Read Zotung Chin MALAKHI 2 Bible Online

MALAKHI 2 - Zotung Chin bible

MALAKHI 2

¹Pou ranpibawi hae, e kawpyanaw hynh nanning hanlan nynh thua.

²Nanning nynh ka bya na ngae khyh oh zah, ka min kha phu-enaw pya lan nae thinlung kya na ccykeku khyh zetuh, nae tungvaw thyalawnaw ka thuasah cih zah hythuanaw na ccou oh paw kha thya ka law cih, cite vaaw BAWIPAW nynh a ho; nae thinlung kya na ccykeku khyh oh keiccuze, hythuanaw na ccou oh paw kha thya ka law ccaccing vae.

³Nae ciihan hae kha de ka tah cih hae zah, sahiinpaw ia athuapaw nae kya-e pyapaw uccaw khate nae mae kha kae noi cih oh, te ka malang te ccaring kae dee cih oh.

⁴Tetuh Levi phin ryte ka raepaw byakinnaw tuh atyn nawlan, e kawpyanaw hynh nanning kalan kae pya vae oh cipaw nyh oh, cite vaaw BAWIPAW nynh a ci.

⁵Levi phin ryte ka raepaw ka byakinnaw tuh hiinnaw byakin te daenaw byakin thua zah, tuh-e tuh aning kha ka pya; e hynh sawtuanaw hanlan nynh thua, aning nynh kae kha saw yn tua zah ka min raw kha a rih.

⁶Ahmepaw ccangpyanaw kha ho zah, a munglae kya dingleinaw kha muih lan um khyh. Daenaw te dingnaw thyhte kae te kae cceihkheih zah, ccungccaw patae kha hoyleinaw kyate a kikhae hae.

⁷Ranpibawi munglae nynh nynaw kha phang a rin cih zah, ccungccaw hae nynh a munglae kyakhe ccangpyanaw kha a ccung cih hae, pawccecize aning tuh vaaw BAWIPAW kya-e locceihtu nynh thua.

⁸Thuasalama nanning tuh tuh-e laanpi kyate na maeleihkuh vae oh; na ccangpyanaw oh khate ccungccaw patae kha na khuliasakuh vae oh; Levi phin ryte ka raepaw byakinnaw kha na ro vae oh, cite vaaw BAWIPAW nynh a ci,

⁹tuhcite nanning nynh ka laanpi kha zui leite na ccangpyanaw oh kya mirymihua na tua oh keiccuze ccungccaw balyn nynh pawlangria lei hae paw te thethyasah hae paw lang kae rae oh.

¹⁰Aening balyn tuh paaw lu kheit kyalya ah hoi khyh oh tou? Ccangkheit kyalyapaw Pachia nynh aening hynh oun rae khyh tou? Ah minpaaw hae kya-e byakinnaw kha thusahte, pawccemou lu kheit te lu kheit laku lungzinaw ah hoi khyh oh?

¹¹Judah tuh a lungzi vae khyh, Israel te Jerusalem kya anungsikuhpaw kha rae athua vae; BAWIPAW nynh a rypaw beikinnthyaa kha Judah nynh thusah zah, ramccang pachia ccanung kha zu lang a umkhae.

¹²Tuhcite a cyihpaw miakaw—ccangpahtu thuasah, a ccangkuhtu thuasah, vaaw BAWIPAW kalan pyapaw uccaw a ccyngpaw thuasah BAWIPAW nynh Jakob umnaw hmin kyate dee vae sah.

¹³E hynh mah na cyi ung oh: BAWIPAW silawhang tuh mitphi te thuasah, rawkhuinaw te hawkhaekunaw khate thuasah na bong oh, pawccecize aning nynh pyapaw uccaw kha a peki khyh, nae kuih kya-e silawnaw kha mah a lungrythua khyh zah ccou khyh.

¹⁴Nanning nynh, “Pawkeiccumou athua?” cite na khia oh. Pawkeiccumou ci ze, na ccangvae lya-e na zu tuh byakinnaw te mang na umkheih oh pite, aning tungvaw na lungzi khyh, te BAWIPAW tuh nang te tuh-e na zu laku kya ccaekia nynh thua.

¹⁵Ccangkheit kyalyapaw Pachia nynh amaw kha rae khyh tou? A pynsaw te a muisaw tuh namaw kya-e nynh thua. Ccangkheit kyalyapaw Pachia nynh pawmou a ry? Pachia rawrihpaw ciihan kha nynh a ry. Tukeiccuze naemaw te naemaw tuakuh oh lah, humhung nynh mah a ccangvae lya-e a zu tungvaw lungzi leite um nan sah.

¹⁶Zu myanaw kha thuasah, zu tungvaw rysawthyate cyisahnaw kha thuasah ka hua, cite Israel Pachia, vaaw BAWIPAW nynh a ho. Tukeiccuze nae thinlung kya raeringkuh oh lah, lungzi leite um nan oh.

¹⁷Nae bya te BAWIPAW kha phe na nynsah vae oh. Nanning nynh, “Pawcitemou kae nynsah?” na ci oh. “Hoyleinaw a raetu hae balyn tuh BAWIPAW muihnaw kya ahoy hae, te mih tungvaw kya a lungrythua,” cite na ho oh zah, “Byading Pachia tuh teimou a um?” cite khiate na nynsah oh.