Read Zotung Chin NAMBAR 18 Bible Online

NAMBAR 18 - Zotung Chin bible

NAMBAR 18

¹BAWIPAW nynh Aaron kha hynhte a hopya: “Nang te na ccapaw hae te na ciihan hae nynh beikinnthyaa te asekuhpaw hoyleinaw kha na ing cih oh, nang te na ccapaw hae makhae nynh ranpibawi thuanaw te asekuhpaw hoyleinaw kha na ing cih oh.

²Tukeiccuze nang te na ccapaw hae nynh ccaekiakhannaw bu malang na um lya oh khe, na thokeinaw phin, Levi phin na uno hae nynh nang te mungkute rya ae bawm ccaw hae minmin kha ko hae.

³Minmin nynh namaw ryalaw te bu ryalaw balyn kha a lah cih hae. Thuasalama minmin nynh beikinnthyaa uccaw hae te silawhang kalan naekuh lan khyh hae; tuhkhyhze tuh minmin te nang tuh parouhte na chihsei cih oh.

⁴Tungkunaw bu ryalaw hae law khylan te bu ryalaw balyn hanlan minmin kha namaw kya pybua athua hae; atolang e ccungccaw nynh nae kalan naekuh lan khyh.

⁵Thinrianaw tuh Israel hae tungvaw kharouh bua a thua khyh nawlan, naemaw ccaccei nynh beikinnthyaa ryalaw hae te silawhang ryalaw hae kha na lah cih oh.

⁶Kae tuh na uno Levi phin hae kha Israel hae laku kyate a ko hae paw nynh ka thua; minmin tuh tungkunaw bu ryalaw law khylan BAWIPAW kalan ap athua hae paw, nae hanlan pyapaw lasung nynh athua hae.

⁷Thuasalama nang te na ccapaw hae nynh silawhang te zokhawpaw boei anulang te asekuhpaw nae ranpibawi ryalaw balyn kha zuakute na lah cih oh. Nae ranpibawi thuanaw kha lasung lang kae pya oh; atolang e humhung zemah a pe lang a naekuhpaw tuh chia athua cih,” a cipya.

⁸BAWIPAW nynh Aaron kha hynhte a hopya: Israel hae kya-e athyaapaw lasung balyn kyaze kamaw hanlan rae athuapaw silawnawpaw hae kha nang kae pya; khah-e hae kha ranpibawi hanpaw lante nang te na ccapaw hae kalan zungzae hanlan kae pya oh.

⁹E hae hynh maee kya ubia leipaw athyaa huaccepaw uccaw hae athua cih hae: athyaa huaccepaw lante kamaw kalan yn pya hae paw mih silawnawpaw miakaw, ccathae silawnawpaw, seishawnaw silawnawpaw te cyiseinaw silawnawpaw tuh nang te na ccapaw hae nynh na ccou cih oh.

¹⁰Athyaa huaccepaw hawte na ae cih oh, pise miakaw nynh a ae cih; e hynh nae hanlan athyaapaw athua cih.

¹¹E hynh mah nae kya-e nynh thua: Israel hae kya-e hangthung-hebiate silawnaw balyn kya-e lasung hae kyate taekhiate nungpaw miakaw tuh nang, na ccapaw hae te na ccanung hae kalan zungzae hanlan kae pya vae oh; na inn e athyaapaw ccungccaw miakaw nynh khah-e hae kha a ae kho cih hae.

¹²Minmin nynh BAWIPAW kalan pya lan a po hae paw ahoy huaccepaw chitui balyn, misutui ahoy huaccepaw balyn te ccathae ahoy huaccepaw balyn kha nang kae pya vae.

¹³BAWIPAW kalan oun ccyng hae paw mih laephi kya-e thaety balyn tuh namaw kya-e athua cih; na inn e athyaapaw ccungccaw miakaw nynh khah-e kha a ae kho cih.

¹⁴Israel hae kyaze hlupaw uccaw miakaw tuh na kya-e athua cih.

¹⁵BAWIPAW kalan hlu athua hae paw ahysuepaw balyn, ccatawccaw te thanty tuh na kya-e athua cih; thuasalama ccatawccaw te athyaa leipaw thanty hae kha tuh na shaw cih hae.

