Read Zotung Chin NAMBAR 9 Bible Online

NAMBAR 9 - Zotung Chin bible

NAMBAR 9

¹Izip ram kyate a pou kou hae te, kum ningnaw, masaty sawpaw kyakhe, BAWIPAW nynh Moses kha Sinai ramkaw khe hynhte a hopya:

²Israel ccungccaw hae nynh accyh khyapaw kyakhe kawtaw poi kha a tua cih hae.

³Hynh-e sawpaw nin haw lae palinaw nin, zetepakaw accyh khyapaw kyakhe kawtaw poi kha na tua cih oh; a upadi balyn te a phung balyn thyhte kawtaw poi kha na tua cih oh, a cipya.

⁴Tukeiccuze kawtaw poi kha na tua cih oh cite Moses nynh Israel hae kha a hopya hae.

⁵Minmin nynh kawtaw poi kha Sinai ramkaw kya, masaty sawpaw, nin haw lae palinaw nin, zetepakaw khe a tua hae. BAWIPAW nynh Moses kaw a pya thyhte Israel hae nynh a cyi hae.

⁶Michi rhua kha ty hae zah a thyaa khyh keiccu hae ze, tuh-e nin kya kawtaw poi a tua kho lei hae paw ccungccaw hae a um hae. Minmin nynh tuh-e nin khe Moses te Aaron malang oun thua hae zah,

⁷Moses kyakhe, “Michi rhua kha kae ty keiccuze kae thyaa khyh zemah, Israel hae laku kya khyapaw accyh kyakhe, BAWIPAW kya-e silawnaw raenaw kyate kaening kha pawcce khee kae thua cih?” a cipya hae.

⁸Moses nynh minmin kha, “Nanning te asekuh lante BAWIPAW nynh paw kaw mou oun pya cipaw ngawtua hin oh,” a cipya hae.

⁹BAWIPAW nynh Moses kha,

¹⁰“Israel hae kha hynhte hopah hae: Michi rhua kha a ty keiccuze athyaa leipaw nynh thuasah, khycce cceihpaw nanning laku e lukhakheit nynh thuasah, nae ciihan lukhakheit nynh thuasah BAWIPAW hanlan kawtaw poi kha a tua mamin cih.

¹¹Sawpaw sah ningnaw, nin haw lae palinaw nin, zetepakaw khe minmin nynh kawtaw poi kha a tua cih hae; tuutaw saw kha ransi phing leipaw sanlou te akhahpaw enaw hae ryte a aede cih hae.

¹²Tuh-e tuh awkhua cia laesah lan khyh hae, a ru kha mah khya lan khyh hae; kawtaw poi kha a upadi balyn thyhte minmin nynh a tua cih hae.

¹³Thuasalama athyaapaw te khycce a cceih leipaw nynh kawtaw poituanaw kha a sibia lanze, khyapaw accyh kya BAWIPAW kya-e silawnaw kha a rae khyh keiccuze a phin kyate vua athua cih; tuhcihawpaw ccungccaw tuh a seinaw mee kha a teing cih.

¹⁴Nanning laku umpaw ramccang ccungccaw lukhakheit nynh BAWIPAW hanlan kawtaw poi kha tua a ry lanze, kawtaw poi upadi thyhte thuasah, kawtaw poi phung thyhte thuasah a tua cih; ramccang ccungccaw te ramccungccaw nynh upadi ccangkheit kyalya na hoi cih oh,” a cipya.

¹⁵Beikbu kha thadynsah athua nin khe, maeking nynh beikbu, ccaekiakhannaw bu kha phang a bong; maeking tuh beikbu luki khe zete te awkhualan awkhua cia maee hawte alangkuh.

¹⁶Tuhcite zungzae a um: khuadae ccyh kya maeking nynh bong zah, khuazi ccyh kya maee hawte a aw.

¹⁷Maeking tuh bu luki kyate a hangku thung takyh vae ze, Israel hae tuh leih a cceih hae; te maeking a nebungnaw hmin kyakhe Israel hae tuh ryahmin leih a tahkuh hae.

¹⁸BAWIPAW nynh kaw a pyanaw hae kyakhe Israel hae tuh leih cceih hae zah BAWIPAW nynh kaw a pyanaw hae kyakhe ryahmin kha leih a tahkuh hae. Beikbu luki kya maeking a um lungkhu balyn tuh ryahmin kya a um hae.

¹⁹Maeking tuh beikbu luki kya nin patae a um vae heize, Israel hae nynh BAWIPAW kaw kha ngae hae zah cceih khyh hae.

²⁰Vaekhakheit vae ze maeking tuh beikbu luki kya nin beihtaraw kyalya leih um zah, BAWIPAW kawpyanaw thyhte ryahmin kya leih a um hae; oute BAWIPAW kawpyanaw thyhte leih a cceih hae.

²¹Vaekhakheit vae ze maeking tuh zete te awkhualan awkhua cia leih a um; awkhua khe maeking a hangku thung vae ze a cceih hae, maeking tuh nin kheit te zi kheit po a um vae zemah maeking he a hangkuh te, leih a cceih hae.

²²Maeking tuh beikbu luki khe nin ning thuasah, sah kheit thuasah, khaw cia thuasah po a um ze, Israel hae tuh ryahmin kya po leih um hae zah cceih khyh hae; thuasalama maeking he a hangkuh thung te, minmin tuh leih a cceih hae.

²³BAWIPAW nynh kaw a pyanaw hae kyakhe minmin nynh ryahmin kha leih tahkuh hae zah BAWIPAW nynh kaw a pya hae thyhte leih a pou hae. BAWIPAW nynh Moses kyate kaw a pya thyh hae te, minmin nynh BAWIPAW kaw kha a ngae hae.