Read Zotung Chin NAMBAR 3 Bible Online

NAMBAR 3 - Zotung Chin bible

NAMBAR 3

¹BAWIPAW nynh Moses kha Sinai Mua vawlan bya a hopya lyaze, e hae hynh Aaron te Moses ccaawno hae nynh thua hae.

²E hae tuh Aaron ccapaw hae min nynh thua: Ccatawccaw Nadab, te Abihu, Eleazar te Ithamar;

³e hae tuh ranpibawi lante ordain pya thua hae zah, chitui thuh athuapaw ranpibawi hae, Aaron ccapaw hae min nynh thua.

⁴Nadab te Abihu tuh Sinai ramkaw khe athyaa leipaw maee kha BAWIPAW malang he a pya hae tuh, BAWIPAW malang khe phe a chih hae, minmin tuh ccaawno hoi khyh hae. Eleazar te Ithamar tuh mih paaw Aaron a hiin lyakhe ranpibawi rya a lah hae.

⁵Oute BAWIPAW nynh Moses kha hynhte a hopya:

⁶Levi phin hae nynh Aaron kha a bawm ccaw hae, minmin kha cciakhae hae lah, ranpibawi Aaron malang khe thuakhae hae.

⁷Minmin nynh tungkunaw bu malang khe Aaron elang te zapi balyn hanlan ryalawpyate beikbu kyakhe rya a lah cih hae;

⁸minmin tuh tungkunaw bu accinccang balyn kha a do-oihtu athua cih hae zah, beikbu kya ryalawbia te Israel hae elang rya a lawpah cih hae.

⁹Levi phin hae kha Aaron te a ccapaw hae kalan na pya cih hae; Israel hae laku kyate minmin kha Aaron kalan khaleih mawte pya athua hae.

¹⁰Aaron te a ciihan hae kha ryalaw na pya cih hae zah, ranpibawi rya kha a lah cih hae, atolang e ccangpaw ccungccaw a naekuhpaw tuh chia athua cih.

¹¹BAWIPAW nynh Moses kha hynhte a hopya:

¹²Israel hae laku kyaze ccatawccaw balyn ccelang Israel hae laku kyate Levi phin hae kha ka law vae hae. Levi phin hae tuh kamaw kya-e athua cih hae,

¹³pawccecize ccatawccaw balyn te thanty balyn tuh kamaw kya-e nynh thua; Izip ram kya ccatawccaw balyn kha ka chia lyaze Israel hae kya tuh ccungccaw thuasah, sahiinpaw thuasah ccatawccaw balyn te thanty balyn kha kamaw elang ka thyaasah; minmin tuh kamaw kya-e athua cih hae. Kae tuh BAWIPAW nynh ka thua.

¹⁴Oute BAWIPAW nynh Moses kha Sinai ramkaw khe hynhte a hopya:

¹⁵Levi phin hae kha puizia te thuasah, phin te thuasah milu ria hae. Sawpaw sah kheit te palung lang pise miakaw kha na ria cih.

¹⁶Tukeiccuze Moses nynh BAWIPAW bya thyhte, a tungvaw kawpya athua hawte minmin kha a ria hae.

¹⁷Akawlan e hae hynh mih min thyhte Levi ccapaw hae nynh thua: Gershon, Kohath te Merari.

¹⁸E hae hynh mih phin thyhte Gershon ccapaw hae min nynh thua: Libni te Shimei.

¹⁹Kohath ccapaw hae tuh mih phin thyhte: Amram, Izhar, Hebron te Uzziel nynh thua hae.

²⁰Merari ccapaw hae tuh mih phin thyhte: Mahli te Mushi nynh thua hae. E hae tuh mih puizia thyhte Levi phin nynh thua hae.

²¹Gershon kyate a tho hae paw tuh Libni phin te Shimei phin nynh thua hae. E hae tuh Gershon phin nynh thua hae.

²²Sah kheit te palung lang pise miakaw milu ria athua hae paw tuh thong sari za pangaw acih hae.

²³Gershon phin hae tuh beikbu anulang, niccaw langkhe ryahmin a tahkuh cih hae,

²⁴Gershon phin hae kyaze lupi tuh Lael ccapaw Eliasaph nynh thua.

²⁵Tungkunaw bu kyaze Gershon ccapaw hae ryalaw tuh beikbu do-oihpaw kha athua cih, bu te tuh-e kya adawkuhpaw, tungkunaw bu thuakaw kya zopaw boei,

²⁶voidu kya zopaw boei hae, beikbu te silawhang pe umpaw voidu thuakaw kya zopaw boei, te a rui hae—e hae te akyngkuhpaw ryalaw balyn kha nynh thua.

²⁷Kohath kyate a tho hae paw tuh Amram phin, Izhar phin, Hebron phin te Uzziel phin nynh thua hae; e hae tuh Kohath phin nynh thua hae.

