Read Zotung Chin NAMBAR 36 Bible Online

NAMBAR 36 - Zotung Chin bible

NAMBAR 36

¹Josef phin kya-e Manasseh ccapaw Makhir a ccapaw Gilead ciihan puizia lungkhu e lupi hae nynh oun cceih hae zah Moses te cciakhaetu hae, Israel hae puizia kya-e lupi hae malang khe,

²minmin nynh, “Ram hynh ccungthydungte Israel hae kalan rho lang pyasah khylan BAWIPAW nynh ka bawipaw nang kha kaw ae pya vae; te kae unopaw Zelofehad rho kha a ccanung hae kalan pya lan BAWIPAW nynh kaw ae pya.

³Thuasalama minmin nynh ccangpaw Israel phin te zuvaw lang a tang hae ze, mih rho kha kae puizia hae rho kyate law athua cih zah minmin te zuvaw lang a tang hae paw phin kya-e rho lungkhu lang pybia athua cih; tukeiccuze kae neekupaw kae rho hae kyate law athua cih.

⁴Te Israel hae jubilee he yn thua te, mih rho tuh zuvaw lang a tang hae paw phin kya-e rho lungkhu lang pybia athua cih; te mih rho tuh kae thokeinaw phin kya-e rho kyate law athua cih,” a ci hae.

⁵Oute Moses nynh BAWIPAW bya thyhte Israel hae kha, “Josef phin kya-e ciihan hae nynh a ho hae paw tuh ahme.

⁶E hynh Zelofehad ccanung hae te asekuh lante BAWIPAW kawpyanaw nynh thua, ‘Ahoyhuacce cite a tua hae paw kha vawpaw lang umkhae hae sah; thuasalama mih paaw hae phin kya-e puizia hae te kyalya zuvaw lang tang hae sah,

⁷tuhteze nynh Israel hae rho tuh phin kheit kyate ccangpaw phin kheit kalan pyaku thua lan khyh; pawccecize Israel hae balyn nynh mih thokeinaw phin raveih kya-e rho kha a tynsah cih hae.

⁸Israel phin phinkhakheit kyaze rho a ccoupaw ccanung miakaw nynh a paaw phin puizia kya-e pise khate zuvaw lang a tang cih hae, tuhteze nynh Israel hae balyn nynh mih thokeinaw rho kha po a hoi cih hae.

⁹rho kha phin kheit kyate ccangpaw phin kheit kalan pyaku thua lan khyh; Israel hae phin kheit cci kya-e rho tuh mimaw phin raveih kyakhe atyn cih,’ ” cite a hopya hae.

¹⁰BAWIPAW nynh Moses kaw a pya thyhte Zelofehad ccanung hae nynh a cyi hae.

¹¹Zelofehad ccanung hae Mahlah, Tirzah, Hoglah, Kalkah te Noah nynh mih paaw a upaw hae te a neitaw hae ccapaw hae khate zuvaw lang a tang hae.

¹²Minmin nynh Josef ccapaw Manasseh phin kya-e ciihan hae khate zuvaw lang a tang hae.

¹³E tuh BAWIPAW nynh Moses kyate Israel hae kalan Moab bialae, Jordan vaw kin, Jeriko kya a pya hae paw kawbya hae te phungzae hae nynh thua.