Read Zotung Chin NAMBAR 19 Bible Online

NAMBAR 19 - Zotung Chin bible

NAMBAR 19

¹BAWIPAW nynh Moses te Aaron kha hynhte a hopya hae:

²E hynh BAWIPAW nynh kaw a pyapaw upadi kya-e phungbya nynh thua: Douccahpaw te taphu a khangkuh boi leipaw, ccaenaw um leipaw vaetua tohlaw asepaw sa kheit kha nae kalan cciakhae lan Israel hae kha hopah oh.

³Tuh-e tuh ranpibawi Eleazar kalan na pya cih, te tuh-e tuh ryahmin atolang cciakhae athua cih zah amaw malang khe chia athua cih.

⁴Ranpibawi Eleazar nynh a chii abang kha a kuihdung te a lah cih zah tungkunaw bu malang khe vae sari a hei cih.

⁵Oute tohlaw kha ranpibawi a muihnaw khe maee te u athua cih; a phua, a saw te a chii kha a-ia ryte maee te u athua cih.

⁶Ranpibawi nynh sidar thing, hyssop thing, asepaw uccaw kha a lah cih zah tohlaw u athuanaw maee lungkhu langkhe a phung cih.

⁷Oute ranpibawi nynh a boeining kha a sukuh cih zah a pyn kha tui te a singkuh cih, tukoute ryahmin lungkhu lang a tee cih; thuasalama ranpibawi tuh zete cia thyaa lan khyh.

⁸Tohlaw asepaw kha maee te a utu nynh a boeining kha tui te a sukuh cih zah a pyn kha tui te a singkuh cih; aning tuh zete cia thyaa lan khyh.

⁹Oute athyaapaw lukhakheit nynh tohlaw buhhaw kha a lua cih zah ryahmin atolang athyaanaw hmin khe a nung cih; tuh-e buhhaw tuh Israel zapi hae thyaasahnawpaw tui hanlan nung athua cih. Tuh-e tuh seinaw thyaasahnawpaw silawnaw nynh thua.

¹⁰Tohlaw buhhaw a luatupaw nynh a boeining kha a sukuh cih zah zete cia thyaa lan khyh. E hynh Israel hae te minmin kya umbua hae paw ramccang hae hanlan zungzae tynpaw phungbya athua cih.

¹¹Michi rhua a typaw ccungccaw miakaw tuh nin sari lungkhu thyaa lan khyh.

¹²Tuh-e ccungccaw nynh amaw te amaw kha nin thumnaw nin te nin sarinaw nin khe a thyaasakuh cih zah aning tuh athyaa vae; thuasalama nin thumnaw nin kya te nin sarinaw nin kyakhe amaw te amaw kha a thyaasahku khyh zetuh, thyaa lan khyh.

¹³Achih vae paw ccungccaw pyn, michi rhua kha ty zah amaw te amaw a thyaasakuh leipaw balyn tuh BAWIPAW beikbu kha a thusah; tuhcihawpaw ccungccaw tuh Israel ccungccaw kyate vua athua cih. A tungvaw kya thyaasahnawpaw tui kha hei athua khyh keiccuze aning tuh thyaa khyh; a thyaa leinaw tuh a tungvaw a um ung.

¹⁴E hynh lukhakheit nynh bu kya he a chi vae ze, zui lanpaw upadi nynh thua: bu lungkhu lang a teepaw miakaw te bu kya a umpaw miakaw tuh nin sari lungkhu thyaa lan khyh.

¹⁵Te ahungkuhpaw ang, ahu hukuh leipaw miakaw tuh thyaa khyh.

¹⁶Thaloi te a chia hae paw kha thuasah, phuchi te achihpaw kha thuasah, michi ru kha thuasah, shawku kha thuasah, khah-e hae kha ryahmin atolang khe a typaw ccungccaw tuh nin sari lungkhu thyaa lan khyh.

¹⁷Athyaa leipaw ccungccaw hanlan maee te upaw seinaw thyaasahnawpaw silawnaw kya-e buhhaw abang kha a lah cih hae zah, aluapaw tui kha ang lungkhu khe a ruin cih hae;

¹⁸oute athyaapaw ccungccaw nynh hyssop kha a lah cih zah tui lungkhu khe a dung cih, te bu, bu uccaw hae balyn, bu kya a umpaw ccungccaw balyn kha thuasah, ru, a chia hae paw, michi rhua te shawku a typaw miakaw kha thuasah tuh-e tui te a hei cih hae.

¹⁹Athyaapaw nynh athyaa leipaw kha nin thumnaw nin te nin sarinaw nin khe a hei cih hae, tuhcite nin sarinaw nin khe a thyaasah cih hae. Oute a boeining kha a sukuh cih, tui a singkuh cih zah zete khe a thyaa cih.

²⁰Athyaa leipaw nynh amaw kha thyaasahku leite a um lanze, BAWIPAW beikinnthyaa kha a thusah keiccuze zapi kyate vua athua cih. Thyaasahnawpaw tui kha a tungvaw kya hei athua khyh keiccuze aning tuh thyaa khyh.

²¹E hynh minmin elang zungzae tynpaw phungbya athua cih. Thyaasahnawpaw tui a heitu nynh a boeining kha a sukuh cih, te thyaasahnawpaw tui a typaw humhung zemah zete cia thyaa lan khyh.

²²Athyaa leipaw ccungccaw nynh a typaw miakaw tuh thyaa lan khyh, te tuh-e athyaa leipaw kha a typaw miakaw tuh zete cia thyaa lan khyh.