Read Zotung Chin NAMBAR 4 Bible Online

NAMBAR 4 - Zotung Chin bible

NAMBAR 4

¹BAWIPAW nynh Moses te Aaron kha hynhte a hopya hae:

²Kohath ciihan hae kha ccangpaw Levi phin hae kyate phia oh lah, mih phin thyhte thuasah, mih puizia hae thyhte thuasah milu ccazing lah oh.

³kum sung thum te kum sung pangaw cia, tungkunaw bu te asekuhpaw ryalaw apuakuhpaw balyn kha ria oh.

⁴Tungkunaw bu te asekuhpaw Kohath ciihan hae ryalaw tuh athyaa huaccepaw uccaw hae nynh thua.

⁵Rhawkaw phu kha cciakhae azaw vae ze, Aaron te a ccapaw hae nynh a tee cih hae zah, zokhawpaw boei kha a khah kou hae te, byakin thingkua kha tuh-e boei khate a bong cih hae;

⁶oute a vawlan khe nebaleihpaw saphua khate a bongthin cih hae zah, meizong boei kha a phae cih hae, te puihnawpaw ccong hae kha tuin kya a ruh cih hae.

⁷Umkhaenaw Sanlou ccaboi vawlan khe meizong boei kha a phae cih hae, te pake hae, mynkhuhpaw angphe hae, banang lepaw hae te niapaw silawnaw elang ccekoh hae kha a nung cih hae; zungzae nung athuapaw sanlou kha mah tuh-e ccaboi vawlan nung athua cih;

⁸oute tuh-e hae vawlan khe boei sepaw kha a bong cih hae zah, nebaleihpaw saphua khate a bongthin cih hae, tukoute puihnawpaw ccong hae kha a ruh cih hae.

⁹Apiazon boei kha a lah cih hae zah, maee-awnawpaw maeekhuatung te a maeekhua hae, a tetakia hae, a maeloi nungnawpaw hae, te chitui balyn kha a bong cih hae;

¹⁰tuh-e tuh a uccaw balyn rykhate nebaleihpaw saphua sungkua lungkhu a sang cih hae zah, puihnawpaw ccong vawlan khe a khang cih hae.

¹¹Sui silawhang vawlan khe meizong boei kha a phae cih hae zah, nebaleihpaw saphua khate a bong kou hae te, puihnawpaw ccong hae kha a ruh cih hae;

¹²te beikinnthyaa kya mangpaw ryalawnawpaw uccaw balyn kha a lah cih hae zah meizong boei sungkua lungkhu a sang kou hae te, nebaleihpaw saphua khate a bong cih hae, te puihnawpaw ccong vawlan khe a khang cih hae.

¹³Beikhang kyate buhhaw kha a lah cih hae zah sephaphuhpaw boei kha tuh-e vawlan khe a phae cih hae;

¹⁴te tuh-e vawlan khe silawhang kya ryalaw nawlan mangpaw uccaw balyn, maee-e nungnawpaw pake, sivaw ccungthy hae, luanawpaw kawpia hae, pakekhupaw hae te silawhang uccaw balyn kha a khang cih hae zah, nebaleihpaw saphua te a bong kou hae te, puihnawpaw ccong hae kha a ruh cih hae.

¹⁵Aaron te a ccapaw hae nynh beikinnthyaa te beikinnthyaa accinccang balyn kha a bong kou hae te, rhawkaw phu a thokhaeku lya hae khe, Kohath ccapaw hae nynh tuh-e hae tuh puih khylan oun cceih cih hae, thuasalama minmin nynh athyaapaw uccaw hae kha ty lan khyh hae, tuhkhyhze tuh a chih cih hae. E hae tuh Kohath ciihan hae nynh a puih lan hae paw tungkunaw bu uccaw hae nynh thua hae.

¹⁶Ranpibawi Aaron ccapaw Eleazar nynh maee awnaw lanpaw chitui, zimuin, tyty raepaw ccathae silawnaw te thuhkupaw chitui, beikbu balyn te a lungkhu umpaw balyn, beikinnthyaa kya te beikinnthyaa a uccaw hae lungkhu umpaw balyn kha a do-oih cih hae.

¹⁷Oute BAWIPAW nynh Moses te Aaron kha hynhte a hopya hae:

¹⁸Kohath ciihan hae kha Levi phin hae kyate na zosah lan khyh oh.

¹⁹Minmin nynh athyaa huaccepaw kalan a naeku vae hae ze, hiin hae zah a chi khyh ccaw hae, hynhcite na hopah cih oh: Aaron te a ccapaw hae nynh a tee cih hae zah, lu kheit cci kha ryalaw te phupaw kha ccarou a nee cih hae.

²⁰Thuasalama Kohath ciihan hae tuh athyaapaw uccaw kha do khylan sohsoh sanmah tee lan khyh hae; tuhkhyhze tuh a chih cih hae.

