Read Zotung Chin ZEKHARIAH 11 Bible Online

ZEKHARIAH 11 - Zotung Chin bible

ZEKHARIAH 11

¹Pou Lebanon, na sidar thing hae kha maee nynh a u ccaw, na thuakaw hae kha hungtua!

²Pou maeccaw ku hae, rawtua oh, pawccecize sidar thing hae tuh pu hae zah, asung-epaw thing hae tuh aroh vae hae! Bashan kya umpaw rantah thing hae, rawtua oh, pawccecize myarya lungpaw tuhpi thing hae tuh nge athua vae hae!

³Tuurin hae nynh mih phu-enaw azo keiccuze a raw hae paw tuh ngaetua oh! Jordan vahue a phu-enaw tuh aro vae keiccuze chindeih hae siaruanaw tuh ngaetua oh!

⁴BAWIPAW ka Pachia nynh hynhte a ho: Chia lanpaw tuuphu kha a rintupaw hawte thuatua oh.

⁵Tuh-e tuu hae kha a retu hae nynh a chia hae zemah detahnaw teing khyh hae; a zuatu hae nynh, “Kae tuh ka hoirum vae keiccuze BAWIPAW tuh thehoyte um sah,” a ci hae; minmin a rintu hae tuurin hae maw nynh tuu hae kha ngaethyaumsah khyh hae.

⁶Ram lungkhu um hae paw kha ngaethya ka umsah vae lan khyh hae, cite BAWIPAW nynh a ci. Ccungccaw miakaw kha mih innpaw kuih kalan te mih siapharan kuih kalan ka ap cih hae; tuh-e hae nynh ram kha a roh cih hae zah, mih kuih kyate lu kheit sanmah ka luesah lan khyh hae.

⁷Tukeiccuze tuu te kungku hae paw ccelang, kae tuh chia lanpaw tuu hae kha a rintupaw lang ka tang. Hoitang ccangning kha ka law; ccangkheit kha Thawccinaw cite min ka phu zah, ccangpaw ccangkheit kha Lungngingnaw cite min ka phu, te tuu hae kha ka rin hae.

⁸Sawpaw sah kheit lungkhu tuurin lu thum kha ka vua hae, pawccecize mih tungvaw ka ngaesang kho vae khyh, minmin nynh mah kae kha yn hua hae.

⁹Te kae nynh, “Kae tuh nanning ae rintu oh paw ka thua vae lan khyh. A chih cih paw tuh chih sah; ro athua cih paw tuh roh sah; a laehy hae paw tuh sa kheit te sa kheit aekuh hae sah!” cite ka ho.

¹⁰Ccungccaw hae balyn ryte ka raepaw byakinnaw kha rote, Thawccinaw cikuhpaw ka hoitang kha ka lah zah ka khya.

¹¹Tukeiccuze tuin nin khe tuh-e byakinnaw tuh ro thua zah, kae yn do hae paw, tuu te kungku hae paw nynh tuh-e tuh BAWIPAW bya nynh thua cipaw a ny hae.

¹²Te kae nynh minmin kha, “Ahoy na ci oh ze, ka ryalaw mee yn pya oh; na ci khyh oh ze yn pya nan oh,” ka cipya hae. Tukeiccuze ka ryalaw mee lang ngunphua shekel sung thum kha a tou hae.

¹³BAWIPAW nynh kae kha, “Khah-e ngunphua kha sisua bawng lungkhu lang vuatua,” yn cipya. Ka mee yn khyanaw hae paw ngunphua myarya lungpaw shekel sung thum kha ka lah zah, BAWIPAW inn kya umpaw sisua bawng lungkhu lang ka vua.

¹⁴Tetuh Judah te Israel laku uno kyngkunaw kha rote, Lungngingnaw cikuhpaw ccangningnaw ka hoitang kha ka khya.

¹⁵Te BAWIPAW nynh kae kha yn hopah zah: Ccungkia leipaw tuurinpaw kya-e uccaw hae kha bua lawtua.

¹⁶Pawccecize ram lungkhu kya tuurin lu kheit kha ka langsakuh cih, aning nynh vyavya chihpaw tuu hae kha pawlangria lan khyh, laanpi a vae paw tuu kha ccung lan khyh, vaemaw a muepaw kha dansah lan khyh, adanpaw tuu kha looh dang lan khyh, thuasalama athopaw tuu hae kha tuh mih ccumakeih kha a zu cih zah a ae cih.

¹⁷Tuuphu a ccuetawpaw, ccungkia leipaw ka tuurin hanlan ngaethya lan kou um! A kuih te a ranglang mit kha thaloi nynh ccawphu vae sah! A kuih tuh khaleih rou sah, a ranglang mit tuh marae moh sah! a ci.