Read Zotung Chin NAMBAR 24 Bible Online

NAMBAR 24 - Zotung Chin bible

NAMBAR 24

¹Israel hae hythuapya lanpaw kha BAWIPAW nynh a lungryccing cipaw kha Balaam nynh a ny keiccuze langmaw hawte mitleihthya hae paw kalan ccia vae leite, ramkaw langkhe a mae kha a hawi.

²Balaam nynh dothung zah Israel hae nynh phin raveihte ryahmin a tahku hae paw kha a muih. Oute Pachia muisaw tuh a tungvaw yn thua zah,

³a profehbya kha hynhte a ho: “Beor ccapaw Balaam kyate profehbya, a mitdaepaw ccungccapaw kyate profehbya,

⁴Pachia bya a thaepaw kya-e profehbya, Athunghuapaw kya-e vizin kha muih zah, a khuliaku zemah a mit a daepaw bya tuh:

⁵Pou Jakob, na bu hae tuh pawcih baban mou apuithya, Pou Israel, na ryahmin hae tuh pawcih baban mou apuithya!

⁶Aphuphute po zah a pazaekuhpaw ungcci ku phom hae hawte, vawkhu kin umpaw khokhu hae hawte, BAWIPAW nynh a lingpaw aloe ku hawte, tui pe e sidar thing hawte nynh athua hae.

⁷A tuipung kyate tui alua cih zah, tui alungnaw kya ccacii accah cih, a siapharan tuh Agag laeze a hanghua cih zah, a peenaw tuh hangthung athua cih.

⁸Izip ram kyate a poukhaetupaw Pachia tuh, amaw hanlan ccungtepaw ki te nynh aloku; a rhaw hae athuapaw minphuin hae kha a ae cih hae zah mih ru kha a khya cih hae. A the te a kaw cih hae.

⁹Aning tuh baryhkuh zah chindeih tepaw hawte thuasah, chindeih pinung hawte thuasah a rya, amaw kha hung nynh mou a tho ngan cih? Nang hythua ae pyapaw miakaw kha hythuapya athua cih zah, nang thya ae lawpaw miakaw kha thyalaw athua cih,” a ci.

¹⁰Oute Balaam tungvaw kya Balak thinrianaw tuh maee lang a rua, te Balak nynh a kuihlung kha phang lung zah Balaam kyakhe, “Ka rhaw hae kha thyalaw khylan nang kha kae ko, thuasalama minmin kha vae thum cia hythua na pya vae hae.

¹¹Tukeiccuze atu na inn lang cceih ccavae! ‘Lasung patae kae pya cih,’ kae cipya, thuasalama BAWIPAW nynh lasung miakaw kha ae ua khyh,” a cipya.

¹²Te Balaam nynh Balak kha, “Kamaw kalan nae saw hae paw na locceihtu hae kyakhe,

¹³‘Balak nynh sui te ngun phe beihpaw a inn kha yn pya zemah, athahpaw thuasah, ahoypaw thuasah kamaw rynaw hawte cyi lan BAWIPAW bya kha ka ei kho lan khyh; BAWIPAW nynh yn hopyapaw kha ka ho cih,’ cite ka hopah khyh hae tou?

¹⁴Tukeiccuze atu ka ccungccaw hae kalan ka cceih vae cih; malang ccyh kyaze e ccungccaw hae nynh na ccungccaw hae tungvaw a cyi lan hae paw kha kae nysah cih,” a cipya.

¹⁵Tukeiccuze Balaam nynh profehbya kha ho zah: “Beor ccapaw Balaam kya-e profehbya, a mitdaepaw ccungccapaw kyate profehbya, Pachia bya a thaepaw kya-e profehbya tuh,

¹⁶Pachia bya a thaepaw kya-e profehbya, Ahang Huaccepaw kya-e nythyanaw kha nyh zah, Athunghuapaw kya-e vizin kha muih zah, a khuliaku zemah a mitdaepaw bya tuh:

¹⁷Amaw kha ka muih, thuasalama atu ccyh kya thua khyh; amaw kha ka do, thuasalama accyh nae loh khyh, awsi ccangkheit tuh Jakob kyate yn langkuh cih zah, bawi hoitang ccangkheit tuh Israel kyate yn pou cih; tuh-e nynh Moab ram akin lang cia a tuk cih zah, Seth phin hae balyn kha a roh cih hae.

¹⁸Israel hae nynh rawthungte a cyi lya hae khe, Edom ram tuh a uccaw lang a tang cih, a rhaw hae, Seir kha mah a uccaw lang a tang cih,

¹⁹Jakob kyate yn langkuhpaw nynh a uk cih zah Khua kya a hiinhy hae paw kha a roh cih hae,” a ci.

²⁰Oute Amalek langkhe do zah profehbya a hopaw tuh: “Amalek tuh minphuin hae lakuze ccangkheitnaw nynh thua, thuasalama a thangnaw kya tuh zungzae a roh cih,” a ci.

²¹Oute Ken hae kalan khe do zah profehbya a hopaw tuh: “Na umnaw hmin tuh atyn cih zah, na bu tuh lungpi kya nung athua;

²²thuasalama Kain tuh a roh cih. Hohseciamou Asshur nynh kyngte ae cciakhae cih?” a ci.

²³Profehbya kha bua a hopaw tuh: “Pachia nynh e hynh he a cyih te, hummou a hiin kho cih?

²⁴Thuasalama Kittim kyate sanphalung hae oun thua cih hae zah Asshur te Eber kha vawsaw yn pya cih hae; minmin kha mah zungzae hanlan a roh cih hae,” a ci.

²⁵Oute Balaam tuh thokuh zah a umnaw hmin lang a ki vae, Balak mah a cceih vae.