhze e ramkaw kya maw myng kae chih sah lah!

³Pawcce BAWIPAW nynh thaloi te chia khylan e ram kalan oun cciakhae? Ah zu hae te ah ccaaw hae hynh rhaw kya kyngpaw lang a tang vae cih hae; Izip ram lang ki lanze aening hanlan hoyhua lan khyh tou?” a cipya hae.

⁴Tukeiccuze minmin nynh lu kheit te lu kheit kha, “Cciakhaetu lu kheit pokuh oh sih lah, Izip ram lang ki oh sih,” cite a hoku hae.

⁵Oute Moses te Aaron tuh Israel zapi a pumkuh hae paw malang khe a bakhung hae.

⁶Te ram a dophi hae paw laku e Nun ccapaw Joshua te Jefunneh ccapaw Kaleb nynh mih boeining kha seiikuh hae zah,

⁷Israel zapi balyn kha, “Kae la dophipaw ram tuh myaryamaw ahoypaw ram nynh thua.

⁸BAWIPAW nynh aening tungvaw a lunghoy zetuh, khah-e ram lungkhu lang oun cciakhae cih zah mateitui te khoilutui aluanaw khah-e ram kha oun pya cih.

⁹BAWIPAW kha dou nan oh; khah-e ram kya umpaw ccungccaw hae kha rih nan oh, pawccecize minmin tuh aening hanlan looh khaw tou athua hae; minmin kya-e thungkhawnaw tuh minmin kyate nue athua vae, BAWIPAW tuh aening ryte a um; minmin kha rih nan oh,” a cipya hae.

¹⁰Thuasalama zapi balyn nynh minmin kha lung te kae deih cih oh cite a hu hae. Oute BAWIPAW phu-enaw tuh tungkunaw bu kyakhe Israel hae balyn kya a langkuh.

¹¹Te BAWIPAW nynh Moses kha, “E ccungccaw hae nynh kae kha hohseciamou yn theihrya ung cih hae? Te muihsahnaw balyn kha minmin laku phang ka rae pite, hohseciamou kae kha zyn leite yn vua cih hae?

¹²Minmin kha akaekuh thyapaw ccinaw khate ka zia cih hae zah rho ccou lan khyh hae, te nang kha minmin laeze ale huapaw minphuin lang te athawsae huapaw lang kae rae cih,” a cipya.

¹³Thuasalama Moses nynh BAWIPAW kha, “Na thawsaenaw khate e ccungccaw hae hynh Izip hae laku kyate na poukhae hae zah, tukoute Izip hae nynh tuh-e tuh a thae cih hae zah,

¹⁴e ram kya umpaw ccungccaw hae kha a hopah cih hae. Pou BAWIPAW , nang tuh e ccungccaw hae laku na um cipaw kha thuasah; Pou BAWIPAW , na maeking tuh minmin luki a thadyn lyakhe nang kha mae hawiliakute ae muih hae cipaw kha thuasah, khuadae ze maeking tung te, khuazi ze maee tung te minmin malang na cciapaw kha thuasah minmin nynh a thae vae hae.

¹⁵Atu hynh-e ccungccaw hae hynh vae kheit kya pong na chia hae ze, namaw kong a thae hae paw minphuin hae nynh,

¹⁶‘Kae pya cih oh cite bya a kinpyaku hae paw ram lungkhu lang BAWIPAW nynh e ccungccaw hae hynh cciakhae kho vae khyh hae zah ramkaw kya phe a chia vae hae,’ cite a ho cih hae.

¹⁷Tukeiccuze namaw nynh, ‘BAWIPAW tuh a lungsaepaw thua zah, atynpaw sungsahnaw te phe abeihpaw, hoyleinaw te kaw-einaw kha a ngaethyapaw, thuasalama aseipaw kha alakawte a luesah leipaw, nungpaaw hae hoyleinaw kha ccaaw hae tungvaw kya she thum, she pali cia a liarupaw nynh thua,’ cite bya na kinkupaw kyakhe BAWIPAW thawsaenaw tuh lesae sah.

¹⁹Izip ram kyate atu cia e ccungccaw hae hynh na ngaethya hae hawte, atynpaw na sungsahnaw khate e ccungccaw hae hoyleinaw kha ngaethyatua hae,” a cipya.

²⁰Oute BAWIPAW nynh, “Nae ngia thyhte ka ngaethya hae;

²¹tuhzemah kae tuh ka hiin keiccuze laephi balyn hynh BAWIPAW phu-enaw te phe abia thyhte,

²²ka phu-enaw kha thuasah, Izip ram kya te ramkaw kya ka cyipaw muihsahnaw hae kha thuasah muih hae salamah kae kha vae haw yn syntaw hae zah ka bya a ngae lei hae paw ccungccaw hae tuh

²³kae pya cih oh cite mih minpaaw hae kya bya ka kinpyaku hae paw ram kha muih lan khyh hae; kae yn theihrya hae paw nynh khah-e ram kha muih lan khyh hae.

