Read Zotung Chin NAMBAR 32 Bible Online

NAMBAR 32 - Zotung Chin bible

NAMBAR 32

¹Reuben phin hae te Gad phin hae tuh sahiin-awvaw pataepi a hoi hae. Jazer ram te Gilead ram tuh sahiin-awvaw hanlan myarya hoy cipaw minmin nynh he a muih hae tuh,

²Gad phin hae te Reuben phin hae nynh Moses, ranpibawi Eleazar te zapi cciakhaetu hae kalan oun cceih hae zah,

³“Ataroth, Dibon, Jazer, Nimrah, Heshbon, Elealeh, Sebam, Nebo, te Beon ram hae,

⁴BAWIPAW nynh Israel zapi malang a taepaw tuh-e ram hae tuh sahiin-awvaw hanlan ahoypaw ram nynh thua; te nae see hae kaening nynh sahiin-awvaw kae hoi,” a cipya hae.

⁵Te minmin nynh, “Nae malang maehoynaw kae mue zetuh, e ram hynh nae see hae kaening oun pya oh; kaening hynh Jordan vaw khuraw lang oun zua sah nan oh,” a cipya hae.

⁶Thuasalama Moses nynh Gad phin te Reuben phin kha, “Nae uno hae nynh rhawtuknaw lang a ccia lya hae khe, nanning tuh hein kya tou na dahung cih oh?

⁷BAWIPAW nynh a pya hae paw ram lungkhu lang Israel hae nynh a tee lan hae paw kha pawcce mih lungthaw na zya sah cih oh?

⁸Kadesh-barnea kyate tuh-e ram dosah khylan nae paaw hae kha he ka saw hae tuh, minmin nynh hynhcite a cyi hae.

⁹Eshkol Accya lang kaethung hae zah ram kha he a muih hae tuh, BAWIPAW nynh a pya hae paw ram lungkhu lang Israel hae nynh a tee lan hae paw kha minmin nynh mih lungthaw a zyasah hae.

¹⁰Tuh-e nin khe BAWIPAW thinrianaw tuh maee lang rua zah, thyalaw te,

¹¹‘Izip ram kyate a poupaw ccungccaw hae, kum kuin te palung lang nynh kamaw kha yn zui ccaccing khyh hae keiccuze, Abraham, Isak te Jakob kya kae pya cih oh cite bya ka kinpyaku hae paw ram kha muih ccaccing lan khyh hae—

¹²Keniz phin Jefunneh ccapaw Kaleb te Nun ccapaw Joshua laelan, minmin nynh BAWIPAW kha a zui ccaccing khyh keiccu hae ze muih lan khyh hae,’ a ci.

¹³Te Israel hae tungvaw BAWIPAW thinrianaw tuh maee lang rua zah, BAWIPAW muihnaw kya hoyleinaw a raepaw ccungccaw hae balyn pong a zo mawlaezung hae, ramkaw kya kum sung pali lungkhu a khiavuisahku hae.

¹⁴Te atu, misei phu nanning, Israel tungvaw kya BAWIPAW thin kha houh riasah khylan, nae paaw hae ccelang nae thokuh vae oh!

¹⁵Nanning nynh BAWIPAW zuinaw kyate ccanglang na maeku oh zetuh, minmin kha ramkaw kya bua a vua cih hae; te hynh-e ccungccaw balyn hynh na roh vae cih oh,” a cipya hae.

¹⁶Tetuh minmin nynh Moses kalan oun cceihthung hae zah, “E kyahin kae tuuphu hae hanlan tuukhia te kae imua hae hanlan khua kha kae raepah cih hae,

¹⁷thuasalama Israel hae kha mih umnaw hmin kya kae thuakhae makhia hae, zunghe ccyngkute minmin malang laan kae maw cih. Tuh ccyh lyatuin, hynh-e ram e ccungccaw hae kyate khyn khylan, kae imua hae tuh akoihkhawkuhpaw khua kya a um cih hae.

¹⁸Israel hae balyn nynh mih rho kha a ccou mawlaezung hae, kae inn lang kae ki lan khyh.

¹⁹Kaening nynh minmin ryte Jordan vaw khuhlang raw te akhung lang kha rho lang kae ccoubua lan khyh, pawccecize kaening rho tuh Jordan vaw hynhlang raw, nithua lang nynh athua vae,” a cipya hae.

