Read Zotung Chin NAMBAR 20 Bible Online

NAMBAR 20 - Zotung Chin bible

NAMBAR 20

¹Israel hae zapi balyn tuh masaty sawpaw khe Zin ramkaw kya thua hae zah Kadesh kya a um hae; Miriam tuh tuin kya chih zah a uu hae.

²Te zapi hanlan tui a um khyh keiccuze pynkheihlan pumnuakuh hae zah Moses te Aaron kha a rawse hae.

³Ccungccaw hae nynh Moses kha, “Kae puizia hae nynh BAWIPAW malang a la chi lya hae khe, kaening mah kae la chibua khyh!

⁴Kaening te kae sahiin-awvaw tuh hein kya chi khylan, BAWIPAW kya-e ccungccaw zapi hynh pawcce e ramkaw lang nae cciakhae?

⁵Kaening kha e vawsawnaw hmin kalan cciakhae khylan pawcce Izip ram kyate nae poukhae? E hmin tuh ccathae, eboh, misu te ccalee thae a umnaw thua khyh; nia lanpaw tui mah um khyh,” cite bya a lungnua hae.

⁶Oute Moses te Aaron tuh zapi hae kyate tungkunaw bu thuakaw kalan a cceih hae; te mih maee kha tebaling hae zah BAWIPAW phu-enaw tuh minmin kalan yn langkuh.

⁷BAWIPAW nynh Moses kha hynhte a hopya:

⁸“Hoitang kha lawkuh lah, nang te Aaron nynh zapi hae kha pum oh, te lung kya-e tui mue khylan mih malang khe lungpi kha kawpya tua. Tuhcite minmin hanlan lungpi kyate tui kha na pousah cih zah zapi te mih sahiin-awvaw hanlan nia lanpaw kha na pya cih hae,” a cipya.

⁹BAWIPAW nynh kaw a pya thyhte Moses nynh hoitang kha BAWIPAW malang kyate a lawku.

¹⁰Moses te Aaron nynh zapi hae kha lungpi malang khe pynkheihlan pum hae zah minmin kha, “Nanning doutu hae, ngaetua oh, kaening nynh nae hanlan e lungpi kyate tui kae pousahpah cih oh tou?” a cipya hae.

¹¹Oute Moses nynh a kuih kha hangthung zah a hoitang te lungpi kha vae ning a bua; tui tuh patae yn pou zah zapi hae te mih sahiin-awvaw nynh a nia hae.

¹²Thuasalama BAWIPAW nynh Moses te Aaron kha, “Israel hae malang ka thyaanaw kha langsahku khylan nanning nynh kae kha nae doliaku khyh oh, tukeiccuze nanning nynh e zapi hae hynh ka pya hae paw ram lungkhu lang na teekhae lan khyh oh,” a cipya hae.

¹³E hynh Meribah tui nynh thua, Israel ccungccaw hae nynh BAWIPAW kha bya a lungnua keiccu hae ze, amaw athyaanaw kha a langsakunaw hmin nynh thua.

¹⁴Moses nynh Kadesh kyate locceihtu hae kha Edom siapharan kalan saw hae zah, “Nae unopaw Israel nynh hynhte a ci: Kae tungvaw accahpaw vawsawnaw balyn hynh phe na ny:

¹⁵kae minpaaw hae nynh Izip ram lang la cceihbung hae zah Izip ram kya khaw cia kae umpaw kha thuasah, te Izip hae nynh kaening te kae minpaaw hae tungvaw oun tuaasah hae paw kha thuasah,

¹⁶te BAWIPAW kalan he kae sia te, aning nynh kae roi kha yn thaepah zah vaawpaw lu kheit kha yn sawpah zah Izip ram kyate oun poukhae; atu kaening tuh na ramri kin kya umpaw khua, Kadesh kya nynh kae um.

¹⁷Atu na ram kya po beih oun cciasah. Kaening nynh loo kya thuasah, misu khokhu kya thuasah po kae cceih lan khyh, tuisung kya-e tui mah kae neih lan khyh; Siapharan Laanpi kha po kae zui cih zah na ramri kae lawe mawlaezung voilang ranglang kae maekuh lan khyh,” cite a hosahpya hae.

¹⁸Thuasalama Edom nynh Moses kha, “Na cceih lan khyh oh, tuhkhyhze tuh thaloi te kae pounua cih oh zah kae rawse cih oh,” a cipya.

¹⁹Israel hae nynh Edom kha, “Laanpi kya kae zui cih; kaemaw te kae sahiin-awvaw nynh na tui kha kae nia zetuh amee kae pya cih. Ccu te kyalya po oun cciasah, ccangpaw paw sanmah kae cyih lan khyh,” a cipya hae.

²⁰Thuasalama aning nynh, “Na cceih lan khyh oh,” a ci. Te Edom nynh rhawkaw patae te alepaw zunghe ryte a pounua hae.

²¹Tuhcite Edom nynh mih ram kya Israel hae po cciasah lanpaw kha phe a ei; tukeiccuze Israel hae nynh minmin kha a sibia hae.

²²Israel hae zapi balyn tuh Kadesh kyate pou hae zah Hor Mua kya athua hae.

²³Oute BAWIPAW nynh Moses te Aaron kha Edom ramri kya umpaw Hor Mua kyakhe hopah hae zah,

²⁴“Aaron tuh a ccungccaw hae kalan sueluabua athua cih. Meribah tui kya kaw kae pya oh paw kha na ei keiccu oh ze, Israel hae ka pya hae paw ram lungkhu lang tee lan khyh.

²⁵Aaron te a ccapaw Eleazar kha ko hae lah, Hor Mua lang kaekhae thung hae;

²⁶Aaron boeining kha khahpah lah, a ccapaw Eleazar kha lawsahku tua. Aaron tuh a ccungccaw hae kalan sueluabua athua cih zah, tuin kya a chih cih,” a ci.

²⁷BAWIPAW nynh kaw a pya thyhte Moses nynh a cyi; zapi balyn muihnaw khe minmin tuh Hor Mua lang a kaethung hae.

²⁸Moses nynh Aaron kha a boeining khahpah zah a ccapaw Eleazar kha a lawsahku; te Aaron tuh tuh-e mua dung khe a chih. Moses te Eleazar tuh mua kyate a rungbung hae.

²⁹Zapi balyn nynh Aaron a chih vae cipaw a nyh hae te, Israel hae balyn tuh Aaron elang nin sung thum rawkhuite a um hae.