Read Zotung Chin NAHUM 2 Bible Online

NAHUM 2 - Zotung Chin bible

NAHUM 2

¹Pou Nineveh, rohtupaw nynh nang kha ae ccianua thung vae. Na rhawlungrua hae kha phang rintua; laanpi kha phang ngaw lah, rhawtuk lan paccynku tua; na thawzung balyn kha thuatua.

²(Pawccecize rohtu hae nynh minmin kha roh hae zah, mih karan hae kha a ro hae zemah BAWIPAW nynh Israel lesaenaw hawte Jakob lesaenaw kha a pyathui vae.)

³A rhawkaw hae tuh asepaw khawriaphua kha mang hae zah, sephaphuhpaw boeining kha a lawkuh hae. A rhawkaw hae kha ataruinte a thadynsah lya hae khe, marangle hae kya-e sivaw zunghe hae tuh phaephae ak hae; ccoi hae tuh valahvalah a hekuh hae.

⁴Marangle hae tuh laanpi hae kya keisukeilae lante ccue hae zah, khualae lungkhu kya thawte a ccue bungthung hae; mih muinsan tuh maeesoitung te lokuh zah, khozawlaekuhpaw hawte myarya arang hae.

⁵Rohtupaw nynh a kuihkaw e bawi hae kha a ko hae; minmin tuh khakhah pawkuh lan malang a cceih hae; khualungrua kalan khe arangte cceih hae zah, khualungrua kyakhe thungkhawkunawpaw khawriaphua khate a thungkhaw hae.

⁶Vawkhu thuakaw hae kha hung thua zah, siapharan inn tuh a thyngkuh.

⁷Khuapi kha kyngte cciakhae athua cih cite kawtho athua vae, a seenung hae kha cciakhae athua cih hae, minmin tuh vahu hawte a khui cih hae zah, mih by a tukuh cih hae.

⁸Nineveh khua tuh tui akanpaw kua te nynh aloku. “Thadyn oh! Thadyn oh!” cite a hopya hae zemah, lu kheit nynh sanmah nulang hawi khyh.

⁹Ngun kha luade oh, sui kha luade oh! Sisua tuh thangtae khyh! Aphutepaw uccaw phuin myarya alung!

¹⁰Nineveh tuh aroh vae, ccungccaw daetedae zah, paw sanmah um vae khyh! Mih thinlung tuh a rawthah zah mih ccukharu a thyngkuh, mih thawthang zah, mih mae tuh dawkadae lan acih!

¹¹Chindeih hae karung te chindeih taw hae nynh looh a aenaw hae hmin tuh pawlangmou a tang vae hae? Humhung nynh mah a risah kho lei hae paw chindeih tepaw, chindeih pinung te chindeih taw hae tuh teilangmou a ccia vae hae?

¹²Chindeih nynh a taw hae hanlan te chindeih pinung hanlan saw kha a teipya hae; a karung kha a teipaw saw hae khate phe a biasah.

¹³Vaaw BAWIPAW nynh a hopaw tuh, nang kha kae rawse, na marangle hae kha maeekhuh phe khuh lan maee te ka u cih zah, na chindeih taw hae kha thaloi te ka theih cih hae; na teipaw saw hae kha laephi kyate ka zosah cih zah, na locceihtu hae roi kha thae thua vae lan khyh.