²⁰Tukeiccuze Moses nynh minmin kha, “E hynh na cyi oh ze—BAWIPAW malang rhawtuk lan zunghe ccyngkute na ccia oh ze thuasah,

²¹BAWIPAW nynh rhaw hae kha amaw malang te a dee makhia hae, zunghe a ccyngkuhpaw nanning balyn nynh BAWIPAW malang khe Jordan vaw kha na zua oh ze thuasah,

²²tuh-e ram tuh BAWIPAW malang tae athua koute na ki cih oh zah BAWIPAW kya te Israel hae kya laebah na um vae lan khyh oh, te hynh-e ram hynh BAWIPAW malang na hoi oh paw ram lang a tang cih.

²³thuasalama e hynh na cyi khyh oh zetuh, BAWIPAW malang na sei vae oh; te nae seinaw nynh ae ccung cih oh zah ae muih cih oh.

²⁴Nae imua hae hanlan khua hae kha rae oh lah, nae tuu hae hanlan tuukhia hae kha rae oh; thuasalama bya na kinku oh paw kha cyih oh,” a cipya hae.

²⁵Oute Gad phin te Reuben phin hae nynh Moses kha, “Ka bawipaw nynh kaw nae pya thyhte, na see hae nynh kae cyih cih.

²⁶Kae imua hae, kae zu hae, kae tuu hae te kae sahiin-awvaw hae balyn tuh Gilead ram e khua hae kyakhuin a la um cih hae;

²⁷thuasalama zunghe a ccyngpaw na see hae miakaw nynh bawipaw nang nynh kaw nae pya thyhte, BAWIPAW hanlan rhawtuk khylan khuhlang raw kae zua cih,” a ci hae.

²⁸Tukeiccuze minmin te asekuh lante Moses nynh ranpibawi Eleazar, Nun ccapaw Joshua te Israel minphuin hae kyaze thokeinaw raveih kya-e lupi hae kha kaw a pya hae.

²⁹Te Moses nynh minmin kha, “Gad ciihan te Reuben ciihan hae kyaze BAWIPAW malang rhawtuk khylan zunghe a ccyngkuhpaw miakaw tuh nanning ryte Jordan vaw kha na zua cih oh zah, nanning malang khe ram kha tae athua zetuh, Gilead ram kha minmin nynh a hoi hae paw ram lang na pya cih oh;

³⁰thuasalama minmin nynh zunghe ccyngkute nanning ryte vaw kha a zua khyh hae zetuh, Kanaan ram kya nanning laku khe ram a hoibua cih hae,” a cipya hae.

³¹Gad ciihan te Reuben ciihan hae nynh, “BAWIPAW nynh na see hae kya a ho vae hawte, kaening nynh kae cyih cih.

³²BAWIPAW malang khe zunghe ccyngkute Kanaan ram lungkhu lang po kae cceih cih, thuasalama kae ccou lanpaw kae rho tuh Jordan vaw hynhlang raw athua cih,” a ci hae.

³³Moses nynh Gad phin, Reuben phin te Josef ccapaw Manasseh phin angankuh kalan—Amor hae siapharan Sihon peenaw te Bashan siapharan Og ram, hynh-e ram hae kya umpaw khuapi hae te mih pepan e khua hae kha a pya hae.

³⁴Te Gad phin hae nynh Dibon, Ataroth, Aroer,

³⁵Atroth-shofan, Jazer, Jogbehah,

³⁶Beth-nimrah te Beth-haran, akoihkhawkuhpaw khuapi hae te tuu hae hanlan tuukhia hae kha a raethui hae.

³⁷Te Reuben phin hae nynh Heshbon, Elealeh, Kiriathaim,

³⁸Nebo te Baal-meon abang min hae tuh rulae athua vae, te Sibmah kha a raethui hae; a raethui hae paw khua hae kha min thawpaw a phu hae.

³⁹Manasseh ccapaw Makhir phin hae nynh Gilead lang cceih hae zah khah-e khua kha a law hae, tuin kya a la um hae paw Amor hae kha a dee hae;

⁴⁰tukeiccuze Moses nynh Gilead tuh Manasseh ccapaw Makhir kha pya zah tuin kya a um.

⁴¹Manasseh ccapaw Jair nynh cceih zah mih khua taraw hae kha lah hae zah, Havvoth-jair cite min a phuthui hae.

⁴²Te Nobah nynh cceih zah Kenath te a khua taraw hae kha lah hae zah, amaw min kha leete Nobah cite min a phuthui.