²¹Oute BAWIPAW nynh Moses kha hynhte a hopya:

²²Gershon ciihan hae kha mih puizia hae te mih phin thyhte milu ccazing lah hae;

²³kum sung thum te kum sung pangaw cia tungkunaw bu kya ryalaw apuakuhpaw balyn kha na ria cih.

²⁴Gershon ciihan hae ryalaw tuh ryalawpyapaw te uccaw phupaw nynh thua:

²⁵beikbu kya zopaw boei, tungkunaw bu te dawpaw, bu avawlan te dawthinpaw nebaleihpaw saphua, tungkunaw bu thuakaw kya zopaw boei,

²⁶beikbu te silawhang pe umpaw voidu kya zopaw boei, voidu sakoih kya zopaw boei, a rui hae te ryalawnawpaw uccaw balyn kha a phu cih hae; te tuh-e hae te asekuhpaw ryalaw balyn kha a lah cih hae.

²⁷Gershon ciihan hae kya-e ryalaw balyn, a phu cih hae paw balyn kya thuasah, a lah cih hae paw ryalaw balyn kya thuasah Aaron te a ccapaw hae kyate kawpyanaw thyhte athua cih; te phu lan a ci hae paw balyn kha mimaw ryalaw lang na nee cih hae.

²⁸E hynh tungkunaw bu te asekuhpaw Gershon ciihan hae ryalaw nynh thua, mih ryalaw balyn kha ranpibawi Aaron ccapaw Ithamar nynh a dopah cih hae.

²⁹Merari ciihan hae kha mih phin te mih puizia hae thyhte min ccazing lah hae;

³⁰kum sung thum te sung pangaw cia tungkunaw bu kya ryalaw apuakuh hae paw miakaw kha na ria cih hae.

³¹Minmin nynh tungkunaw bu kya-e a phu cih hae cite nee athuapaw ryalaw abalyn tuh: beikbu kya-e pang hae te pangccaw hae, tung hae, ccusy hae,

³²voidu po voilu lan umpaw tung hae te a ccusy hae, pangreih hae, arui hae, te tuh-e te asekuhpaw ryalawnawpaw uccaw balyn kha a phu cih hae; te minmin nynh phu lan accan hae paw uccaw hae kha mih min te na nee cih hae.

³³E hynh ranpibawi Aaron ccapaw Ithamar kuihkaw kya Merari ciihan hae ryalaw thua zah tungkunaw bu te asekuhpaw mih ryalawnaw abalyn nynh thua.

³⁴Tukeiccuze Moses, Aaron te ccungccaw zapi cciakhaetu hae nynh Kohath ciihan hae kha mih phin te mih puizia hae thyhte milu ccazing a law hae,

³⁵kum sung thum te sung pangaw cia tungkunaw bu te asekuhpaw ryalaw apuakuhpaw miakaw;

³⁶phin thyhte a ria hae paw tuh thong ning za sari sung pangaw acih hae.

³⁷E hae tuh BAWIPAW nynh Moses kya kaw a pya thyhte Moses te Aaron nynh min ccazing law hae paw, tungkunaw bu kya rya a lah hae paw Kohath phin hae nynh thua hae.

³⁸Gershon ciihan hae tuh mih phin te mih puizia hae thyhte,

³⁹kum sung thum te sung pangaw cia tungkunaw bu te asekuhpaw ryalaw apuakuhpaw miakaw—

⁴⁰mih phin te mih puizia hae thyhte, thong ning za taruh sung thum acih hae.

⁴¹E tuh BAWIPAW kawpyanaw thyhte Moses te Aaron nynh min ccazing law hae paw, tungkunaw bu kya ryalah hae paw Gershon ciihan hae abalyn nynh thua hae.

⁴²Merari phin hae tuh mih phin te mih puizia hae thyhte,

⁴³kum sung thum te sung pangaw cia tungkunaw bu te asekuhpaw ryalaw apuakuhpaw miakaw—

⁴⁴mih phin thyhte milu ccazing lawnaw tuh thong thum za ning acih hae.

⁴⁵E tuh BAWIPAW nynh Moses kaw a pya thyhte, Moses te Aaron nynh min ccazing a law hae paw, Merari phin hae nynh thua hae.

⁴⁶Ria athuapaw Levi phin abalyn, Moses, Aaron te Israel cciakhaetu hae nynh a ria hae paw, mih phin te mih puizia hae thyhte,

⁴⁷kum sung thum te sung pangaw laku, tungkunaw bu te asekuhpaw ryalaw te phupaw ryalaw apuakuhpaw miakaw

⁴⁸ria athua hae paw minmin tuh thong tarya za pangaw sung tarya acih hae.

⁴⁹Moses kya pya athuapaw BAWIPAW kawbya thyhte lawpaw ryalaw khyhze phupaw ryalaw patae kha minmin tungvaw pya athua; tukeiccuze BAWIPAW nynh Moses kha kaw a pya thyhte aning nynh minmin kha milu ccazing a law hae.