Read Zotung Chin HAGGAI 1 Bible Online

HAGGAI 1 - Zotung Chin bible

HAGGAI 1

¹Siapharan Darias nynh siapharan lang a tangnaw kum ningnaw, sawpaw sah taruhnaw, nin kheit nin khe BAWIPAW bya tuh profeh Haggai kyate Judah ram uktu bawi, Shealtiel ccapaw Zerubbabel kalan te Jehozadak ccapaw Joshua, ranpibawi lupi kalan yn thua.

²Vaaw BAWIPAW nynh hynhte a ho: E ccungccaw hae nynh BAWIPAW inn saknaw ccyh zaw loh khyh, a ci hae.

³Tetuh BAWIPAW bya tuh profeh Haggai kalan yn thua zah a hopaw tuh:

⁴E inn tuh rohbabu lan a um lyaze, naemaw tuh nae inn ahoyhoypaw kya um ccyh athua zawtou?

⁵Tukeiccuze atu vaaw BAWIPAW nynh a hopaw tuh: Nae hiinzia hynh tuaku tua oh.

⁶Nanning nynh ccacii patae na tu oh zah, looh beihtaraw kyalya kha na rue oh; na ae oh zemah phe byn lan na ae khyh oh; na nia oh zemah phe byn lan na neih khyh oh, boeining na lawku oh zemah, lu kheit sanmah a khualung khyh; nae ryalaw mee na mue oh zemah a uapaw zaw lungkhu lang sang khylan na mue oh.

⁷Vaaw BAWIPAW nynh hynhte a ho: Nae hiinzia kha tuaku tua oh.

⁸Mua lang kaete thing kha lah oh lah, inn kha sak oh, tuhteze nynh tuh-e inn lungkhu khe ka lungrythua cih zah sawtuanaw ka ccou cih, cite BAWIPAW nynh a ci.

⁹Nanning nynh patae kha na ccung oh zemah na mue oh paw tuh beihtaraw; tuh-e tuh innvaw he na thuakhae oh te, ccaring ka mung. Pawccemou? cite vaaw BAWIPAW nynh a ci. Nanning balyn nynh naemaw inn raveih lang na ccue lya oh khe, ka inn tuh rohbabu lan a um keiccu nynh thua.

¹⁰Tukeiccuze luki lang e vaawlui nynh dangtui ccawsah khyh zah, laephi nynh ccathae pousah khyh.

¹¹Ram te mua hae kya thuasah, ccathae, misutui thawpaw, chitui kya thuasah, laephi kyate apoupaw miakaw kya thuasah, ccungccaw hae te sarangpaw hae kya thuasah, mih ryalawnaw balyn kya thuasah khuaakannaw kha ka konua vae.

¹²Tetuh Shealtiel ccapaw Zerubbabel, Jehozadak ccapaw Joshua, ranpibawi lupi te a laehypaw ccungccaw balyn nynh BAWIPAW mih Pachia bya kha thuasah, BAWIPAW mih Pachia nynh a sawpaw profeh Haggai bya kha thuasah ngae hae zah, ccungccaw hae nynh BAWIPAW raw kha a ri hae.

¹³Tetuh BAWIPAW zeccuetu Haggai nynh ccungccaw hae kyakhe, “BAWIPAW nynh nae kya ka um,” a cipaw BAWIPAW bya kha a hopya hae.

¹⁴Judah ram uktu bawi, Shealtiel ccapaw Zerubbabel, te Jehozadak ccapaw Joshua, ranpibawi lupi, te a laehypaw ccungccaw hae balyn kha BAWIPAW nynh mih lung a thosah hae; minmin nynh oun cceih hae zah mih Pachia, vaaw BAWIPAW inn kyakhe,

¹⁵sawpaw sah taruhnaw, nin kuin lae pali nin khe rya a law hae.