Read Zotung Chin NAMBAR 22 Bible Online

NAMBAR 22 - Zotung Chin bible

NAMBAR 22

¹Israel hae tuh cceih hae zah Jordan vaw khuraw lang, Jeriko khua te arawsekunaw Moab bialae khe ryahmin a tahku hae.

²Israel hae nynh Amor hae tungvaw a cyisahnaw hae balyn kha Zippor ccapaw Balak nynh a muih.

³Israel hae tuh myarya alung keiccu hae ze, Moab tuh myarya a rih; Moab nynh Israel ccungccaw hae kha myarya rih zah tuh-e rinaw nynh amaw kha phe a tae.

⁴Te Moab nynh Midian piccan hae kha, “Tangnuapaw nynh loo kya-e lonua kha a bouku hawte, e ccungccaw phupi nynh aening pepan umpaw balyn kha yn ae cih,” a cipya hae. Tuh ccyh lyaze Zippor ccapaw Balak tuh Moab siapharan nynh thua.

⁵Amaw ram e Zufrates vaw pe umpaw Pethor khuapaw Beor ccapaw Balaam kha ko khylan Balak nynh locceihtu hae kha saw hae zah, “Izip ram kyate minphuin phuin kheit yn pou zah laephi vawlan pazaekuh zah, kamaw pe khe khua oun sah hae.

⁶Tukeiccuze yn cciatua, minmin tuh kamaw laeze mih thawsaehua keiccuze e ccungccaw hae tungvaw kamaw hanlan thya yn lawpya tua hae, minmin kha tae khote ram kyate poh ka dee kho hae vema; pawccecize hythua na pyapaw humhung zemah hythuapya thua zah, thya na lawpaw humhung zemah thyalaw athua cipaw ka ny,” a cipya.

⁷Tukeiccuze Moab piccan hae te Midian piccan hae tuh mih kuih kya thyalawnaw hanlan amee kha ccyngkuh hae; te Balaam kalan cceih hae zah Balak nynh a hopaw bya kha a hopya hae.

⁸Balaam nynh minmin kha, “Atu khuazi hein kya rya oh lah, BAWIPAW nynh bya yn hopya thyhte nanning kha kae hopah cih oh,” a cipya hae; tukeiccuze Moab bawi hae tuh Balaam kya a rya hae.

⁹Pachia tuh Balaam kalan yn thua zah, “Na kya um hae paw hynh hung hae mou?” a cipya.

¹⁰Balaam nynh Pachia kha, “Moab siapharan Zippor ccapaw Balak nynh hynh-e bya hynh yn hosahpya hae:

¹¹‘Izip ram kyate minphuin phuin kheit yn pou zah laephi vawlan oun pazaekuh hae; atu yn cceih lah, minmin kha kamaw hanlan thya yn lawpya tua hae; minmin kha ka tuk cih hae zah poh ka dee kho hae vema,’ yn cipya,” cite a hopya.

¹²Pachia nynh Balaam kha, “Minmin ryte na cceih lan khyh; tuh-e ccungccaw hae tuh hythuapya athua hae paw athua keiccu hae ze minmin kha thya na law lan khyh hae,” a cipya.

¹³Tukeiccuze Balaam tuh awkhua khe yn tho zah, Balak nynh a saw hae paw bawi hae kyakhe, “Nanning ryte cciakheih lanpaw kha BAWIPAW nynh yn ua khyh keiccuze nae ram lang la cceih ccavae oh,” a cipya hae.

¹⁴Tukeiccuze Moab bawi hae tuh Balak kalan cceih hae zah, “Balaam nynh kaening ryte cciakheih lan phe a mya,” a cipya hae.

¹⁵Balak nynh minmin laeze mih maedo-um huapaw bawi hae kha houh alunghua lan bua a saw hae.

¹⁶Minmin nynh Balaam kalan oun thua hae zah, “Zippor ccapaw Balak nynh hynhcite a ho: ‘Kamaw kalan ccia lanpaw hynh pawpaw mah khawsakuh nan sah,

¹⁷pawccecize sawtuanaw alepaw ka pya cih zah yn ngiapaw miakaw kha ka cyipah cih; yn cceih sah lah, e ccungccaw hae hynh kamaw hanlan thya yn lawpah hae sah,’ ae ci,” cite a hopya hae.

¹⁸Thuasalama Balaam nynh Balak see hae kyakhe, “Sui te ngun phe beihpaw a inn kha Balak nynh yn pya zemah, BAWIPAW ka Pachia nynh kaw yn pyapaw laeze azyahua lante thuasah, alunghua lante thuasah cyi khylan ka cceih kho khyh.

¹⁹Thuasalama BAWIPAW nynh yn hopah ung cih paw kha ka ny nawlan, hein kya um hin oh,” a cipya hae.

²⁰Tuh-e khuazi khe Pachia tuh Balaam kalan yn thua zah, “Ccungccaw hae tuh nang ko khylan oun thua vae hae zetuh, thokuh lah, minmin kya cceihbua; thuasalama cyi lan kae hopyapaw kyalya kha na cyih cih,” a cipya.

