Read Zotung Chin NAMBAR 28 Bible Online

NAMBAR 28 - Zotung Chin bible

NAMBAR 28

¹BAWIPAW nynh Moses kha hynhte a hopya:

²Israel hae kha kawpya hae lah, hynhte hopah hae: Kamaw kya-e silawnawpaw, maee te kamaw kalan silawnawpaw looh, kamaw kya-e mynkhuhpaw kha accyh khyapaw kyakhe kamaw kalan silaw lanpaw kha na raeringkuh cih oh.

³Te minmin kyakhe hynhte na hopah cih hae, E hynh BAWIPAW kalan si na law lan oh paw maee te silawnaw nynh thua: nin takyhte tyty silawnaw hanlan douccahpaw tuutaw pise kum kheit acihpaw sa ning.

⁴Awkhua kya tuutaw sa kheit khate si na law cih oh zah zetepakaw kya ccangpaw sa kheit khate si na law cih oh;

⁵ccathae silawnaw hanlan kha mah aphongkuhpaw oliv chitui hin kheit kya-e pum pali pum kheit te apykuhpaw vaekhui ephah ccangkheit kya-e pumhaw pumkheit khate si na law cih oh.

⁶E hynh tyty raepaw maee-ute silawnaw thua zah, Sinai Mua kya tynsah athuapaw BAWIPAW kalan amynkhuhpaw lante maee te silawnaw nynh thua.

⁷Niapaw silawnaw tuh tuutaw sa kheit cci hanlan misutui hin kheit kya-e pum pali pum kheit athua cih; beikinnthyaa kyakhe niapaw silawnaw kha BAWIPAW hanlan na bu cih.

⁸Ccangpaw tuutaw sa kheit khate zetepakaw khe, awkhua e silawnaw hawte ccathae silawnaw te niapaw silawnaw ryte si na law cih; BAWIPAW hanlan amynkhuhpaw lante maee te silawnaw kha na rae cih.

⁹Sabbath nin khe douccahpaw tuutaw pise kum kheit acihpaw sa ning te ccathae silawnaw hanlan chitui te pykuhpaw vaekhui ephah ccangkheit kya-e pum haw pum ning, te tuh-e niapaw silawnaw—

¹⁰tyty raepaw maee-ute silawnaw te niapaw silawnaw apiaze hynh-e hynh sabbath takyh hanlan maee-ute silawnaw nynh thua.

¹¹Nae sawpaw hae kya-e masaty nin hae kyakhe BAWIPAW kalan maee-ute silawnaw kha na rae cih oh: tangnuapaw anopaw sa ning, tuutepaw sa kheit, douccahpaw tuutaw pise kum kheit acihpaw sa sari;

¹²tangnuapaw anopaw sa kheit cci hanlan kha ccathae silawnaw elang chitui te apykuhpaw vaekhui ephah ccangkheit kya-e pum haw pum thum; te tuutepaw sa kheit hanlan kha ccathae silawnaw elang chitui te apykuhpaw vaekhui pum haw pum ning;

¹³te tuutaw sa kheit cci hanlan kha ccathae silawnaw lante chitui pykuhpaw vaekhui pumhaw pumkheit cci; e hynh mynkhuhpaw, maee-ute silawnaw BAWIPAW kalan maee te silawnaw nynh thua.

¹⁴Niapaw silawnaw hae tuh tangnuapaw sa kheit hanlan misutui hin kheit kya-e angankuh, tuutepaw sa kheit hanlan hin kheit kya-e pum thum pum kheit, te tuutaw sa kheit hanlan hin kheit kya-e pum pali pum kheit athua cih; e hynh akum kyaze sawpaw sah takyhte po raepaw maee-ute silawnaw nynh thua.

¹⁵Te BAWIPAW kalan seithyaanaw silawnaw hanlan miaatepaw sa kheit athua cih; tyty raepaw maee-ute silawnaw te niapaw silawnaw apiaze tuh-e tuhte silawnaw kha rae athua cih.

¹⁶Masaty sawpaw kya-e nin haw lae palinaw nin khe BAWIPAW kalan kawtaw poi silawnaw a um cih.

¹⁷Te hynh-e sawpaw nin haw lae pangawnaw nin tuh poi nynh thua; nin sari lungkhu ransi phing leipaw sanlou kha ae athua cih.

¹⁸Masaty nin khe athyaapaw pumkunaw a um cih. Ryalaw kha na lah lan khyh oh.

¹⁹BAWIPAW hanlan maee te silawnaw athuapaw maee-ute silawnaw kha na rae cih oh: tangnua anopaw sa ning, tuutepaw sa kheit te kum kheit acihpaw tuutaw pise sa sari athua cih hae zah, douccahpaw athua nawlan hae hoyte do oh.

²⁰Minmin kya-e ccathae silawnaw kha chitui te pykuhpaw vaekhui te rae athua cih: tangnua hanlan ephah ccangkheit kya-e pumhaw pumkheit, tuutepaw hanlan pum haw pum ning;

²¹tuutaw sa sari kya-e sa kheit cci hanlan pumhaw pumkheit cci khate si na law cih oh;

²²te nae hanlan seingaethyanaw raepya nawlan, seithyaanaw silawnaw kha miaatepaw sa kheit khate na rae cih oh.

²³Tyty raepaw maee-ute silawnaw te asekuhpaw awkhua kya maee-ute silawnaw apiaze hynh-e hae hynh mah na rae cih oh.

²⁴Hynh-e hawte nin sari lungkhu nin takyhte maee te silawnawpaw looh, BAWIPAW kalan mynkhuhpaw khate si na law cih oh; tyty raepaw maee-ute silawnaw te niapaw silawnaw apiaze tuh-e tuhte silawnaw kha rae athua cih.

²⁵Te nin sarinaw nin khe athyaapaw pumkunaw kha na rae cih oh; ryalaw na lah lan khyh oh.

²⁶Thaety nin khe, athawpaw ccathae kya-e ccathae silawnaw kha lonaw hae kya-e nae poi kyakhe BAWIPAW kalan he na rae oh te, athyaapaw pumkunaw kha na rae cih oh; ryalaw kha na lah lan khyh oh.

²⁷BAWIPAW kalan amynkhuhpaw, maee-ute silawnaw kha na rae cih oh: tangnua anopaw sa ning, tuutepaw sa kheit, kum kheit acihpaw tuutaw pise sa sari;

²⁸chitui te pykuhpaw vaekhui te raepaw mih ccathae silawnaw, tangnua sa kheit cci hanlan ephah ccangkheit kya-e pumhaw pumkheit cci, tuutepaw sa kheit hanlan pum haw pum ning,

²⁹tuutaw sa sari kya-e sa kheit cci hanlan pumhaw pumkheit cci;

³⁰nae hanlan seingaethyanaw raepya nawlan, miaatepaw sa kheit khate si na law cih oh.

³¹Tyty raepaw maee-ute silawnaw te ccathae silawnaw apiaze, hynh-e hae ryte mih kya-e niapaw silawnaw kha na rae cih oh. Tuh-e hae tuh douccahpaw athua cih hae.