Read Zotung Chin MATTHAI 10 Bible Online

MATTHAI 10 - Zotung Chin bible

MATTHAI 10

¹Jesu nynh a zuitu hae lu haw lae ning kha amaw kalan ko hae zah athyaa leipaw muisaw hae dee khonaw te ccinaw aphuinphuin te ccihawnaw miakaw dansah khonaw kaw a pya hae.

²Locceihtu hae lu haw lae ning min tuh: masaty, Peter cite a ko hae paw Simon, te a neitaw Andru, Zebedi ccapaw James, te a neitaw Johan;

³Filip te Bartholomew; Thomas te ngunto khoipaw Matthai; Alfeas ccapaw James te Taddias;

⁴Kanaan khuapaw Simon, te Jesu a pheetupaw Judas Iskariot nynh thua hae.

⁵E lu haw lae ning hynh Jesu nynh saw hae zah hynhte kaw a pya hae: “Zenta hae ram lang la cceih nan oh, Samaria hae khua lang mah la tee nan oh.

⁶Israel minphuin kyaze azopaw tuu hae kalan palia la cceih oh.

⁷Na ccia vae oh ze, ‘Vaawlang peenaw tuh anae vae,’ cite thehoypaw kha la siakhae oh.

⁸Ngeccih hae kha la dansah oh, a chih hae paw kha la thoosah oh, vaethyakae hae paw kha la thyaasah oh, raerangsaro hae kha la dee oh. Nanning tuh amee pya leite na mue oh zah, amee lawku leite la pya oh.

⁹Nae phuabu kya sui, ngun te sohinphua kha la sangkuh nan oh.

¹⁰Khuaccong nawlan sohrae, angki zung ning, phanah hae te hoitang hae mah phukuh nan oh; pawccecize ryalahtupaw tuh looh dang lan accan.

¹¹Khuapi lang thuasah, khua taraw lang thuasah na tee vae oh ze, tuin khua kya angaekuhpaw innccong kha la khia oh lah tuin khua kyate na pou mawlaezung oh tuin kya la um oh.

¹²Inn lungkhu lang na tee vae oh ze, ‘Nae kya daenaw um sah,’ cite la beih oh.

¹³Tuh-e inn tuh angaeku ze nae kya-e daenaw tuh tuh-e innbyn hae kya la um sah; thuasalama angaeku khyh ze, nae kya-e daenaw tuh naemaw kalan la ki sah.

¹⁴Te humhung zemah nanning kha innccong ae doih oh zah nae bya kha mah a ngae khyh ze, tuh-e inn, tuhkhyhze tuh-e khuapi kyate he na pou oh te, nae ccu kya-e vuiping kha la khuanua sya oh.

¹⁵Byaccaccing kae hopya oh, byapia nin kya tuh-e khuapi hanlan laeze Sodom te Gomorrah khua hanlan ngaesang kho a umhua cih.

¹⁶“Ngaetua oh! Suizaw hae laku tuu hae saw hawte nanning kha kae saw oh, tukeiccuze hupaw hawte nae lunghaw sah lah vahu hawte nae lungne sah.

¹⁷Ccungccaw hae kha la raeringkuh oh; pawccecize minmin nynh zung lang ae ap cih oh zah mih sinakok hae kya ae bua cih oh.

¹⁸Kae ka keiccuze ram uktu hae te siapharan hae malang ae thuakhae cih oh zah, minmin te Zenta hae kya ccaekia lang na tang cih oh.

¹⁹Minmin nynh he ae ap vae oh ze, pawmou ka ho cih, pawtemou ka ho cih cipaw nae lungvawsaw nan sah; pawccecize tuh-e ccyh kya na ho lan oh paw kha pya na thua cih oh.

²⁰Pawccecize a ho cih paw tuh naemaw thua khyh, nae Paaw Muisaw nynh nanning kyate a ho cih.

²¹Uno nynh a uno toulou kha chinaw kalan yn ap cih, paaw nynh a ccaaw kha yn ap cih; ccaaw hae nynh nungpaaw hae kha oun rawse cih hae zah minmin kha oun chisah cih hae.