²⁴Thuasalama ka ryalahtu Kaleb tuh thinlung ccangpaw hoi zah a thinlung balynte yn zui keiccuze a la ccianaw ram lungkhu lang ka cciakhae cih zah a ciihan hae nynh khah-e ram kha a pee cih hae.

²⁵Amalek hae te Kanaan hae tuh accya hae kya a um keiccu hae ze, awkhualan tuh maeleihkuh oh lah, Rili Se lang cceihpaw laanpi khate ramkaw lang cceih oh,” a ci.

²⁶Te BAWIPAW nynh Moses te Aaron kha hynhte a hopya hae:

²⁷E ccungccaw hoyleipaw zapi hae nynh kae kha hohseciamou rawsete yn ccohnuakuh ung cih hae? Israel hae nynh ka tungvaw rawsete a ccohku hae paw kha phe ka thae vae.

²⁸Minmin kyakhe, BAWIPAW nynh, “Kae tuh ka hiin thyhawte, na ho oh paw ka thae thathyhte nae tungvaw ka cyih cih:

²⁹achihpaw nae rhua hae tuh e ramkaw ccaccei hin a huekuh cih hae; te milu na ria oh paw balyn, min rianaw kya a umpaw kum kuin te palung lang, kae kha rawsete a ccohkuh hae paw tuh,

³⁰nanning khua na sah nawlan oh bya kae kinpyaku oh paw ram lungkhu lang, Jefunneh ccapaw Kaleb te Nun ccapaw Joshua laelan, nanning lu kheit sanmah na tee lan khyh oh.

³¹Thuasalama rhaw nynh a kyng cih hae cite na ho oh paw nae ccaaw hae kha ka teekhae cih hae zah nanning nynh pawlang na ria lei oh paw ram kha a nyh cih hae.

³²Thuasalama achihpaw nae pyn hae tuh e ramkaw kya a huekuh cih hae.

³³Te nae ccaaw hae tuh ramkaw kya kum sung pali lungkhu tuurintu hae athua cih hae zah, nyathya achihpaw nae pyn hae tuh ramkaw kya a hueku makhia hae, nae zyn leinaw keiccuze minmin tuh a teing cih hae.

³⁴Ram na dophi ccyh oh, nin sung pali thyhte, kum kheit hanlan nin kheit cci thua zah kum sung pali lungkhu nae hoyleinaw kha na ing cih oh, te ka lunghoy leinaw kha na nyh cih oh,” cite hopah hae.

³⁵Kae, BAWIPAW nynh ka ho vae; kae kha rawsete pynkheihlan a pumkuh hae paw e ccungccaw hoylei hae zapi balyn hynh hynhte solei ka cyih cih hae: minmin tuh e ramkaw kya maemih athua cih hae zah tuin kya a chih cih hae.

³⁶Te Moses nynh ram dophi lan saw hae zah he oun ki hae te, ram a hoyleinaw kong thongpang phute zapi balyn kha amaw tungvaw a ccohsah nuakuh hae paw—

³⁷ram konglang thethya oun phu hae paw tuh shethya tungte BAWIPAW malang a chih hae.

³⁸Thuasalama ram dophi lan cceih hae paw kyaze Nun ccapaw Joshua te Jefunneh ccapaw Kaleb makhae nynh a hiin hae.

³⁹Moses nynh e bya hae kha Israel hae balyn kalan he a hopah hae te, ccungccaw hae tuh thawmawte a rah hae.

⁴⁰Minmin nynh awkhua takaw te tho hae zah mua ahangnaw lang cceihthung hae zah, “Hein kya phang kae um. BAWIPAW nynh byakinkupaw hmin kalan kae cceihthung vae cih, pawccecize phe kae sei vae,” a ci hae.

⁴¹Thuasalama Moses nynh, “Pawcce BAWIPAW kawpyanaw kha palei na ei ung oh? Nae laan nae sui ua lan khyh.

⁴²Cceihthung nan oh, pawccecize BAWIPAW nynh ae umkhae khyh oh; naemaw te naemaw kha nae rhaw hae malang chisaku ry nan oh.

⁴³Pawccecize Amalek hae te Kanaan hae nynh tuin kya ae hawilia cih oh zah thaloi te na khuliakuh cih oh; pawccecize nanning tuh BAWIPAW nulang zuikunaw kyate na maeleihkuh vae oh zah, BAWIPAW tuh nanning ryte um vae lan khyh,” a cipya hae.

⁴⁴Thuasalama BAWIPAW kya-e byakin thingkua ryte Moses tuh ryahmin kyate a pou khyh zemah minmin nynh mua alungnaw ram ahangnaw langkhe kaethung lan a tuaku hae.

⁴⁵Oute tuh-e mua ahangnaw kya um hae paw Amalek hae te Kanaan hae nynh oun cceihbung hae zah minmin kha phe a tae hae te, Hormah kyacia a deehui hae.