Read Zotung Chin NAMBAR 31 Bible Online

NAMBAR 31 - Zotung Chin bible

NAMBAR 31

²“Israel hae hanlan Midian hae tungvaw phulawnaw kha raetua; tukoute na ccungccaw hae kalan sueluabua na thua cih,” a cipya.

³Tukeiccuze Moses nynh ccungccaw hae kha, “Midian hae tungvaw BAWIPAW phulawnaw kha rae khylan minmin kha ccianua lan, nanning abang nynh rhawtuknaw lanpaw zunghe kha ccyngkuh oh.

⁴Israel phin phinkheit cci kyate ccungccaw thong kheit cci kha rhawtuknaw kalan na saw cih hae,” a cipya.

⁵Tukeiccuze Israel hae athong patae kya-e phin kheit cci kyate ccungccaw thong kheit cci kha po hae zah, ccungccaw thong haw lae ning tuh rhawtuknaw lanpaw zunghe a kyng hae.

⁶Moses nynh phin kheit cci kyate ccungccaw thong kheit cci kha thuasah, ranpibawi Eleazar ccapaw Finehas kha a kuih kya umpaw beikinnthyaa kya-e angphe hae te raeringnaw roi ccaesahnawpaw mungkae hae ryte thuasah rhawtuknaw kalan a saw hae.

⁷BAWIPAW nynh Moses kaw a pya thyhte minmin nynh Midian hae kha tuk hae zah pise miakaw kha a chia hae.

⁸A chia hae paw kyatuin Midian siapharan lu pangaw hae: Evi, Rekem, Zur, Hur te Reba kha mah a chiabua hae. Tuh-e a chia hae paw apiaze Beor ccapaw Balaam kha mah tangpaw te phe chia hae.

⁹Israel hae nynh Midian nopi hae te mih imua hae kha a kyng hae; mih vaetua phu balyn, mih tuuphu hae te mih uccaw hae balyn kha a lua hae.

¹⁰A umnaw hae mih khua hae balyn te mih ryahmin balyn kha maee te a soipya hae,

¹¹a kyng hae paw balyn te a luade hae paw balyn, ccungccaw thuasah, sahiinpaw thuasah khaleih a lawku hae.

¹²Tetuh a kyng hae paw, a lua hae paw te a lawde hae paw kha Jeriko khua kya, Jordan vaw kin umpaw Moab bialae mih ryahmin kya um hae paw Moses, ranpibawi Eleazar te Israel zapi hae kalan a thuakhae hae.

¹³Moses, ranpibawi Eleazar te zapi cciakhaetu hae balyn tuh minmin ryte tungku khylan ryahmin atolang a cceih hae.

¹⁴Moses tuh rhawtuknaw kyate oun thua hae paw rhawbawi hae, milu athong uktu hae te azah uktu hae tungvaw a thinria.

¹⁵Moses nynh minmin kha, “Nopi hae balyn hynh na hiin oh tou?

¹⁶E nopi hae nynh Balaam kya-e tuanaw kha lawkute Israel hae kha Peor khozi kya BAWIPAW rawsete seinaw a raesah hae, tukeiccuze BAWIPAW ccungccaw hae kya shethya nynh a thuanua hae.

¹⁷Tukeiccuze pise taraw miakaw kha theih oh lah, pise te a ihkheih boi vae paw nopi miakaw kha theih oh.

¹⁸Thuasalama pise te a ihkheih boi leipaw liaccaw balyn kha tuh naemaw hanlan hiinkuh oh.

¹⁹Ryahmin atolang khe nin sari um oh; nanning lakuze ccungccaw a theihpaw miakaw te michi rhua a typaw miakaw nynh naemaw te naemaw kha thuasah, na kyng oh paw kha thuasah nin thumnaw nin te nin sarinaw nin khe thyaasah oh.

²⁰Boeining miakaw, saphua te raepaw uccaw miakaw, miaa ming te raepaw uccaw miakaw te thing te raepaw uccaw miakaw kha na thyaasah cih oh,” a cipya hae.

²¹Ranpibawi Eleazar nynh rhawtuk lan a cceihpaw rhawkaw phu hae kha: “E hynh BAWIPAW nynh Moses kaw a pyapaw upadi kya-e phungbya nynh thua:

²²sui, ngun, sohin, sivaw, ccephui, kue—

²³maee kya a khe khopaw miakaw kha maee lungkhu na phung cih oh zah a thyaa cih hae. Tuhzemah thyaasahnawpaw tui te mah thyaasah athua cih zah maee kya a khe kho leipaw miakaw kha tuh tui kya dung athua cih.

²⁴Nin sarinaw nin khe nae boeining kha na sukuh cih oh zah na thyaa cih oh; tukoute ryahmin lungkhu lang na tee cih oh,” a cipya hae.

²⁵BAWIPAW nynh Moses kha hynhte a hopya:

²⁶“Nang, ranpibawi Eleazar te zapi lungkhu e puizia raveih kya-e lupi hae nynh kyngpaw te luadepaw ccungccaw te sahiinpaw kha asasite ria oh.