²²Kae ka min keiccuze ccungccaw balyn nynh nanning kha ae hua cih oh. Thuasalama athangnaw cia a tynpaw tuh khum athua cih.

²³Khua khuakheit kya ae tuaa ae sah oh ze, khua ccanglang la ccue oh; pawccecize byaccaccing kae hopya oh, Ccungccaw Ccapaw yn thua maw nanning nynh Israel khua miakaw kalan na cceih kou lan khyh oh.

²⁴“Siaimua tuh a sazae laeze thyahua khyh, see mah a bawipaw luki um khyh.

²⁵Siaimua nynh a sazae hawte athua ze azaw vae, see mah a bawipaw hawte athua ze azaw vae. Minmin nynh inn hoitu kha Beelzebul cite a ko hae ze a innbyn hae thathy tuh athah huapaw min te khaw a ko vae cih hae!

²⁶“Tukeiccuze minmin kha la rih nan oh; pawccecize alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.

²⁷Mohnaw kya kae hopya oh paw kha awnaw kya la ho oh; nae nakaring kya zya na thae oh paw kha innccukaly kyate la ho oh.

²⁸Pyn tuh theih kho salamah muisaw a theih kho lei hae paw kha la rih nan oh; muisaw te pyn kha parouhte hell kya a roh khopaw raw kha la rih oh.

²⁹Rithya sa ning kha phuapia pia kheit lang zua khyh hae tou? Tuh-e rithya sa kheit sanmah nae Paaw kaw leite laekhu lang ccah lan khyh.

³⁰Nae lu kya-e nae sangrua kha heize marya ria athua.

³¹Tukeiccuze rih nan oh, nanning tuh rithya patae laeze nae phutehua.

³²“Humhung zemah ccungccaw hae malang kae kha ccaekia yn khan zetuh tuh-e paw kha vaawlang umpaw ka Paaw malang ccaekia ka khanru cih.

³³Thuasalama humhung zemah ccungccaw hae malang kamaw kha yn vuapaw tuh vaawlang umpaw ka Paaw malang kae nynh mah ka vuaru cih.

³⁴“Laephi vawlan daenaw thuakhae khylan nynh yn thua cite tua nan oh, daenaw thuakhae khylan kae thua khyh, thaloi saw khylan nynh kae thua.

³⁵Ccapaw nynh a paaw, ccanung nynh a nung, monung nynh a ninnung kha rawsesah khylan nynh kae thua.

³⁶Amaw a rhaw hae tuh amaw a innbyn hae toulou kha yn thua cih.

³⁷Humhung zemah kae laeze a paaw khyhze a nung a sungsah huapaw tuh kae te ngaekuh khyh; humhung zemah kae laeze a ccapaw khyhze a ccanung a sungsah huapaw tuh kae te ngaekuh khyh.

³⁸Humhung zemah amaw a vaelantung kha puihku leite kae yn zuipaw tuh kae te ngaekuh khyh.

³⁹A hiinnaw a muihkuhpaw ccungccaw tuh hiinnaw kha a shung cih, kae ka keiccuze a hiinnaw a shungpaw tuh hiinnaw kha a muihkuh cih.

⁴⁰“Humhung zemah nanning leh ae khan oh paw tuh kae kha leh yn khanpaw nynh thua, te humhung zemah kae kha leh yn khanpaw tuh kae yn sawtupaw kha leh a khanpaw nynh thua.

⁴¹Humhung zemah profeh lu kheit kha profeh athua keiccuze leh a khanpaw tuh profeh kya-e lasung kha a mue cih, te humhung zemah miding lu kheit kha miding athua keiccuze leh a khanpaw tuh midingpaw kya-e lasung kha a mue cih,

⁴²byaccaccing kae hopya oh, humhung zemah hynh-e hae kyaze adih huapaw kha ka zuitu athua keiccuze tuikyaa banang nang kheit a pyapaw tuh a ryalaw mee shung lan khyh,” a cipya hae.