²⁸Sah kheit te palung lang pise balyn ria athua hae paw, beikinnthyaa a do-oih hae paw tuh thong tarya za taruh acih hae.

²⁹Kohath phin hae tuh beikbu alia langkhe ryahmin a tahkuh cih hae,

³⁰Kohath phin hae kyaze lupi tuh Uzziel ccapaw Elizafan nynh thua.

³¹Mih ryalaw tuh byakin thingkua, ccaboi, maeekhuatung, silawhang hae, ranpibawi ryalawnawpaw beikinnthyaa accinccang hae te zokhawpaw boei—e hae te akyngkuhpaw ryalaw balyn kha nynh thua.

³²Ranpibawi Aaron ccapaw Eleazar tuh Levi phin hae kya-e cciakhaetu hae kyaze lupi athua cih zah, beikinnthyaa a do-oihtu hae kha a uktu athua cih.

³³Merari kyate a tho hae paw tuh Mahli phin te Mushi phin nynh thua hae: e hae tuh Merari phin nynh thua hae.

³⁴Sah kheit te palung lang pise balyn ria athua hae paw tuh thong taruh za ning acih hae.

³⁵Merari phin hae kyaze lupi tuh Abihail ccapaw Zuriel nynh thua; minmin tuh beikbu palung langkhe ryahmin a tahkuh cih hae.

³⁶Merari ccapaw hae kya pya athuapaw ryalaw tuh beikbu pang hae, pangccaw hae, tung hae, ccusy hae, te hynh-e hae te asekuhpaw accinccang balyn—e hae te akyngkuhpaw ryalaw balyn kha nynh thua;

³⁷voidu tung hae, te mih ccusy hae te ccong hae te arui hae kha mah minmin ryalaw athua cih.

³⁸Beikbu malang nithua lang, tungkunaw bu malang nithua lang hawi langkhe ryahmin a tahkuh cih hae paw tuh Moses, Aaron te a ccapaw hae athua cih hae, beikinnthyaa lungkhu Israel hae elang cyi lanpaw phungzae miakaw kha minmin nynh a cyih cih hae; atolang e ccangpaw lukhakheit a naekuhpaw tuh chia athua cih.

³⁹BAWIPAW nynh kaw a pya hae thyhte, Moses te Aaron nynh mih phin thyhte, sah kheit te palung lang pise balyn a ria hae paw Levi phin hae tuh thong kuin lae ning acih hae.

⁴⁰Oute BAWIPAW nynh Moses kha, “Israel hae kya-e sah kheit te palung lang ccatawccaw pise balyn kha ria hae lah, mih min lawtua hae.

⁴¹Thuasalama Levi phin hae kha tuh kamaw elang min na lah cih hae—kae tuh BAWIPAW nynh ka thua—Israel hae laku e ccatawccaw balyn ccelang thuasah, Levi phin hae sahiin-awvaw hae kha Israel hae sahiin-awvaw kya-e thanty balyn ccelang thuasah na lah cih hae,” a cipya.

⁴²Tukeiccuze BAWIPAW nynh kaw a pya thyhte Moses nynh Israel hae kya-e ccatawccaw balyn kha a ria hae.

⁴³Sah kheit te palung lang ccatawccaw pise balyn tuh mih min thyhte thong kuin lae ning za ning sung sari lu thum acih hae.

⁴⁴Oute BAWIPAW nynh Moses kha hopah zah:

⁴⁵“Levi phin hae kha Israel hae kya-e ccatawccaw balyn ccelang thuasah, Levi phin hae sahiin-awvaw kha Israel hae sahiin-awvaw hae ccelang thuasah lah hae; Levi phin hae tuh kamaw kya-e athua cih hae. Kae tuh BAWIPAW nynh ka thua.

⁴⁶Levi phin hae laeze alunghua hae paw Israel ccatawccaw hae za ning sung sari lu thum kha shawkhawnaw mee tuh,

⁴⁷lu kheit ze shekel ccangpangaw cci na lah cih, beikinnthyaa kya-e shekel thyhte shekel ccangkheit ze kerah ccangkuin nynh thua.

⁴⁸Alaepaw Israel hae shawkhawnawpaw phua kha Aaron te a ccapaw hae kalan na pya cih,” a cipya.

⁴⁹Tukeiccuze Israel ccatawccaw hae kha Levi phin hae khate shaw hae zah, alae ung hae paw ccatawccaw hae shawkhawnawpaw phua kha Moses nynh a law;

⁵⁰Israel ccatawccaw hae kyate, shekel thong kheit za thum sung taruh ccangpangaw kha a law, tuh-e tuh beikinnthyaa kya-e shekel thyhte riapaw nynh thua;

⁵¹te Moses nynh shawkhawnawpaw phua kha, BAWIPAW bya thyhte, BAWIPAW nynh Moses kha kaw a pya hawte, Aaron te a ccapaw hae kha a pya hae.