Read Zotung Chin ZEFANIAH 1 Bible Online

ZEFANIAH 1 - Zotung Chin bible

ZEFANIAH 1

¹Judah siapharan Amon ccapaw Josiah she lyakhe BAWIPAW bya tuh Zefaniah kalan yn thua; Zefaniah tuh Kushi ccapaw, Kushi tuh Gedaliah ccapaw, Gedaliah tuh Amariah ccapaw, Amariah tuh Hezekiah ccapaw nynh thua.

²Laephi vawlan umpaw atyn-are hynh khaleih ka roh cih, cite BAWIPAW nynh a ho.

³Ccungccaw te sarangpaw hae kha ka maemih cih hae; vaawlang e pavaw hae te rili kya-e ngasaw hae kha ka maemih cih hae. Ccungccaw hoylei hae paw kha ka khuliasakuh cih hae. Ccungccaw kha laephi vawlan te ka vua cih, cite BAWIPAW nynh a ci.

⁴Judah ram te Jerusalem kya a um hae paw balyn kha ka kuih ka dyngnua cih hae; Baal a beik hae paw a laehy hae paw te zohtuh ranpibawi hae min kha hynh-e hmin kyate ka vua cih hae;

⁵vaawlang e uccaw hae kha innccuvaw kyate a beiktu hae te BAWIPAW kha beik zah bya mang a kinpakuh pite, Milkom pachia min te bya a kinkuh hae paw kha mah ka vua cih hae.

⁶BAWIPAW kha zui leite nulang a maeleihkuh hae paw, BAWIPAW kha ccung leite tuanaw mah a ngiakuh lei hae paw kha ka vua cih hae.

⁷Bawipaw PACHIA malang khe daebabi lan um oh! Pawccecize BAWIPAW nin tuh anae vae; BAWIPAW nynh silawnaw kha a paccyn vae, a kopaw a mikhia hae kha a thyaasah vae hae.

⁸BAWIPAW silawnaw nin khe bawi hae, siapharan ccapaw hae te ramccang boeining te a ccaankuh hae paw balyn kha de ka tah cih hae.

⁹Tuin nin khe rhawlungrua vawlan po a kae hae paw balyn, mih bawipaw inn kha puathonaw te hynhunaw khate phe a biasah hae paw kha de ka tah cih hae.

¹⁰BAWIPAW nynh a hopaw tuh, tuin nin vae tuh, Ngasaw Koikua kya-e siaruanaw roi kha thuasah, Ccangningnaw khua kya-e rawkhuinaw roi kha thuasah, sangpyng hae kya-e ronaw roi kha thuasah thae athua cih.

¹¹Mortar kya um hae paw tuh a rah a khui hae, pawccecize kungku hae paw balyn tuh a roh vae hae; phua te kungku hae paw balyn tuh a zo vae hae.

¹²Tuin ccyh khe Jerusalem kha maeekhua te ka ccung cih, “BAWIPAW nynh ahoypaw thuasah, athahpaw thuasah pawpaw mah cyih lan khyh,” cite mih thinlung kya um zah, ahaw vawlan e atui hawte ngaengante a um hae paw kha de ka tah cih hae.

¹³Mih sisua kha luade athua cih zah, mih inn hae kha ro athua cih. Inn a sakku hae zemah umnah lan khyh hae; misu khokhu a raeku hae zemah tuin kya-e misutui kha neih lan khyh hae.

¹⁴BAWIPAW nin alesaepaw tuh anae vae, arangte yn naekuh vae; BAWIPAW nin kya-e roi tuh akhah, rhawkaw hae tuh myarya ccae lan a sia hae.

¹⁵Tuh-e nin tuh thinrianaw nin, lungriathaenaw te thinphangnaw nin, ronaw te maemihnaw nin, mohnaw te ngaethyanaw nin, maeking azi nin te marae zipingpaw mohnaw nin,

¹⁶koihkhawpaw khuapi hae te rhawvianaw innhangpaw hae kha rawsete mungkae tu nin te rhawtukte siarua nin nynh thua.

¹⁷Ccungccaw hae tungvaw tuhcihawpaw riathaenaw kha ka thuasah cih zah, mitmoh hae hawte a cceih cih hae; BAWIPAW tungvaw a sei hae keiccuze mih chii kha vuiping hawte laee athua cih zah, mih saw kha ia hawte vua athua cih.

¹⁸BAWIPAW a thinria nin tuh, mih sui te mih ngun nynh minmin kha khum kho lan khyh hae; a thinrianaw maee nynh laephi pynpi kha a u cih; laephi vaw um hae paw balyn kha arangte khaleih a thangsah cih hae.