Read Zotung Chin HABAKKUK 1 Bible Online

HABAKKUK 1 - Zotung Chin bible

HABAKKUK 1

¹Profeh Habakkuh nynh a muihpaw vizin.

²Pou BAWIPAW , hohseciamou bawmnaw mue khylan ka sia cih zah, ngaepya leite nae um cih? Hohseciamou na kalan khe, “Puathote yn cyi hae!” cite ka sia cih zah, khum leite nae um cih?

³Pawccemou hoyleinaw hynh nae tungsah zah, vawsawnaw hynh phang na do huataw? Ronaw te puathonaw tuh ka malang phang a um; pekumaekunaw te eikunaw tuh a um.

⁴Kawbya tuh a thawzya zah, byading nynh kharouh tae vae khyh. Hoyleinaw nynh miding hae kha a koihlu hae— tukeiccuze byapianaw tuh kyh vae khyh.

⁵Minphuin hae khuh dotua oh lah, muihtua oh! Nae ngaeangthua sah! Nae khuaruaru sah! Pawccecize nanning kha ae hopya oh zemah, na zyn lei lan oh paw ryalaw ccangkheit kha nae she kya ka cyi vae.

⁶A rysawthah zah a thindynpaw Khaldi hae kha ka tuhou cih hae, mimaw kya-e athua leipaw ram kha luade khylan, laephi pynpi po lekuh lan a cceih hae.

⁷Minmin tuh ri lan te siiku lan myarya um hae; mimaw kaw te kyalya bya a pia hae.

⁸Mih marang hae tuh kaesing laeze mih thyranghua, zete riryngmoh kya a khiavuikuhpaw suizaw laeze ri lan umhua hae; mih marang hae tuh a thohkuh hae. Mih marang rhawkaw hae tuh asawnaw langte oun cceih hae; aepaw a zounuapaw mosipi hawte oun zou hae.

⁹Mih balynte puathote tae khylan oun cceih hae, mih mae kha malang khe tahrarin lan a hawi hae; minmin nynh a kyng hae paw kha suelua hae zah laesia zeih acih hae.

¹⁰Siapharan hae kha sarya hae zah, uktu hae kha ccyasahnaw lang a mang hae. Rhawlungrua miakaw kha a nuinse hae, laephi dohsakute tuk hae zah a law hae.

¹¹Tetuh khisan hawte zaw hae zah azo hae; minmin tuh mesei hae zah aseipaw lang a tang hae, mih thungnaw tuh mih pachia nynh thua!

¹²Pou BAWIPAW ka Pachia, A thyaapaw ka Pachia, nang tuh langmawlya te phe na um vae khaw? Nang tuh na chih lan khyh. Pou BAWIPAW , minmin kha byapiatu lang na nung vae hae; Pou Lungpi, kaening detah khylan minmin kha na khang vae hae.

¹³Na mit tuh myaryamaw thyaa zah ahoy leipaw kha na do khyh, ahoy leipaw cyisahnaw kha na do khyh; tuhte athua ze, pawccemou mih lungzi lei hae paw kha do kyalya te na do hae zah, ccungccaw hoylei hae paw nynh mimaw laeze a dinghua hae paw kha a laang lya hae khe pawccemou yccae leite na um?

¹⁴Ccungccaw hae kha rili kya-e ngasaw hae hawte na rae hae zah, uktu a hoi lei hae paw, avawthyapaw ripaw hae hawte na rae hae.

¹⁵Rhaw nynh minmin kha ngasabaw te pong a baw hae; a miabu te rawkhaw hae zah a suebia hae, a paih te bong hae zah a suelua hae, tukeiccuze a lungtua zah a lungpawkhaekuh.

¹⁶Tukeiccuze a miabu kalan khe silawnaw rae zah, a paih kalan khe pyapaw uccaw kha a pya; pawccecize tuh-e hae liate a ccoupaw uccaw tuh myarya lung zah, looh patae a hoi.

¹⁷Te aning nynh a thaloi kha a mang zungzae cih zah, minphuin hae kha thawcci leite a roh cih hae tou?