Read Zotung Chin ZEFANIAH 3 Bible Online

ZEFANIAH 3 - Zotung Chin bible

ZEFANIAH 3

¹Rawse a mangpaw, a nungsikuhpaw te ccungccaw a tuaa a sahpaw khuapi hanlan ngaethya lan kou um!

²Tuh-e khuapi tuh BAWIPAW bya kha ngae khyh; thuiheinaw mah lawkuh khyh. BAWIPAW kha doliakuh khyh; a Pachia kalan naekuh khyh.

³Tuh-e khua lungkhu e bawi hae tuh palei a siapaw chindeih nynh thua hae; a kya-e byapiatu hae tuh awkhua cia pawpaw mah a cciataw lei hae paw, zete ccyh kya a khiakuhthya hae paw suizaw hae nynh thua hae.

⁴A profeh hae tuh tuanaw-roihnaw hoi lei hae paw te alungzi leipaw ccungccaw hae nynh thua hae, a ranpibawi hae nynh beikinnthyaa kha thusah hae zah, a kawbya kha a ro hae.

⁵Tuh-e lungkhu a umpaw BAWIPAW tuh ding zah, hoyleinaw kha rae khyh. Awkhua takyh, khuadaetakaw khe a byapianaw kha tyty a langsah zungzae; thuasalama a ding lei hae paw tuh maethya nyh khyh hae.

⁶Minphuin hae kha ka vua vae hae; mih khualungrua hae tuh aroh vae hae, laanpi hae kya humhung nynh mah a ccia khyh ccaw hae cite, khua lungkhu e laanpi hae kha ka ro vae hae; a umtu ccungccaw hae a um lei lan ciate mih khuapi hae kha ro athua vae hae.

⁷“Khuapi nynh kae kha yn rih ccaccing cih zah, ka thuiheinaw kha a lawkuh cih; tetuh a umnaw kha vuapya thua lan khyh zah, ka ccangpyanaw balyn kha papin ning lan khyh,” cite ka ho. Thuasalama mih cyisahnaw balyn kyakhe hoyleinaw rae kha a ryhua hae.

⁸Tukeiccuze BAWIPAW nynh a hopaw tuh, ccaekia lang tang khylan kae thoku nin cia yn la ngaw oh. Pawccecize minphuin hae kha suelua lan hae zah, peenaw hae kha pum lan hae, te ka thin-unaw, ka thinrianaw asopaw balyn kha mih tungvaw kya bu lan cite bya ka paeku vae; ka thinrianaw maee nynh laephi pynpi kha a u cih.

⁹Tuin ccyh vae tuh ccungccaw balyn nynh BAWIPAW min kha ko hae zah, lunglokute a rya a law nawlan hae, mih bya kha athyaapaw bya lang ka paleih cih.

¹⁰Ethiopia ram e vaw hae khuraw lang kya phiariphiarae um hae paw ka ccungccaw hae, kae yn beik hae paw nynh ka hanlan lasung kha yn ccyng cih hae.

¹¹Tuin nin vae tuh kae nae dounaw oh paw nae cyisahnaw balyn keiccuze nae maethah vae lan khyh; pawccecize pookute mih lungpawkhaekuh hae paw kha na kyate ka dee cih hae, nang tuh athyaapaw ka mua vawlan khe na lysakuh vae lan khyh.

¹²Pawccecize zakawsangsakuh hae paw te anyaa hae paw kha na ngaelung kya ka nungsya cih hae. Minmin nynh BAWIPAW min kyakhe khynnaw a ccungkuh cih hae.

¹³Israel hae kya-e a laehy hae paw nynh hoyleinaw kha rae lan khyh hae zah hynbya ho lan khyh hae, mih khalang lungkhu kya ahynhupaw lae um vae lan khyh. Tetuh minmin tuh humhung nynh mah rinaw pya leite rampaeekuh cih hae zah a rya cih hae.

¹⁴Pou Zion ccanung, accae lante hlawsahtua. Pou Israel, siatua! Pou Jerusalem ccanung, na thinlung balyn te lungtua lungpawte umtua!

¹⁵BAWIPAW nynh na tungvaw e detahnaw kha ccaring ae lawpya vae, na rhaw hae kha ccaring a dee vae hae. Israel siapharan, BAWIPAW tuh nae laku kya a um; na ri lanpaw ronaw kha um vae khyh.

¹⁶Tuin nin vae tuh, e bya hynh Jerusalem kalan hopya athua cih: Pou Zion, rih nan; na kuih thaw kha zyasah bung nan.

¹⁷BAWIPAW na Pachia tuh na ngaelung kya a um, taenaw ae pyapaw athungpaw nynh thua; na tungvaw a lungtua cih zah a lungpaw cih, a sungsahnaw kyakhe nang kha ae thawsah thui cih; poi nin lya hawte phe ccae lan hlawsah te na tungvaw a lungtua cih,

¹⁸Na kyate vawsawnaw kha ka lah cih zah, tuh-e hanlan theihryakunaw kha na teing vae lan khyh.

¹⁹Tuin ccyh kyakhe nang ae tuaa ae sahtu hae balyn kha kamaw nynh ka cyih cih hae. Ccukhou hae kha ka khum cih hae zah, ccungccaw hae nynh a ccuepe ry lei hae paw kha ka suelua cih hae, mih maethyanaw kha thehoy ccounaw lang ka paleih cih zah, laephi pynpi kya minthaannaw ka pya cih hae.

²⁰Nanning suelua ccyh he yn thua te, inn lang kae cciakhae cih oh; pawccecize na muihnaw oh kyakhe he kae kikhae oh te, nanning kha laephi ccungccaw balyn laku kya minthaannaw te thehoynaw kae ccousah cih oh, cite BAWIPAW nynh a ci.