Read Zotung Chin NAHUM 3 Bible Online

NAHUM 3 - Zotung Chin bible

NAHUM 3

¹Chiise a luapaw khuapi, hynhunaw, luadepaw uccaw te phe beihpaw khuapi, luadenaw a thang kho leipaw khuapi hanlan ngaethya lan kou um!

²Ccungngue te buapaw roi, leccu miakuhpaw roi, marang ccukoh roi te marangle roi tuh ngaetua oh!

³Marang rhawkaw hae nynh a naangbia hae, thaloi hae tuh dalahdalah aw hae zah, ccoi hae tuh phaephae ak hae, a chih hae paw tuh patah pumkuh hae, michi rhua hae tuh riatae um khyh, tuh-e michi rhua hae vawlan khe a thy a pawkuh hae!

⁴Puithya zah ccungccaw a soihthyapaw, lunglawthyanaw khate thuasah, naaw a thyanaw khate thuasah minphuin hae te ccungccaw hae kha a see lang a tangsah hae paw ohhuanung nynh riatae lei a ohhuaku keiccuze,

⁵vaaw BAWIPAW nynh a hopaw tuh, nang kha kae rawse zah, na boeipae kha na mae vawlan cia kae kalyng cih; na ccakaete na umpaw kha minphuin hae ka dosah cih hae zah, na maethyanaw kha peenaw hae ka dosah cih hae.

⁶Anungsikuhpaw kha na tungvaw kae vuanua cih, pawlangria lei lante kae ccuepe cih zah, theihryate a do hae paw lang kae rae cih.

⁷Tetuh nang ae muih hae paw balyn tuh nulang a sihkuh cih hae zah, “Nineveh khua tuh aroh vae; hum nynh mou ngae a thyakhae cih?” cite a ho cih hae. Lungtangnaw ae pyatu kha pawkyamou kae ccungpah cih?

⁸Nang tuh Nal vawpi pe umpaw Thebes khua laeze na hoyhua tou? Tuh-e khua tuh tui nynh po a koihlu, rili tuh atolang e rhawlungrua thua zah, tui tuh a khualungrua nynh thua.

⁹Ethiopia te Izip tuh a thawzung nynh thua hae, a thawzung tuh thangthya khyh; Put te Libia tuh aning a bawmtu hae nynh thua hae.

¹⁰Tuhzemah Thebes khua kha rhaw hae nynh kyng hae zah a cciakhae hae, laanpi atungkunaw takyh kyakhe tuh-e khua kya-e imua taraw hae kha zoihtatyh lan a deihnaw hae; khua kya-e sawtuanaw a ccou hae paw kha ccungthydungte a neeku hae, alesaepaw bawi hae kha sivawrui te a khii hae.

¹¹Nineveh, nang mah aruipaw lang na tang cih zah zya na rekuh cih; rhaw kyate rekunaw hmin kha na ccungkuh cih.

¹²Na rhawlungrua hae balyn tuh masaty avoipaw thaeku thae hawte nynh athua hae, hybia lanze a aetu khalang lungkhu lang a ccah hae.

¹³Na rhawkaw hae khuh dotua hae: na kya umpaw nopi hae te nynh aloku hae. Na ram kya-e koikua hae kha na rhaw hae hanlan ako lante hungpya athua hae; na koikua ccong hae kha maee nynh a u vae hae.

¹⁴Rhaw nynh ae koih cih oh keiccuze tui thekuh oh, nae rhawlungrua hae kha tynsah oh; anglae kha syde oh lah, pung laephi kha sydete nonde oh, ohkhe raenawpaw kha ccyngkuh oh!

¹⁵Tuin kyakhe nanning kha maee nynh ae u cih oh, thaloi nynh phe pae lan ae bae cih oh. Tungkhipaw nynh looh a ae hawte ae ae cih oh. Tungkhipaw hawte pungzae khylan zuakuh oh, khung-angroh hawte pungzae khylan zuakuh oh!

¹⁶Kungkupaw na ccungccaw hae kha vaawlang e awsi laeze na lungsah thung hae. Tungkhipaw hae tuh mih sake daw hae zah a zou hae.

¹⁷Na rhawviatu hae tuh tungkhipaw hae zeih lung hae zah, na kuihkaw e bawi hae tuh tungkhipaw phu zeih alung hae, khuacci lya tureih kya um hae zah, khuanin he thua te, a zou hae; teilangmou a zou hae cipaw kha humhung nynh mah nyh khyh.

¹⁸Pou Assiria siapharan, na tuurin hae tuh ih hae zah, asung-epaw na ccungccaw hae tuh marya ih hae. Na ccungccaw hae tuh mua hae vawlan khe phiariphiarae um hae zah, hum nynh sanmah suelua khyh hae.

¹⁹Na vaemaw tuh hoy kho khyh, chikhaeku khopaw vaemaw nynh thua. Na konglang a thaepaw balyn nynh mih kuih ae bianua cih hae. Pawccecize na rysawthyanaw kyate a luepaw hummou a um?