²⁷Luadepaw uccaw hae kha rhawtuknaw lang a cceih hae paw hanlan te zapi balyn hanlan cite phu ning lang phia oh.

²⁸Rhawtuknaw lang a cceih hae paw rhawkaw hae nynh a ccou hae paw kya-e BAWIPAW nynh a ccou lanpaw kha ccungccaw thuasah, tangnuapaw thuasah, lann thuasah, tuu thuasah, tuhkhyhze miaa thuasah, za pangaw kyaze sa kheit, ccungccaw athua ze lu kheit kha na phia cih.

²⁹Minmin nynh a ccou hae paw angankuhpaw kya-e kha na lah cih oh zah BAWIPAW hanlan silawnawpaw lante ranpibawi Eleazar kalan na pya cih oh.

³⁰Thuasalama Israel hae nynh a ccou hae paw angankuhpaw kya-e kha ccungccaw thuasah, tangnuapaw thuasah, lann thuasah, tuu thuasah, tuhkhyhze miaa thuasah, sahiinpaw balyn, sung pangaw kyaze lu kheit, sahiin athua ze sa kheit kha na lah cih zah BAWIPAW beikbu a do-oihtu Levi phin hae kalan na pya cih hae,” a cipya.

³¹BAWIPAW nynh Moses kaw a pya thyhte, Moses te ranpibawi Eleazar nynh a cyi hae:

³²Rhawkaw hae nynh a lua kou hae te, alae ungpaw tuh tuu cciing taruh thong sung sari thong pangaw,

³³tangnuapaw sung sari thong ning,

³⁴lann sung taruh thong kheit,

³⁵pise te a ih boi leipaw nopi hae, ccungccaw abalyn tuh sung thum thong ning acih.

³⁶Rhawtuknaw lang a cceih hae paw nynh a ccou hae paw, a luade hae paw kya-e angankuh tuh tuu te miaa cciing thum sung thum thong sari za pangaw thua zah,

³⁷BAWIPAW nynh a ccou lanpaw tuh tuu te miaa za taruh sung sari sa pangaw acih.

³⁸Tangnuapaw hae tuh sung thum thong taruh cih zah, BAWIPAW nynh a ccou lanpaw tuh sung sari sa ning acih.

³⁹Lann tuh thong sung thum za pangaw cih zah, BAWIPAW nynh a ccou lanpaw tuh sung taruh sa kheit acih.

⁴⁰Ccungccaw hae tuh thong haw lae taruh cih zah, BAWIPAW nynh a ccou lanpaw tuh sung thum lu ning acih.

⁴¹BAWIPAW nynh Moses kaw a pya thyhte, Moses nynh BAWIPAW kalan silawnawpaw kha ranpibawi Eleazar kalan a pya.

⁴²Rhawkaw hae kyate Moses nynh Israel hae hanlan a phiapya hae paw angankuh tuh—

⁴³zapi hae nynh a ccou hae paw angankuhpaw kya-e tuu tuh cciing thum sung thum thong sari za pangaw,

⁴⁴tangnuapaw sung thum thong taruh,

⁴⁵lann thong sung thum za pangaw,

⁴⁶te ccungccaw thong haw lae taruh acih.

⁴⁷Israel hae nynh a ccou hae paw angankuhpaw kya-e kha ccungccaw thuasah, sahiinpaw thuasah sung pangaw kyaze lu kheit, sahiin athua ze sa kheit kha Moses nynh lah zah BAWIPAW beikbu a do-oih hae paw Levi phin hae kalan a pya hae; tuh-e tuh BAWIPAW nynh Moses kaw a pya thyhte nynh thua.

⁴⁸Oute athong thong te uktupaw rhawbawi hae, athong te uktupaw rhawbawi hae te aza te uktupaw rhawbawi hae nynh Moses kalan oun naekuh hae zah,

⁴⁹Moses kha, “Na see hae kaening nynh kae kuihkaw umpaw rhawkaw hae kha kae ria hae zah lu kheit sanmah zo khyh.

⁵⁰Kaening lu kheit cci nynh kae muepaw BAWIPAW kya-e ahlu sui uccaw hae, kuihnaw hae, khawccan hae, tazeih kuihpu hae, nakuahuing hae te si alungmung hae kha BAWIPAW malang kaening hanlan seingaethyanaw raepya nawlan kae thuakhae vae,” a cipya hae.

⁵¹A rae kou vae hae paw sui uccaw balyn kha Moses te ranpibawi Eleazar nynh minmin kyate a law hae.

⁵²Rhawkaw athong uktupaw rhawbawi hae te aza uktupaw rhawbawi hae nynh BAWIPAW kalan a hlu hae paw silawnawpaw sui tuh shekel thong haw lae taruh za sari sung pangaw acih.

⁵³(Rhawkaw hae nynh a lua hae paw balyn kha mimaw lu kheit cci hanlan a lawku hae.)

⁵⁴Te Moses te ranpibawi Eleazar nynh athong uktupaw rhawbawi hae te aza uktupaw rhawbawi hae kyate sui kha lah hae zah, BAWIPAW malang Israel hae hanlan syntawnaw lante tungkunaw bu lungkhu lang oun ccyng hae.