Read Zotung Chin NAMBAR 8 Bible Online

NAMBAR 8 - Zotung Chin bible

NAMBAR 8

¹BAWIPAW nynh Moses kha,

²“Aaron kyakhe, ‘Maeekhua hae kha he na aw te, maeekhua ccangsari nynh maeekhuatung malang khe awnaw a pya cih,’ cite hopah,” a cipya.

³Aaron nynh tuhcite a cyi; BAWIPAW nynh Moses kaw a pya thyhte, maeekhuatung malang khe awnaw pya khylan Aaron nynh maeekhua hae kha a aw.

⁴E hynh sui kha deihping te maeekhuatung raezia nynh thua. Maeekhuatung aleihpaw kyate a haetapaw kyacia deihping te raepaw nynh thua; BAWIPAW nynh Moses a langsahpyaku paw pungsan thyhte, aning nynh maeekhuatung kha a rae.

⁵BAWIPAW nynh Moses kha,

⁶“Levi phin hae kha Israel hae laku kyate ko hae lah, thyaasah hae.

⁷Minmin kha thyaasah khylan mih tungvaw khe hynhcite na cyih cih: thyaanawpaw tui khate mih tungvaw na hei cih hae, minmin nynh mih pyn kya-e ming balyn kha a ngokuh cih hae zah mih boeining kha a sukuh cih hae, tuhcite thyaasakuh hae sah.

⁸Oute tangnuapaw anopaw sa kheit te chitui ryte pykuhpaw vaekhui te raepaw ccathae silawnaw kha lah hae sah, te seithyaanaw silawnaw hanlan ccangpaw tangnuapaw anopaw kha na lah cih.

⁹Levi phin hae kha tungkunaw bu malang na thuakhae cih hae zah Israel zapi balyn kha na pum cih hae.

¹⁰Levi phin hae kha BAWIPAW malang he na thuakhae hae te, Israel hae nynh mih kuih kha Levi phin hae tungvaw khe a khang cih hae,

¹¹te Levi phin hae nynh BAWIPAW ryalaw kha a law ccaw hae cite, Israel hae kyate hangthung-hebiate silawnaw lante, Aaron nynh Levi phin hae kha BAWIPAW malang khe a pya cih hae.

¹²Levi phin hae nynh mih kuih kha tangnuapaw hae lu kyakhe a khang cih hae zah, minmin elang seingaethyanaw raepya khylan Aaron nynh BAWIPAW kalan khe, sa kheit kha seithyaanaw silawnaw hanlan, ccangpaw sa kheit kha maee-ute silawnaw hanlan a pya cih.

¹³Oute Levi phin hae kha Aaron te a ccapaw hae malang khe na thadynsah cih hae zah, hangthung-hebiate silawnaw lante minmin kha BAWIPAW kalan na pya cih.

¹⁴Tuhcite Levi phin hae kha Israel hae laku kyate na phia cih hae zah, Levi phin hae tuh kamaw kya-e athua cih hae.

¹⁵Tukoute Levi phin hae kha na thyaasah hae zah hangthung-hebiate silawnaw lante na pya kou hae te, tungkunaw bu kya ryalaw khylan a tee cih hae.

¹⁶Pawccecize minmin tuh Israel hae laku kyate kamaw kalan khaleih mawte pyapaw nynh thua hae; vue kyate a puipaw balyn, Israel hae balyn kya-e ccatawccaw hae hanpaw minmin kha kamaw elang ka lawku vae hae.

¹⁷Pawccecize Israel hae laku kyaze ccatawccaw thuasah, thanty thuasah kamaw kya-e nynh thua. Izip ram e ccatawccaw balyn kha ka chia nin khe minmin kha kamaw elang ka thyaasah hae,

¹⁸Levi phin hae kha Israel hae laku e ccatawccaw balyn hanpaw ka lawku vae hae.

¹⁹Tuhpiaze, tungkunaw bu kya Israel hae elang ryalawpya khylan thuasah, Israel hae nynh beikinnthyaa kalan myarya a naeku vae hae ze, minmin laku shethya a thua khyh nawlan, minmin hanlan seingaethyanaw raepya khylan thuasah Israel hae laku kyate Levi phin hae kha Aaron te a ccapaw hae kalan lasung lang ka pya vae hae,” a cipya.

²⁰Tukeiccuze Moses, Aaron te Israel zapi balyn nynh Levi phin hae tungvaw tuhcite a cyi hae; Levi phin hae kong te asekuh lante BAWIPAW nynh Moses kaw a pya thyhte Israel hae nynh Levi phin hae tungvaw a cyi hae.

²¹Levi phin hae nynh mimaw te mimaw kha seinaw kyate thyaasakuh hae zah mih boeining kha a suku hae; oute Aaron nynh minmin kha BAWIPAW malang khe hangthung-hebiate silawnaw lante a pya hae, te minmin kha thyaasah khylan Aaron nynh seingaethyanaw kha a raepya hae.

²²Tukoute Levi phin hae tuh tungkunaw bu kya Aaron te a ccapaw hae malang khe mih rya kha law khylan a tee hae. Levi phin hae te asekuh lante BAWIPAW nynh Moses kaw a pya thyhte, minmin nynh Levi phin hae tungvaw a cyi hae.

²³BAWIPAW nynh Moses kha,

²⁴“E hynh Levi phin hae te asekuhpaw nynh thua: kum kuin lae pangaw te palung lang nynh tungkunaw bu kya ryalaw kha a tho cih;

²⁵te kum sung pangaw acih hae tetuh ryalaw kyate a haeung cih hae zah ryalah vae lan khyh hae.

²⁶Minmin nynh mih uno hae kha tungkunaw bu kya rya a bawm cih hae, thuasalama mih makhaete ryalaw lah lan khyh hae. Tuhcite Levi phin hae mih ryalaw kha na lawsah cih hae,” a cipya.