Read Zotung Chin NAMBAR 5 Bible Online

NAMBAR 5 - Zotung Chin bible

NAMBAR 5

¹BAWIPAW nynh Moses kha hynhte a hopya:

²“Vaethya ccinaw hoipaw, vaenae hoipaw te michi rhua kha ty zah athyaa leipaw miakaw tuh rhawkaw phu ryahmin atolang khe nung lan Israel hae kha kawpya hae;

³nopi thuasah, pise thuasah ryahmin atolang khe na nung cih hae; minmin laku ka umnaw mih ryahmin kha minmin nynh thusah nan hae sah,” a cipya.

⁴Tuhcite Israel hae nynh cyih hae zah ryahmin atolang khe a nung hae; BAWIPAW nynh Moses a hopya thyhte Israel hae nynh a cyi hae.

⁵BAWIPAW nynh Moses kha hynhte a hopya:

⁶Israel hae kha hynhte hopah hae: Pise khyhze nopi lukhakheit nynh BAWIPAW tungvaw lungzinaw hoi leite mingccangpaw tungvaw seinaw a rae lanze, tuh-e ccungccaw tuh seinaw a hoi,

⁷seinaw a la raepaw kha a phykuh cih. Tuh-e ccungccaw nynh a seinaw elang phe ccing lan a rung cih, pum pangaw pum kheit kha a pyachih cih zah, seinaw a la raepyapaw ccungccaw kha a pya cih.

⁸Thuasalama seinaw a raepyapaw ccungccaw tuh a chi keiccuze rungpaw kha a lawkuh lanpaw puizia a hoi khyh lanze, seinaw keiccuze rungpaw tuh BAWIPAW kalan ranpibawi elang pya athua cih, tuhpiaze a seitupaw hanlan seingaethyanaw elang tuutepaw khate silaw athua cih.

⁹Israel hae kya-e athyaapaw ahlu hae balyn laku e ranpibawi kalan oun thuakhae hae paw lasung miakaw tuh ranpibawi kya-e athua cih.

¹⁰Ccungccaw balyn kya-e athyaapaw ahlu hae tuh ranpibawi hae kya-e nynh thua; lukhakheit nynh ranpibawi kalan a pyapaw pawpaw zemah ranpibawi kya-e athua cih.

¹¹BAWIPAW nynh Moses kha hynhte a hopya:

¹²Israel hae kha hynhte hopah hae: Pise lukhakheit zu nynh ccouseikute pisepaw tungvaw a lungzi khyh lanze thuasah,

¹³pise lukhakheit nynh amaw kha ikhae zah tuh-e tuh a vawpaw nynh a ny khyh lanze thuasah, tuh-e nung tuh amaw te amaw a nungsisahku vae zemah a sei lyakhe muihbia thua khyh zah ccaekia a um khyh lanze thuasah,

¹⁴te a vawpaw nynh amaw te amaw a nungsisakuh vae paw a zu tungvaw a lunghiin ze thuasah, tuhkhyhze amaw te amaw a nungsisakuh leipaw a zu tungvaw khe a lunghiin ze thuasah,

¹⁵a vawpaw nynh a zu kha ranpibawi kalan a thuakhae cih. Te aning nynh a zu elang pya ahopaw pyapaw, barli khui ephah ccangkheit kya-e pumhaw pumkheit kha a ccyng cih. Tuh-e barli khui kyakhe chitui kha bu lan khyh zah frankinsen mah py lan khyh, pawccecize tuh-e tuh lunghiinnaw ccathae silawnaw, nythuinaw ccathae silawnaw, hoyleinaw nythuisahnaw elang silawnaw nynh thua.

¹⁶Oute ranpibawi nynh tuh-e nung tuh malang khe a cciakhae cih zah BAWIPAW malang khe a nung cih;

¹⁷ranpibawi nynh laephi ang khate tui athyaapaw kha a lah cih, beikbu kya umpaw laenoi beihtaraw kha a lah cih zah tuh-e tui lungkhu khe moh a thung cih.

