Read Zotung Chin NAMBAR 27 Bible Online

NAMBAR 27 - Zotung Chin bible

NAMBAR 27

¹Oute Josef ccapaw Manasseh, Manasseh phin hae tuh Manasseh ccapaw Makhir, Makhir ccapaw Gilead, Gilead ccapaw Hefer, Hefer ccapaw Zelofehad nynh thua. Zelofehad ccanung hae min tuh: Mahlah, Noah, Hoglah, Milkah, te Tirzah nynh thua hae.

²Minmin nynh Moses, ranpibawi Eleazar, cciakhaetu hae te zapi balyn malang tungkunaw bu thuakaw kya thadyn hae zah,

³“Kae paaw tuh ramkaw kya a chih vae; aning tuh BAWIPAW rawsete pynkheihlan a sueluakuh hae paw Korah phu kya umbua khyh, thuasalama amaw seinaw keiccuze a chih; te ccapaw saah khyh.

⁴Ccapaw a saah khyh keiccuze kae paaw min tuh a phin kyate pawcce vua athua cih? Kae paaw a uno hae ryte ccoupaw uccaw oun pyabua oh,” a ci hae.

⁵Moses nynh minmin konglang kha BAWIPAW malang a thuakhae.

⁶Te BAWIPAW nynh Moses kha,

⁷“Zelofehad ccanung hae nynh a ho hae paw tuh ahmepaw nynh thua; mih paaw uno hae ryte rho kha na ccousah bua ccaccing cih hae zah, mih paaw rho kha na pya cih hae.

⁸Israel hae kha mah, ‘Ccapaw a hoi leipaw pise tuh a chi ze, a rho kha a ccanung kalan na pya cih oh.

⁹Ccanung a hoi khyh ze, a rho kha a uno hae kalan na pya cih oh.

¹⁰Uno a hoi khyh ze, a rho kha a paaw uno hae kalan na pya cih oh.

¹¹Te a paaw tuh uno a hoi khyh ze, a rho kha a phin kya-e anaekuh huapaw a puizia kalan na pya cih oh zah, tuh-e paw nynh a ccou cih. BAWIPAW nynh Moses kaw a pya thyhte tuh-e tuh Israel hae hanlan phungbya te phungzae athua cih,’ cite na hopah cih hae,” a cipya.

¹²BAWIPAW nynh Moses kha, “Hynh-e Abarim mua vawlan khuin kaethung lah, Israel hae ka pya hae paw ram khuh dotua.

¹³Khuh-e ram he na muih koute, nang mah na upaw Aaron hawte na ccungccaw hae kalan sueluabua na thua cih,

¹⁴pawccecize zapi hae nynh Zin ramkaw kya yn ccohnuaku lya hae ze, ka bya kha na dou. Minmin muihnaw kya, tui kyakhe athyaapaw ka thuanaw kha na langsakuh khyh,” a cipya. (E tui tuh Zin ramkaw kya umpaw Meribath-kadesh tui nynh thua.)

¹⁵Moses nynh BAWIPAW kha,

¹⁶“BAWIPAW , pynsaw balyn kya-e muisaw hae Pachia nynh BAWIPAW kya-e zapi hae tuh tuurintu a um leipaw tuu hae hawte athua khyh nawlan hae, zapi cciakhaetu lukhakheit, mih malang a cceih cih paw te mih malang a tee cih paw, minmin kha a poukhae cih hae paw te a teekhae cih hae paw kha nungpah hae sah,” a cipya.

¹⁸Tukeiccuze BAWIPAW nynh Moses kha, “A tungvaw kya muisaw umpaw Nun ccapaw Joshua kha ko lah, a tungvaw khe na kuih khangtua;

¹⁹amaw kha ranpibawi Eleazar te zapi balyn malang khe thadynsah lah, a muihnaw hae khe amaw kha kawhoinaw pyatua.

²⁰Israel zapi balyn nynh a kaw a ngae ccaw hae, na kawhoinaw abang kha amaw kalan na pya cih.

²¹Thuasalama ranpibawi Eleazar malang a thadyn cih zah, Eleazar nynh BAWIPAW malang Urim byapaenaw thyhte amaw hanlan byakhianaw kha a rae cih; amaw ryte Israel zapi balyn tuh amaw bya thyhte a pou cih hae zah amaw bya thyhte a tee cih hae,” a ci.

²²Tukeiccuze BAWIPAW nynh kaw a pya thyhte Moses nynh a cyi. Joshua kha ko zah ranpibawi Eleazar te zapi balyn malang khe a thadynsah;

²³BAWIPAW nynh Moses a hopya thyhte Moses nynh a kuih kha Joshua tungvaw khang zah kawhoinaw a pya.