Read Zotung Chin NAMBAR 35 Bible Online

NAMBAR 35 - Zotung Chin bible

NAMBAR 35

¹Moab bialae, Jordan vaw kin, Jeriko khua khe BAWIPAW nynh Moses kha hynhte a hopya:

²Israel hae nynh rho lang a ccou hae paw ram kya umpaw khua hae kha Levi phin hae nynh a um nawlan hae pya khylan Israel hae kha kawpya hae; khua hae po avoilupaw sahiin apaenaw ram hae kha mah Levi phin hae kalan na pya cih hae.

³Khua hae tuh minmin a um nawlan hae athua cih zah, mih sahiin apaenaw ram hae tuh mih vaetua hae, mih sahiin-awvaw hae te mih sarangpaw hae balyn hanlan athua cih.

⁴Levi phin hae kalan na pya cih hae paw khua hae kya-e sahiin apaenaw ram hae tuh khualungrua kyate atolang dong thong kheit po voilu lan ako cih.

⁵Khua atolang kha na tou cih, nithua lang dong thong ning, alia lang dong thong ning, niccaw lang dong thong ning, palung lang dong thong ning athua cih zah khua tuh angaelung khe a um cih; e hynh mih khua hae hanlan sahiin apaenawpaw mih ram athua cih.

⁶Levi phin hae kalan na pya hae paw khua hae tuh ccungccaw a theihpaw nynh a ccue nawlan na ua cih paw, khynnaw khuapi khua taruh athua cih hae, tuh-e khuapi hae apiaze khua sung pali khua ning kha na pya cih hae.

⁷Levi phin hae kalan na pya hae paw khua hae tuh mih sahiin apaenaw ram hae ryte, abalynte sung pali khua tarya acih cih.

⁸Te Israel hae nynh a hoi hae paw kyate na pya lan hae paw khua hae tuh, phin kya-e ccungccaw alung huapaw kyate patae na lah cih zah phin adih huapaw kyate azya na lah cih; lu kheit cci nynh a ccou hae paw rho alung azya thyhte mih khua hae kya-e kha Levi phin hae kalan a pya cih hae.

⁹BAWIPAW nynh Moses kha hynhte a hopya:

¹⁰Israel hae kha hynhte hopah hae: Nanning nynh Jordan vaw na zua oh zah, Kanaan ram lungkhu lang he na tee oh te,

¹¹tuaku ty leite ccungccaw a theihsei hae paw nynh a ccue nawlan hae, nae hanlan khynnaw khuapi hae kha na po cih oh.

¹²Zapi malang byapianaw a um makhia ccungccaw a theihtupaw tuh a chi khyh nawlan, tuh-e khuapi hae tuh nae hanlan liarutu kyate khynnaw athua cih.

¹³Na pya oh paw khua hae tuh nae hanlan khynnawpaw khuapi khua taruh athua cih hae:

¹⁴khynnawpaw khuapi hae tuh Jordan vaw nithua lang e khuapi khua thum te Kanaan ram kya umpaw khuapi khua thum athua cih.

¹⁵E khuapi khua taruh tuh Israel hae hanlan thuasah, minmin kya khuasah hae paw te sohsoh a umpaw ramccang ccungccaw hanlan thuasah rekunaw athua cih, tuaku ty leite ccungccaw a theihseipaw nynh tuh-e khuapi hae kalan a ccue cih.

¹⁶Thuasalama sivawhaelua te ccungccaw kha bua zah a chisahpaw tuh ccungccaw a theihpaw nynh thua; ccungccaw a theihpaw tuh chia athua cih.

¹⁷Tuhkhyhze ccungccaw a chisah khopaw a kuih kya-e lung khate ccungccaw kha deih zah a chisahpaw tuh ccungccaw a theihpaw nynh thua; ccungccaw a theihpaw tuh chia athua cih.