¹⁶A shawnaw hae mee tuh beikinnthyaa e shekel thyhte, kerah ccangkuin acihpaw ngunphua shekel pangaw khate na khya cih zah sawpaw sah kheit acih te a shaw cih hae.

¹⁷Thuasalama vaetua thanty, tuu thanty te miaa thanty kha na shaw lan khyh; tuh-e hae tuh athyaa hae. Mih chii kha silawhang vawlan na hei cih zah, mih tho kha maee te silawnaw lante BAWIPAW hanlan mynkhuhpaw lang na u cih;

¹⁸thuasalama mih saw kha tuh hangthung-hebiate silawnaw kya-e aby te a ranglang phae na ccou hawkhate na kya-e athua cih.

¹⁹Israel hae nynh BAWIPAW kalan a pya hae paw athyaapaw ahlu balyn kha namaw, na ccapaw hae te na ccanung hae kalan zungzae tynpaw phungzae lante kae pya vae oh; tuh-e tuh nang te na ciihan hae hanlan BAWIPAW malang loi te byakinnaw athua zungzae cih.

²⁰Oute BAWIPAW nynh Aaron kha hynhte a hopya: “Mih ram kya rho na muebua lan khyh, minmin lakuze neeku buapaw thyhsan na hoi lan khyh; kae hynh Israel hae laku e na hanpaw te na rho nynh ka thua.

²¹“Levi phin hae nynh tungkunaw bu kya-e ryalaw kha a law keiccu hae ze, Israel hae kya-e pumhaw pumkheit miakaw kha mih ryalaw hanlan rho lang ka pya vae hae.

²²Atu te Israel hae nynh tungkunaw bu kalan naekuh vae lan khyh hae, tuhkhyhze tuh seinaw mee a teing cih hae zah a chih cih hae.

²³Thuasalama Levi phin hae nynh tungkunaw bu ryalaw kha a lah cih hae, mih cyiseinaw kha mimaw nynh a ing cih hae; e hynh nae she takyh kya zungzae tynpaw upadi athua cih. Thuasalama Israel hae laku kya rho tuh hoi lan khyh hae,

²⁴pawccecize Israel hae nynh BAWIPAW kalan ahlu lang a nung hae paw pumhaw pumkheit kha Levi phin hae kalan rho lang phe ka pya vae hae. Tukeiccuze Israel hae laku kya nanning nynh rho na hoi lan khyh oh cite phe ka hopya vae hae,” a ci.

²⁵Oute BAWIPAW nynh Moses kyakhe,

²⁶“Levi phin hae kha hynhte na hopah cih hae: ‘Israel hae kyate rho lang kae pya vae oh paw pumhaw pumkheit kha minmin kyate na lawku vae oh ze, tuh-e na lawku oh paw kya-e ahlu kha BAWIPAW kalan na pya cih oh, tuh-e tuh pumhaw pumkheit kya-e pumhaw pumkheit nynh thua.

²⁷Tuh-e nae hlu tuh huimin kya-e ccathae hawte thuasah, misu mianaw khu kya-e misutui hawte thuasah nae hanlan riapya athua cih.

²⁸Tuhcite nanning nynh mah Israel hae kyate na mue oh paw pumhaw pumkheit balyn kya-e kha BAWIPAW kalan ahlu kha na nung cih oh; tuh-e BAWIPAW ahlu tuh ranpibawi Aaron kalan na pya cih oh.

²⁹Na mue oh paw lasung balyn kya-e BAWIPAW hanlan accanpaw miakaw kha na phia cih oh. Tuh-e hae balyn kya-e ahoy huaccepaw tuh thyaasah athua cih.’

³⁰Tukeiccuze minmin kha, ‘Ahlu kya-e ahoy huaccepaw kha na pya kou oh te, alaepaw kha huimin kyate apoupaw looh te misu mianaw khu kyate apoupaw misutui hawte Levi phin hae hanlan riapya athua cih.

³¹Nang te na innbyn hae nynh tuh-e tuh teitei kya mah na ae kho oh; pawccecize tuh-e tuh tungkunaw bu kya-e nae ryalaw mee nynh thua.

³²Ahoy huaccepaw kha na pya vae oh keiccuze seinaw kha na ing vae lan khyh oh. Thuasalama na chisei khyh nawlan oh, Israel hae kya-e athyaapaw lasung hae kha na thusah lan khyh oh,’ cite hopah hae,” a cipya.