Read Zotung Chin NAHUM 1 Bible Online

NAHUM 1 - Zotung Chin bible

NAHUM 1

¹Elkosh khuapaw Nahum nynh Nineveh khua konglang a muihpaw vizin ccauh.

²BAWIPAW tuh a eiungpaw te phulaw a mangpaw Pachia nynh thua, BAWIPAW nynh phulah hae zah myarya a thinria; BAWIPAW nynh amaw a rawsetu hae kha phulah hae zah, a rhaw hae tungvaw myarya a thinria.

³BAWIPAW tuh a lungsae, thuasalama a huhan myarya ale, BAWIPAW nynh a sei hae paw kha detah leite cciasah lan khyh hae. BAWIPAW tuh khiccung te khise kya cceih zah, maeking hae tuh a ccukaw umpaw vuiping nynh thua hae.

⁴Rili kha pe zah a rousah, vaw hae balyn kha a kansah hae; Bashan mua te Karmel mua tuh rou hae zah, Lebanon haetapaw hae tuh anaan hae.

⁵Amaw malang khe mua hae tuh hy hae zah, sangpyng hae tuh atui hae; amaw malang khe laephi tuh hy zah, laephipi te a vawlan um hae paw balyn tuh ahy hae.

⁶A thin-unaw malang khe hummou a thadyn kho cih? A thinrianaw kha hummou a ngaesang kho cih? A bungpawnaw tuh maee hawte rua zah, a malang khe lung hae tuh zoihtatyh lan akoi hae.

⁷BAWIPAW tuh ahoy, vawsaw tung ccyh lya khynnaw hmin nynh thua; amaw kya a rekuh hae paw kha thungkhaw hae zah,

⁸tuileih athopaw kya mah a thungkhaw hae. Amaw a rawse hae paw kha khaleih a thangsah cih hae, a rhaw hae kha amohnaw langkhe a deehui cih hae.

⁹Pawkeiccumou BAWIPAW kha rawsete na paccynnuaku? Aning nynh nang kha ae thangsah cih; amaw a rawsetu hae tuh vae ning thokuh lan khyh hae.

¹⁰Hinpaw ku hawte khelekuh hae zah, samaw ruipaw hawte a rui hae; ccatanphue aroupaw hawte maee nynh phe ccung lan a u hae.

¹¹Pou Nineveh, BAWIPAW kha rawsete ahoy leipaw a paccynnuakuhpaw, ahoy leipaw tuanaw pyatu kha na kyate a langkuh vae.

¹²BAWIPAW nynh hynhte a ho, “Assiria hae tuh thawzung te phe beih hae zah milu alung hae zemah, vua athua cih hae zah azo cih hae. Nanning kha vawsaw kae la teingsah oh zemah, atu te vawsaw kae pya vae lan khyh oh,” a ci.

¹³Assiria nynh ae puihsah oh paw a puihnawpaw ccong kha kae khyapah cih oh zah, ae heedenaw oh paw arui kha kae paepah cih oh.

¹⁴Nanning te asekuh lante BAWIPAW nynh kaw a thopaw tuh: “Na min a tynsah lanpaw ciihan um vae lan khyh; na soiikupaw te na laeekupaw zohtuh hae kha na pachia hae inn kyate ka roh cih. Nang tuh ccungkiapaw na thua vae khyh, tukeiccuze shawku kae raepah cih,” a ci.

¹⁵Thehoypaw yn phupaw te daenaw kong a phypaw mua vawlan e ccungccapaw ccu khuh dotua oh! Pou Judah, na poi kha tua lah, bya na kinkupaw kha ccingsah tua, pawccecize ccungccaw hoyleipaw nynh nang kha teenuate ae thiing vae lan khyh; minmin kha khaleih ro athua vae hae.