Read Zotung Chin HAGGAI 2 Bible Online

HAGGAI 2 - Zotung Chin bible

HAGGAI 2

¹Darias nynh siapharan lang a tangnaw kum ningnaw, sawpaw sah sarinaw, nin kuin lae kheit nin khe BAWIPAW bya tuh profeh Haggai kalan yn thua zah:

²Judah ram uktu bawi, Shealtiel ccapaw Zerubbabel, te Jehozadak ccapaw Joshua, ranpibawi lupi, te a laehypaw ccungccaw hae balyn kha hynhte hopah hae.

³E inn langmawlya a phu-enaw kha a muih boi paw nanning laku kya hummou a um ung? Atu hynh pawtemou na muih oh? Nae muihnaw kya accakaepaw hawte thua khyh tou?

⁴Tuhzemah, pou Zerubbabel, na rawthung sah, cite BAWIPAW nynh a ci. Pou Jehozadak ccapaw Joshua, ranpibawi lupi, na rawthung sah; ram kya-e ccungccaw hae balyn, nae rawthung sah, cite BAWIPAW nynh a ci; ryalawtua oh, cite vaaw BAWIPAW nynh a ci,

⁵Izip ram kyate na pou lya oh ze, bya kae kinpyaku oh thyhte, nae kya ka um, a ci. Ka muisaw tuh nae laku kya a um; rih nan oh.

⁶Pawccecize vaaw BAWIPAW nynh hynhte a ho: sosoh aro te, vaawlui, laephi, rili te laerou kha vaekheit bua ka hy ung cih;

⁷minphuin hae balyn kha ka thyngsakuh cih hae, tuhteze nynh minphuin hae balyn kya-e sisua tuh yn thua cih zah, e inn hynh phu-enaw te phe ka biasah cih.

⁸Sui te ngun tuh ka kya-e nynh thua cite vaaw BAWIPAW nynh a ci.

⁹E inn nyalang e a phu-enaw tuh langmawlya e a phu-enaw laeze alehua cih, cite vaaw BAWIPAW nynh a ci; e hmin kyahin hoirumnaw ka nung cih, cite vaaw BAWIPAW nynh a ci.

¹⁰Darias nynh siapharan lang a tangnaw kum ningnaw, sawpaw sah takuanaw, nin kuin lae pali nin khe BAWIPAW bya tuh profeh Haggai kalan yn thua zah:

¹¹Vaaw BAWIPAW nynh hynhte a ho: Ranpibawi hae kha byapaenaw kong khiatua hae:

¹²Lukhakheit nynh athyaapaw saw kha a boeining te lungde zah, tuh-e tuhte sanlou, saw avoipaw, misutui, chitui, looh hankhakheit kha a ty lanze, tuh-e tuh athyaapaw lang a tang cih tou? cite khia hae zah, ranpibawi hae nynh, “Thyaa lan khyh,” a ci hae.

¹³Tetuh Haggai nynh, “Michi rhua a ty keiccuze athyaa leipaw lukhakheit nynh hynh-e hae ccangkhakheit kha a ty lanze, tuh-e tuh athupaw lang a tang cih tou?” cite khia hae zah, ranpibawi hae nynh, “Athupaw lang a tang cih,” a ci hae.

¹⁴Te Haggai nynh, e ccungccaw hae te ka malang um hae paw hynh-e minphuin hae tuh tuhawte nynh athua hae, cite BAWIPAW nynh a ci; mih kuih te rya a law hae paw miakaw tuh tuhawte nynh athua; minmin nynh silawhang vawlan a pya hae paw tuh thyaa khyh.

¹⁵Thuasalama atunin te malang ccyh kya yn thua lanpaw kha tuatua oh. BAWIPAW beikinn kya lung ccangkheit vawlan lung ccangkheit khangthy athua maw kya pawtemah na um oh?

¹⁶Lukhakheit nynh looh apumkuhpaw phu kuin kalan he a ccia ze, phu haw kyalya a um; lukhakheit nynh misutui ang sung pangaw kha law lan cite misu mianaw akhu kalan he a ccia ze, ang kuin kyalya a um cih.

¹⁷Naemaw te nae ryalaw athae-apaw balyn kha aku chinaw, aku rounaw te hya khate de kae tah oh; tuhzemah ka kalan nae kithui khyh oh, cite BAWIPAW nynh a ci.

¹⁸Sawpaw sah takuanaw, nin kuin lae pali nin, atunin te malang tuh hoyte tua ccavae oh. BAWIPAW beikinn aleihpaw na bing nin oh kyate hoyte tua ccavae oh:

¹⁹Byng kya ccacii ccangkheit san a um tou? Misu ku, thaeku ku, ccalee ku te oliv ku hae tuh athae thae loh khyh hae tou? Atunin te vae tuh hythua kae pya vae cih oh.

²⁰Tuh-e sawpaw nin kuin lae pali nin khe, BAWIPAW bya tuh Haggai kalan vae ningnaw yn thua:

²¹Judah ram uktu bawi Zerubbabel kyakhe, vaaw te lae kha ka hy vae cih,

²²peenaw hae kya-e bawitungkhung hae kha ka dawleih vae cih; minphuin hae kya-e peenaw thawzung kha ka roh vae cih, te marangle hae te a ccikuhtu hae kha ka dawleih vae cih hae; marang hae te a ccikuhtu hae lu kheit cci tuh mih ban hae thaloi khate a chih cih hae.

²³Vaaw BAWIPAW nynh a hopaw tuh, pou ka ryalahtu Zerubbabel, Shealtiel ccapaw, tuin nin khe nang kha kae lah cih zah minkhianawpaw kuihpu lang kae rae cih, cite BAWIPAW nynh a ci; nang kha phe kae po vae, cite vaaw BAWIPAW nynh a ci.