²¹Tukeiccuze Balaam nynh awkhua khe tho zah, a lann kha khungnin a dee koute Moab bawi hae kya a cceihbua.

²²Balaam nynh a ccia keiccuze Pachia thinrianaw tuh maee lang rua zah BAWIPAW vaawpaw tuh amaw khawtu lante laanpi kya a thadyn. Balaam tuh lann kha ccikuh zah a see hae lu ning tuh amaw kya a cceihbua hae.

²³A kuih kya thaloi ccyngkuh zah laanpi kya a thadynpaw BAWIPAW vaawpaw kha lann nynh a muih; tukeiccuze lann tuh laante lang maekuh zah loo lungkhu lang a cceih; te Balaam nynh lann kha laanpi lang bua a maeku ccaw cite a bua.

²⁴Oute BAWIPAW vaawpaw tuh misu khokhu hae laku, voikheit voikheit lang lungrua athungkuhpaw laanpi abypaw kyakhe a thadyn.

²⁵Lann nynh BAWIPAW vaawpaw kha he a muih tuh, lungrua kalan beekuh zah Balaam ccu kha lungrua kyakhe a tawnaw; tukeiccuze aning nynh lann kha a bua ki.

²⁶Oute BAWIPAW vaawpaw tuh malang cceih zah voilang ranglang maekunaw hmin a um leinaw, abynaw hmin khe a thadyn.

²⁷Lann nynh BAWIPAW vaawpaw kha he a muih tuh, Balaam kha baruh a bungkhae; te Balaam thinrianaw tuh maee lang rua zah a hoitang te lann kha a bua.

²⁸Oute BAWIPAW nynh lann kha bya hosah zah Balaam kyakhe, “Na tungvaw paw ka cyi keiccu mou vae thum cia nae bua?” a cipya.

²⁹Balaam nynh lann kha, “Angaeepaw lang nae ria keiccu nynh thua! Thaloi ka la ccyngku ze, atumaw phe kae theih vae cih paw!” a cipya.

³⁰Thuasalama lann nynh Balaam kha, “Kae hynh atunin cia na hiin lungkhu balyn nae ccikupaw na lann ka thua khyh tou? Atu hawte na tungvaw kae cyih boi tou?” a cipya. Te Balaam nynh, “Nae cyih boi khyh,” a ci.

³¹Oute BAWIPAW nynh Balaam mit kha awsah zah, a kuih kya thaloi ccyngkuh zah laanpi kya a thadynpaw BAWIPAW vaawpaw kha a muih; te aning nynh a lu tebung zah a bakhung.

³²BAWIPAW vaawpaw nynh Balaam kha, “Pawcce na lann kha vae thum cia na bua? Na laanpi tuh ka malang ahme leipaw athua keiccuze kae tuh ae rawsetu lante kae pou vae.

³³Lann nynh kae kha yn muih zah kamaw kyate vae thum cia a maekuh. Kamaw kyate a maeku khyh lanze, atasy lyakhe nang kha kae theih ccaccing vae cih zah lann kha ka hiin cih,” a cipya.

³⁴Oute Balaam nynh BAWIPAW vaawpaw kha, “Kae kha rawse khylan laanpi kya na la thadynpaw ka ny khyh keiccuze phe ka sei vae. Tukeiccuze na lung ae hoysah leipaw athua zetuh, atumaw inn lang ka ki cih,” a cipya.

³⁵BAWIPAW vaawpaw nynh Balaam kha, “Minmin ryte cceihbua; thuasalama ho lan cite kae hopyapaw bya kyalya kha na ho cih,” a cipya. Tukeiccuze Balaam tuh Balak bawi hae ryte a cceihbua.

³⁶Balak nynh Balaam yn cceih vae cipaw he a thae te, Arnon vaw nynh a phiapaw ramri, ramri athangnaw kya umpaw Ar kyakhe tungku khylan a cciadue.

³⁷Balak nynh Balaam kha, “Nang ko khylan ccungccaw kae saw khyh tou? Pawcce kamaw kalan nae ccia khyh? Sawtua-hangthungnaw ae pya khopaw ka thua khyh tou?” a cipya.

³⁸Balaam nynh Balak kha, “Atu namaw kalan kae thua vae, thuasalama hankhakheit ho khonaw huhan ka hoi zawtou? Ka ho lanpaw tuh Pachia nynh ka mung kya yn nungpyapaw bya kha nynh thua,” a cipya.

³⁹Oute Balaam tuh Balak ryte cceih hae zah Kiriath-huzoth kya athua hae.

⁴⁰Balak nynh tangnuapaw hae te tuu hae khate silaw zah Balaam te a kya umpaw bawi hae kalan a pya hae.

⁴¹Awkhualan khe Balak nynh Balaam kha Bamoth-baal lang a cciakhae; tuin kyate aning nynh Israel ccungccaw abang kha a muih hae.