Read Zotung Chin HABAKKUK 3 Bible Online

HABAKKUK 3 - Zotung Chin bible

HABAKKUK 3

¹Shigionoth roi thyhte Profeh Habakkuh sawsangnaw.

²Pou BAWIPAW , na minthaannaw kha ka thae vae, Pou BAWIPAW , na ryalawnaw kha ka ngaeangthua. Tuh-e ryalaw tuh kae she kyahin bua thawsah thui tua lah, kae she kyahin langsaku tua; na thinria lyamawkhe thawccinaw kha beih liathuitua.

³Pachia tuh Teman kyate yn thua, Athyaapaw Pachia tuh Paran Mua kyate yn thua. A phu-enaw nynh vaawlui kha bong zah, laephi tuh a thehoynaw te phe abeih.

⁴A awnaw tuh khuanin hawte a aw; a kuih kyate awnaw pou zah, tuin kyakhe a thungnaw kha thuruh athua.

⁵A malang khe shethya tuh cceih zah, a nulang anaekunaw khate ccinaw nynh a zui.

⁶Aning nynh thadyn zah laephi tuh ahy; aning nynh do hae zah minphuin hae tuh a thyngkuh hae. Zungzae tynpaw mua hae tuh a koi hae; langmawlya a la ccianawpaw, zungzae tynpaw sangpyng hae tuh a tingbung hae.

⁷Kushan kya-e bu hae nynh vawsaw a teing hae paw te Midian ram umpaw bu hae kya-e zokhawboei hae nynh a thyngku hae paw kha ka muih.

⁸Pou BAWIPAW , vawkhu hae kha na thinrianua hae tou? Na marang hae kha na ccikuh hae zah, taenawpaw na marangle hae kha he na ccikuh hae te, vawkhu hae kha na thinrianua hae tou? Rili kha na thin-unua tou?

⁹Na li kha mang lan na nungdae zah, na the kha kaw lan na nungdae vae. Laephi kha vawkhu hae khate thoh na phia.

¹⁰Mua hae nynh nang kha ae muih hae zah a thyngkuh hae. Tui alepaw tuh alua hae; akhupaw rili hae tuh sia hae zah, khuanin nynh amaw a kuih kha a hang;

¹¹myarya rangpaw na the hae tuh aw hae zah, phaephae akpaw na ccoi hae tuh awrarih lan a um lya hae khe, khuanin te sawpaw tuh mih umnaw kya a thadyn hae.

¹²Thin-ute laephi kya na cceih zah, minphuin hae kha thinriate na syde hae.

¹³Na ccungccaw hae kha khum khylan, chitui na thuh hae paw kha khum khylan nang tuh nae pou. Ccungccaw hoylei hae paw inn kya-e lu kha palae tui lan na miade zah, aleihpaw kyate innccukaly kyacia phe na zosah.

¹⁴A rhawkaw hae cciakhaetupaw kha amaw a the khate na thuingsah, minmin tuh kaening kha phiariphiarae nung khylan khiccung hawte oun thua hae, zya a rekuh hae paw ryachi hae kha ae lan a paccynkuh hae paw hawte mih lung atua.

¹⁵Na marang hae khate rili kha po he na zua tuh, athungpaw tui tuh athyhleihkuh.

¹⁶Tuh-e tuh he ka thae te ka thyngkuh; tuh-e roi keiccuze ka mung tuh athyngkuh. Ka ru tuh muee zah, ka ccu tuh athyngkuh. Kaening oun tuk hae paw ccungccaw hae tungvaw kya yn thua lanpaw vawsaw nin kha daebabi lan ka ngaw.

¹⁷Thaeku ku nynh apaw paw khyh zah, misu ku kya athae a um khyh zemah thuasah, oliv thing nynh athae thae khyh zah, loo kyate looh apou khyh zemah thuasah, tuukhia kya tuu um khyh zah, sahiin inn kya sahiin a um khyh zemah thuasah

¹⁸BAWIPAW kya ka lungtua cih zah, yn khumtu Pachia kya ka lungpaw cih.

¹⁹Bawipaw PACHIA tuh ka thawzung nynh thua; ka ccu kha sazuh ccu hawte a liazawsah zah, ahangpaw vawlan khe yn cciasah.