Read Zotung Chin NAMBAR 23 Bible Online

NAMBAR 23 - Zotung Chin bible

NAMBAR 23

¹Oute Balaam nynh Balak kha, “Hein kya silawhang ccangsari yn raepah lah, tangnuapaw sa sari te tuutepaw sa sari kha kamaw hanlan yn paccynpya tua,” a cipya.

²Balaam nynh a ho hawte Balak nynh a cyi; te Balak te Balaam nynh tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law hae.

³Oute Balaam nynh Balak kha, “Maee-ute si na lawnaw pe hein kyahin la thadyn lah, kae tuh ccanglang ka la cceih hin. BAWIPAW tuh kae te tungku khylan poh yn cceih vema. Aning nynh yn muihsahpaw miakaw kha kae hopah cih,” a cipya. Te aning tuh ahangnaw lang a cceihthung.

⁴Oute Pachia nynh Balaam kha a tungku; te Balaam nynh Pachia kha, “Beikhang ccangsari kha ka paccyn zah, tangnuapaw sa kheit ccite tuutepaw sa kheit cci khate silawhang ccangkheit cci kya si ka law vae,” a cipya.

⁵BAWIPAW nynh Balaam mung kyakhe bya nung zah, “Balak kalan ki lah, hynhcite na ho cih,” a cipya.

⁶Tukeiccuze Moab bawi hae balyn ryte maee-ute si a lawnaw pe kya a thadynpaw Balak kalan khe Balaam tuh a ki.

⁷Oute Balaam nynh profehbya lante ho zah: “Balak nynh Aram kyate yn hoei, Moab siapharan nynh nithua lang e mua hae kyate, ‘Oun cceih lah, kamaw hanlan Jakob kha thya yn lawpya tua; Oun cceih lah, Israel hynh thethyasah tua!’ a ci.

⁸Pachia nynh thya a law leipaw kha pawtemou thya ka law kho cih? BAWIPAW nynh the a thyasah leipaw kha pawtemou the ka thyasah kho cih?

⁹Pawccecize chia dung kyate amaw kha ka muih, mua hae kyate amaw kha ka do; A makhaete a umpaw minphuin tuh hein kya um zah, tuh-e minphuin tuh ccangpaw minphuin hae laku kya pykuh bua lan khyh!

¹⁰Hung nynh mou Jakob laenoi kha a ria kho cih zah, Israel pum pali pum kheit kha a ria kho cih? Miding chinaw hawte ka chih sah lah, Ka ccyh thangnaw tuh amaw athangnaw hawte thua sah!” a ci.

¹¹Oute Balak nynh Balaam kha, “Pawcce ka tungvaw hynhte na cyi? Ka rhaw hae kha thyalaw khylan khaw kae cciakhae, thuasalama atu minmin tungvaw pawpaw cyi leite hythua na pya hae,” a cipya.

¹²Balaam nynh, “BAWIPAW nynh ka mung kya a nungpaw byaho lanpaw kha pawlangria leite tou ka um cih?” a cipya.

¹³Tukeiccuze Balak nynh Balaam kha, “Israel hae na muih khonaw hmin ccangpaw kalan kamaw ryte cceihbua; minmin kha pong na muih lan khyh hae zah abang kyalya kha na muih cih hae; oute tuin kyate minmin kha kamaw hanlan thya yn lawpah hae,” a cipya.

¹⁴Tukeiccuze Balak nynh Balaam kha Pisgah mua dung umpaw Zofim loo lang a cciakhae. Beikhang ccangsari rae zah tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law.

¹⁵Balaam nynh Balak kha, “Kae tuh khuhlang BAWIPAW ka la tungku loukaw nang tuh maee-ute si na lawnaw pe hein kyahin la thadyn,” a cipya.

¹⁶BAWIPAW nynh Balaam kha a tungku, te a mung kyakhe bya nung zah, “Balak kalan ki lah, hynhcite la hopya tua,” a cipya.

¹⁷Balaam nynh Balak kya he athua tuh, Balak tuh maee-ute si a lawnaw pe khe la thadyn zah Moab bawi hae ryte la um hae. Balak nynh Balaam kha, “BAWIPAW nynh paw bya mou a ho?” a cipya.

¹⁸Oute Balaam nynh profehbya te ho zah, “Balak, thokuh lah, ngaetua; Pou Zippor ccapaw, ka bya yn ngaepya tua:

¹⁹Pachia tuh hynbya a ho hepaw ccungccaw thua khyh, a thinlung a paleihkuh hepaw, achihthyapaw ccungccaw thua khyh. Bya a kinpyaku vae paw kha cyih lan khyh tou? A ho vae paw kha ccingsah lan khyh tou?

²⁰Dotua, hythua pyanaw kaw ka mue vae; hythua yn pya vae zah, tuh-e tuh ka roh kho khyh.

²¹Aning nynh Jakob tungvaw vethyanaw muih khyh; Israel kya vawsawnaw mah muih khyh. BAWIPAW mih Pachia tuh minmin kya um zah, siapharan roipi tuh minmin laku a um.

²²Izip ram kyate a poukhaetu hae paw Pachia tuh minmin hanlan ccungtepaw ki te nynh aloku.

²³Jakob rawsete mitleihthyanaw tuh thane khyh, Israel rawsete apawepaw thyanaw tuh thane khyh, atu tuh Jakob te Israel konglang ho athua cih, ‘Pachia nynh a cyipaw hynh dotua oh!’

²⁴Dotua, e minphuin tuh chindeih pinung hawte thokuh zah, chindeih tepaw hawte a thadyn! A kyngpaw saw kha a ae kou maw te a teipaw chii kha a zu maw tuh rya khyh,” a ci.

²⁵Oute Balak nynh Balaam kha, “Minmin tungvaw kharouh thyalaw nan hae lah, hythua mah kharouh pya nan hae,” a cipya.

²⁶Thuasalama Balaam nynh Balak kha, “ ‘BAWIPAW nynh a hopaw miakaw kha ka cyi lanpaw nynh thua,’ cite kae hopah khyh tou?” a cipya.

²⁷Tukeiccuze Balak nynh Balaam kha, “Atu yn cciatua, hmin ccanglang kae cciakhae cih; tuin kyate kamaw hanlan minmin kha thya nae lawpya kho nawlan, tuh-e tuh Pachia lungry poh athua vema,” a cipya.

²⁸Tukeiccuze Balak nynh Balaam kha Shaddai ram alangnaw Peor mua dung langkhe a cciakhae.

²⁹Balaam nynh Balak kha, “Hein kya silawhang ccangsari yn raepah lah, tangnuapaw sa sari te tuutepaw sa sari kha kamaw hanlan yn paccynpya tua,” a cipya.

³⁰Tukeiccuze Balaam nynh a hopya thyhte Balak nynh cyih zah tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law.