Read Zotung Chin NAMBAR 17 Bible Online

NAMBAR 17 - Zotung Chin bible

NAMBAR 17

¹BAWIPAW nynh Moses kha,

²“Israel hae kha hopah hae lah, mih puizia kya-e cciakhaetu hae balyn kyate puizia phu kheit cci hanlan hoitang ccangkheit ccite hoitang haw lae ning kha minmin kyate lawtua. Mih hoitang raveih kyakhe mih min kha ccarou zei lah,

³Levi hoitang kyakhe Aaron min kha zeitua. Pawccecize puizia phu kheit cci kya-e lupi hae hanlan hoitang ccangkheit cci athua cih.

⁴Tuh-e hoitang hae kha tungkunaw bu lungkhu, byakinnaw malang nang te ah tungkunaw khe nung hae.

⁵Te ka popaw ccungccaw kya-e hoitang tuh anaw yn toih cih; tuhcite Israel hae nynh nang kha palei ae rawse hae zah ae ccohnuaku hae paw kha ka daesah cih,” a cipya.

⁶Moses nynh Israel hae kha a hopya hae; te mih cciakhaetu hae balyn nynh mih puizia thyhte, cciakhaetu lu kheit hanlan hoitang ccangkheit ccite, hoitang haw lae ning kha Moses kalan a pya hae; Aaron hoitang tuh mih hoitang hae kya a umbua.

⁷Tukeiccuze Moses nynh hoitang hae kha ccaekiakhannaw bu lungkhu BAWIPAW malang khe a nung hae.

⁸Awkhualan khe Moses nynh ccaekiakhannaw bu lungkhu lang he a tee tuh, Levi phin kya-e Aaron hoitang tuh anaw phe la toih vae, apaw lungkuhpaw mah la um vae zah apaw phe la paw vae, te avoipaw almond thae hae kha la thae hae.

⁹Oute Moses nynh hoitang hae balyn kha BAWIPAW malang kyate Israel hae balyn kalan a cciakhae; minmin nynh do hae zah mih hoitang raveih kha a lawku hae.

¹⁰Te BAWIPAW nynh Moses kha, “Rawsetu hae hanlan raeringnaw pyapaw lante Aaron hoitang kha byakinnaw malang khe bua nung; tuhteze nynh kae yn ccohnuaku hae paw kha na daesah kho cih, tuhkhyhze tuh a chihsei cih hae,” a cipya.

¹¹Moses nynh tuhcite a cyi; BAWIPAW nynh kaw a pya thathyhte a cyi.

¹²Israel hae nynh Moses kha, “Aening ah chih vae cih oh; phe ah thang vae oh, ah balynte pong ah thang vae oh!

¹³BAWIPAW boei beikinn kalan a naekuhpaw miakaw a chih cih. Ah balynte ah chih vae cih oh tou?” a cipya hae.