¹⁸Ranpibawi nynh nopinung kha BAWIPAW malang khe a nung cih, nopinung sang kha a phou cih zah nythuinaw ccathae silawnaw kha nopinung kuih kyakhe a nung cih, tuh-e tuh lunghiinnaw ccathae silawnaw nynh thua. Ranpibawi nynh amaw kuih kyakhe thyalawnaw a thuakhaepaw tui akhahpaw kha a ccyng cih.

¹⁹Oute ranpibawi nynh nopinung kha thyalawsakute, “Humhung pise nynh mah ae ikhae khyh ze thuasah, na vawpaw kawhoinaw zakaw kya na um lyaze, athyaa leipaw kalan na maeku khyh ze thuasah, thyalawnaw a thuakhaepaw hynh-e tui akhahpaw kyate luetua.

²⁰Thuasalama na vawpaw kawhoinaw zakaw kya na um lyakhe na ccouseiku ze thuasah, namaw te namaw kha na nungsisakuh zah na vawpaw holeite pise lukhakheit nynh ae ikhae lanze thuasah,” cite hopyate

²¹—ranpibawi nynh tuh-e nopinung tuh thyalawsakute— “BAWIPAW nynh na tungvaw huakunaw kha langsakuh sah lah, na ccungccaw hae laku kya thya ae law sah, BAWIPAW nynh na neita-inn kha ae lawpah sah lah, na vue kha phinsah sah;

²²atu thyalawnaw a thuakhaepaw hynh-e tui nynh na vue lungkhu lang teesah lah, na vue kha phinsah sah, na neita-inn kha ae lawpah sah lah!” cite hopah sah. Te nopinung nynh, “Amen. Amen,” a ci cih.

²³Oute ranpibawi nynh e thyalawnaw bya hae hynh ccaw te a zei cih zah tui akhahpaw lungkhu khe a the cih.

²⁴Nopinung tuh thyalawnaw a thuakhaepaw tui akhahpaw kha a niasah cih zah thyalawnaw a thuakhaepaw tui tuh nopinung lungkhu lang a tee cih zah myarya akhah lante a ccisah cih.

²⁵Ranpibawi nynh lunghiinnaw ccathae silawnaw kha nopinung kuih kyate a lah cih, te ccathae silawnaw kha BAWIPAW malang khe a hangthung cih zah silawhang kalan a cciakhae cih;

²⁶te ranpibawi nynh ccathae silawnaw kuihphe kheit kha a lah cih zah silawhang vawlan khe a u cih, tukoute nopinung kha tui a niasah cih.

²⁷Nopinung kha tuh-e tui he a niasah tuh, nopinung nynh amaw te amaw kha nungsisakuh zah a vawpaw tungvaw lungzinaw a la hoi khyh lanze, thyalawnaw a thuakhaepaw tui tuh a lungkhu lang tee zah myarya akhah lante a ccisah cih, te a vue kha a phinsah cih, a neita-inn tuh accah cih, te nopinung tuh a ccungccaw hae laku kya hua lan umpaw ccungccaw lang a tang cih.

²⁸Thuasalama nopinung tuh amaw te amaw nungsisakuh khyh zah athyaa lanze, aning tuh a lue cih zah ccaaw a poi kho cih.

²⁹E hynh lunghiinnaw kong kya zui lanpaw upadi nynh thua, nopi nynh a vawpaw kawhoinaw zakaw kya a um lyakhe ccouseikuh zah amaw te amaw kha a nungsisakuh ze thuasah,

³⁰tuhkhyhze pisepaw thinlung kya lunghiinnaw tee zah a zu tungvaw lunghiinnaw a hoi ze thuasah, aning nynh a zu kha BAWIPAW malang a thuakhae cih, te ranpibawi nynh e upadi balyn hynh nopinung tungvaw a mang cih.

³¹Pisepaw tuh hoyleinaw kyate a lue cih, thuasalama nopinung nynh a hoyleinaw mee kha a ing cih.