Read Zotung Chin MATTHAI 13 Bible Online

MATTHAI 13 - Zotung Chin bible

MATTHAI 13

¹Tuin nin kyakhe Jesu tuh inn kyate pou zah rili kin khe a haung.

²Myarya lungpaw ccungccaw zapi nynh amaw kalan oun sueluakuh hae keiccuze Jesu tuh kohlung lungkhu lang tee zah a haung; te ccungccaw zapi balyn tuh varang langkhe a thadyn hae.

³Te Jesu nynh minmin kha tousenaw phungpaw hae te bya patae a hopya hae. A hopaw tuh: “Ngaetua oh! Ccacii vuatu lu kheit tuh ccacii vua lan a cceih.

⁴Ccacii kha vua zah, ccacii abang tuh laanpi pe khe ccah zah pavaw hae nynh oun thuanua hae zah karyh a tuh hae.

⁵Abang tuh laephi zya zah lungpyng alungnaw kya accah; laephi thaawkalae a ci khyh keiccuze taloi a po hae.

⁶Thuasalama khuanin he yn thua tuh, tharui a saw khyh keiccuze karae arou hae.

⁷Abang ccacii tuh hinpaw laku ccah zah hinpaw nynh lethin zah phang a lungde.

⁸Thuasalama ccangpaw ccacii hae tuh lae hoy kya ccah hae zah abang tuh leit za kheit, abang tuh leit sung taruh, abang tuh leit sung thum avoi.

⁹Thaenaw nakaring a hoipaw tuh thae sah!” a ci.

¹⁰Te zuitu hae nynh amaw kalan oun cceih hae zah, “Pawccemou tousenaw phungpaw hae te minmin kha na hopya hae?” cite a khia hae.

¹¹Jesu nynh khung hae zah, “Pawccecize nanning tuh vaawlang peenaw kya-e byakhupaw nynaw kha pya na thua oh, thuasalama minmin tuh pya thua khyh hae.

¹²Pawccecize a hoipaw ccungccaw kha pyachih athua cih zah patae a hoi cih; thuasalama a hoi leipaw ccungccaw tuh a hoi thypaw maw kha lawpya athua cih.

¹³Tukeiccu nynh minmin kha tousenaw phungpaw hae te ka hopya hae; pawccecize minmin tuh a do hae zemah muih khyh hae, a ngae hae zemah thae khyh hae, thae mah thaethya khyh hae.

¹⁴Te Isaiah nynh a la hopaw bya tuh minmin kya accing vae; a la hopaw tuh: ‘Ngae tuh na ngae cih oh zah kharouh na thaethya lan khyh oh; do tuh na do cih oh zah kharouh na muih lan khyh oh.

¹⁵Pawccecize hynh-e ccungccaw hae thinlung tuh marae aping, mih nakaring tuh phe apan, kae mit te kae muih khyh ccaw cite phang masi hae. Tuhkhyhze tuh mih nakaring nynh a thae cih zah, mih lung nynh a nyhthya cih, te ka kalan oun maekuh cih hae zah minmin kha phe ka dansah cih hae paw,’ a ci.

¹⁶Thuasalama nanning tuh nae mit nynh ngawmuih zah nae nakaring nynh naw a thae keiccuze lungtua hae paw nynh na thua oh.

¹⁷Byaccaccing kae hopya oh, profeh hae patae te adingpaw ccungccaw hae nynh na muih oh paw uccaw hae hynh muih a ry hae zemah muihbua khyh hae; na thae oh paw hynh thae a ry hae zemah thaebua khyh hae.

¹⁸“Tukeiccuze ccacii vuatupaw tousenaw phungpaw kong hynh ngaetua oh.

¹⁹Lukhakheit nynh peenaw kong hopaw bya kha he a thae tuh thaethya khyh, te mihoy leipaw nynh yn thua zah a thinlung kya vuapaw ccacii kha dae a lawpya. Tuh-e tuh laanpi pe vuapaw ccacii kha nynh thua.

²⁰Lung alungnaw kya vuapaw ccacii tuh thehoypaw bya kha thae zah vaekheihmawte lungtuate a lawkuhpaw kha nynh thua.

²¹Tuhzemah aning tuh tharui hoi khyh zah sosoh rou nynh atyn; thehoypaw bya keiccuze vawsawnaw te tuaasahkunaw he yn um tuh a lung palou thang.

²²Hinpaw hae laku vuapaw ccacii tuh thehoypaw bya kha thae salamah laephi vawlan thinphangnaw te hoirum rynaw nynh tuh-e bya tuh phang lungde zah athae thae kho vae khyh.

²³Thuasalama lae hoypaw kya vuapaw ccacii tuh thehoypaw bya kha thae zah a thaethyapaw ccungccaw nynh thua; athae kha thae zah abang tuh leit za kheit, abang tuh leit sung taruh, abang tuh leit sung thum a pousahpaw ccungccaw kha nynh thua,” a ci.

²⁴Jesu nynh ccangpaw tousenaw phungpaw a hopya hae paw tuh: “Vaawlang peenaw tuh a loo kya ccacii hoypaw a vuapaw ccungccaw te nynh aloku.

²⁵Ccungccaw hae a i lya hae khe a rhawpaw nynh yn cceih zah looh hae kyakhe lonua mung hae kha vua zah a cciataw.

²⁶Thuasalama looh tuh yn po zah avui he yn pou tuh lonua hae mah oun langkuh bua hae.