¹⁸Tuhkhyhze ccungccaw a chisah khopaw a kuih kya-e thing te raepaw zunghe khate ccungccaw kha bua zah a chisahpaw tuh ccungccaw a theihpaw nynh thua; ccungccaw a theihpaw tuh chia athua cih.

¹⁹Chiise phu a lahpaw nynh ccungccaw a theihtupaw kha a theih cih; he a tungkuh hae te, phu a lahpaw nynh a theih cih.

²⁰Tuhawte lukhakheit nynh ccungccaw kha a hua keiccuze dou a tu ze thuasah, tuhkhyhze buhkhaw zah ccangkhakheit te a deih ze thuasah, a chi lanze,

²¹tuhkhyhze a hua keiccuze a kuih te thung zah a chi lanze, tuh-e a thungtupaw tuh chia athua cih; aning tuh ccungccaw a theihpaw nynh thua; chiise phu a lahtupaw nynh he a tungkuh hae te, ccungccaw a theihtupaw kha a theih cih.

²²Thuasalama huakunaw a um leite lukhakheit nynh ccangpaw ccungccaw kha dou a tu ze thuasah, tuhkhyhze buhkhaw leite ccangkhakheit te a deih ze thuasah,

²³tuhkhyhze a rhawkuh hae paw thua leite, vaemaw muesah lanpaw mah paccynkunaw a um lei pite, a chisah khopaw lung ccangkhakheit kha ccyngkuh zah, paccynnuakupaw athua leite tuh-e lung nynh ccangpaw ccungccaw kha ccawphusei zah a chi lanze,

²⁴a theihtupaw te chiise phu a lahtupaw laku, hynh-e phungzae hae thyhte zapi nynh bya a pia cih hae;

²⁵te zapi hae nynh a theihtupaw kha chiise phu a lahtupaw kyate a khum cih hae. Oute zapi hae nynh a theihtupaw kha atakaw lya a khynnaw khuapi kalan bua a saw cih hae. Tuh-e a theihtupaw tuh athyaapaw chitui thuh athuapaw ranpibawi lupi a chi mawlaezung tuh-e khuapi kya a um cih.

²⁶Thuasalama a theihtupaw tuh pawpaw ccyh kya zemah atakaw lya a khynnaw khuapi ramri atolang cceih zah,

²⁷chiise phu a lahtupaw nynh a khynnaw khuapi ramri atolang khe a theihtupaw kha muih zah a chia zetuh, ccungccaw chianaw mee kha ing lan khyh.

²⁸Pawccecize a theihtupaw tuh ranpibawi lupi a chi mawlaezung a khynnaw khuapi kya a um hahe cih; thuasalama ranpibawi lupi a chih koute a theihtupaw tuh amaw inn lang a ki cih.

²⁹E hae hynh nae hanlan nae umnaw miakaw khe nae she takyh kya phungbya te phungzae athua cih.

³⁰Lukhakheit nynh ccungccaw a chia lanze, a muihtu hae kya-e ccaekiakhannaw thyhte a theihtupaw kha chia athua cih; thuasalama a muihtu lu kheit kya-e ccaekiakhannaw tetuh humhung mah chia thua lan khyh.

³¹Tuh apiaze chinaw detahnaw ing lan accanpaw ccungccaw theihpaw a hiinnaw shawkhaw mee kha na lawkuh lan khyh oh; ccungccaw a theihpaw tuh chia athua hahe cih.

³²Khynnaw khuapi kalan ccue zah ranpibawi lupi a chi mawze amaw ram kya um khylan ki a rypaw ccungccaw hanlan shawkhaw mee kha na lawkuh lan khyh oh.

³³Tuhcite nae umnaw ram kha na thusah lan khyh oh; pawccecize chiise nynh ram kha a thusah, chiise a luasahtupaw chiise laelan, tuh-e ram hanlan rungkhaw lanpaw paw san um khyh.

³⁴Nae umnaw ram kha na thusah lan khyh oh, tuin kya kae mah ka umbua; BAWIPAW , kamaw tuh Israel hae laku ka um.