Read Zotung Chin NAMBAR 34 Bible Online

NAMBAR 34 - Zotung Chin bible

NAMBAR 34

¹BAWIPAW nynh Moses kha hynhte a hopya:

²Israel hae kha kawpya hae lah hynhte hopah hae: Nanning nynh Kanaan ram kya he na tee oh te (e ram tuh ramri ia athuapaw Kanaan ram thua zah rho lang na ccou cih oh paw ram nynh thua),

³ram alia lang tuh Zin ramkaw kyate Edom loukaw cia athua cih. Alia lang e nae ramri tuh Rili Chihpaw adianaw nithua lang kyate atho cih;

⁴nae ramri tuh Akrabbim yn kaethungnaw alia langkhe maekute Zin cia athua cih zah, adianaw tuh Kadesh-barnea alia langkhe athua cih; oute Hazar-addar lang a cceih cih zah Azmon cia athua cih;

⁵ramri tuh Azmon kyate Izip Vawkhu lang a maeleihkuh cih zah adianaw tuh Rili kya athua cih.

⁶Niccaw lang e ramri tuh Rili Lepaw te a kin cia athua cih; e hynh niccaw lang e nae ramri athua cih.

⁷Palung lang e nae ramri tuh: Rili Lepaw kyate Hor Mua kyacia athua cih;

⁸Hor Mua kyate Lebo-hamath langkhe a cceih cih zah, ramri adianaw tuh Zedad kya athua cih;

⁹oute ramri tuh Zifron kyacia athua cih zah adianaw tuh Hazar-enan kya athua cih; e hynh palung lang e nae ramri athua cih.

¹⁰Nithua lang e nae ramri tuh Hazar-enan kyate Shefam kyacia athua cih;

¹¹ramri tuh Shefam kyate Ain nithua lang umpaw Riblah cia po a cceihbung cih; te ramri tuh a cceihbung cih zah Khinnereth rili nithua lang raw cia athua cih;

¹²ramri tuh Jordan langkhe a cceihbung cih zah adianaw tuh Rili Chihpaw kya athua cih. E tuh nae ram po voilupaw ramri hae athua cih.

¹³Moses nynh Israel hae kha hynhte kaw a pya hae: E hynh nanning nynh ccungthydungte na ccou cih oh paw ram, BAWIPAW minphuin phin takua te angankuh hanlan pya lan kaw a pya vae paw ram nynh thua;

¹⁴Pawccecize Reuben phin te Gad phin tuh mih puizia thyhte mih rho kha a lawkuh vae hae, te Manasseh phin angankuh nynh mah rho a lawkuh vae hae;

¹⁵Phin phinning te angankuh nynh mih rho athuapaw Jordan vaw akhung lang Jeriko nithua lang, khuanin a thuanaw lang kha a lawku vae hae.

¹⁶BAWIPAW nynh Moses kha hynhte a hopya:

¹⁷Ram kha rho lang ae nee cih oh paw ccungccaw hae min tuh ranpibawi Eleazar te Nun ccapaw Joshua nynh thua hae.

¹⁸Ram kha rho lang neenaw kyaze a bawmtu lang hae, phin takyh kya-e cciakhaetu lu kheit cci kha na ko cih hae.

¹⁹E hae hynh tuh-e ccungccaw hae min nynh thua: Judah phin kyate Jefunneh ccapaw Kaleb.

²⁰Simeon phin kyate Ammihud ccapaw Shemuel.

²¹Benjamin phin kyate Khislon ccapaw Elidad.

²²Dan phin kyate cciakhaetu lu kheit, Efod ccapaw Hanniel.

²³Josef phin kya-e Manasseh phin kyate cciakhaetu lu kheit, Efod ccapaw Hanniel,

²⁴te Efraim phin kyate cciakhaetu lu kheit, Shiftan ccapaw Kemuel.

²⁵Zebulun phin kyate cciakhaetu lu kheit, Parnak ccapaw Elizafan.

²⁶Issakhar phin kyate cciakhaetu lu kheit, Azzan ccapaw Paltiel.

²⁷Te Asher phin kyate cciakhaetu lu kheit, Shelomi ccapaw Ahihud.

²⁸Naftali phin kyate cciakhaetu lu kheit, Ammihud ccapaw Pedahel.

²⁹E hae tuh Kanaan ram kya Israel hae kha rho nee lan BAWIPAW nynh kawpya hae paw nynh thua hae.