²⁷Tukeiccuze inn hoitu a see hae nynh a kalan oun cceih hae zah, ‘Bawipaw, na loo kya ccacii hoypaw khaw na vua? Paw kyate mou lonua hae hynh oun pou hae?’ cite a khia hae.

²⁸Tuh-e paw nynh, ‘Rhaw lu kheit nynh e hynh a cyih,’ a cipya hae. See hae nynh, ‘Tuhteze kaening nynh kae la ccianua sah lah, lonua hae kha kae la khaee ze na ry tou?’ a ci hae.

²⁹Thuasalama aning nynh, ‘Tuhte thua khyh, lonua hae na khaee lya oh khe, looh kha na khaeebia sei cih oh.

³⁰Loohrue ccyh azaw makhia pynkheihlan lekheih hin hae sah; loohrue ccyh kya loohruetu hae kha, Nanning nynh lonua hae kha khaee ty oh lah maee te soi khylan tung oh, te looh kha ka byng lungkhu lang ruin oh,’ ka cipah cih hae,” a cipya hae.

³¹Jesu nynh ccangpaw tousenaw phungpaw a hopya hae paw tuh: “Vaawlang peenaw tuh ccungccapaw lu kheit nynh mungngia cii kha lah zah a loo kya a vuapaw te nynh aloku.

³²Mungngia cii tuh ccacii hae balyn kyaze adih huapaw nynh thua; thuasalama tuh-e nynh he yn le vae tetuh enaw-eho hae lakuze ale huapaw lang te thingku lang phe a tang; te vaawlang e pavaw hae nynh oun zou hae zah tuh-e aran hae kyakhe bu a luaku hae,” a ci.

³³Ccangpaw tousenaw phungpaw a hopya hae paw tuh: “Vaawlang peenaw tuh ransi te nynh aloku; nopi lu kheit nynh ransi kha lah zah vaepoi ke kethum kya phing zah, tuh-e vaepoi phe a thosahpaw ransi te nynh aloku,” a ci.

³⁴E akonglang hae balyn hynh Jesu nynh ccungccaw zapi kha tousenaw phungpaw hae te a hopya hae; tousenaw phungpaw leite minmin kha bya hopah khyh hae.

³⁵Tuh-e tuh profeh nynh, “Ka khalang ka aw cih zah tousenaw phungpaw hae kha ka ho cih, laephi tho takaw kyate thuruhpaw uccaw hae kha ka ho cih,” cite a hopaw bya accing nawlan nynh thua.

³⁶Jesu nynh ccungccaw zapi kha cciataw hae zah inn lungkhu lang a tee; a zuitu hae nynh amaw kalan oun thua hae zah, “Loo kya-e lonua hae tousenaw phungpaw kong kha asuilan beih oun hopya tua,” a cipya hae.

³⁷Jesu nynh, “Ccacii hoypaw a vuatupaw tuh Ccungccaw Ccapaw nynh thua.

³⁸Loo tuh laephi nynh thua; ccacii hoypaw tuh peenaw ccaaw hae nynh thua; lonua hae tuh mihoy leipaw ccaaw hae nynh thua.

³⁹Tuh-e lonua mung hae a vuapaw rhaw tuh Satan nynh thua; loohrue ccyh tuh laephi she athangnaw nynh thua; te loohruetu hae tuh vaaw hae nynh thua hae.

⁴⁰Tukeiccuze lonua hae tuh suelua hae zah maee kya a soi hae hawte laephi she athangnaw kya acyikuh bua cih.

⁴¹Ccungccaw Ccapaw nynh a vaawccungccaw hae kha yn saw cih hae zah ccungccaw seinaw a raesah hae paw te hoyleinaw a rae hae paw balyn kha a peenaw kyate oun suelua cih hae.

⁴²Te minmin kha maeephupi lungkhu lang a phung cih hae, tuin kya rawkhuinaw te hawzynaw a um cih.

⁴³Te adingpaw ccungccaw hae tuh mih Paaw peenaw kya khuanin hawte a paw vae cih hae. Thaenaw nakaring a hoipaw tuh thae sah!

⁴⁴“Te vaawlang peenaw tuh loo kya thuruhpaw sisua te nynh aloku; tuh-e tuh ccungccapaw nynh he a muih tuh zya a thuruh, te tuh-e elang lungtuanaw te cceih zah a hoipaw balyn kha zua zah tuh-e loo tuh a re.

⁴⁵“Vaawlang peenaw tuh myarya ahoypaw palee hae a ccungkuhpaw kungkupaw te nynh aloku.

⁴⁶Tuh-e paw nynh myarya aphutepaw palee kha he a muih tuh, cceih zah a hoipaw balyn kha zua zah tuh-e palee tuh a re.

⁴⁷“Te vaawlang peenaw tuh: rili lungkhu lang vua hae zah ngasaw aphuinphuin a kyngpaw mia te nynh aloku.

⁴⁸Ngasaw te he abeih tuh ngasaw kyngtu hae nynh mia kha varang langkhe a sue hae, te haung hae zah ahoypaw ngasaw hae kha shua lungkhu lang sang hae zah ahoy leipaw kha a vua hae.

⁴⁹Tuh-e hawte laephi she athangnaw kya athua cih; vaaw hae nynh oun rung cih hae zah ccungccaw hoylei hae paw kha miding hae laku kyate thoh a phia cih hae.

⁵⁰Minmin kha maeephupi lungkhu lang a vua cih hae; tuin kya rawkhuinaw te hawzynaw a um cih,” a ci.

⁵¹Jesu nynh, “E bya hae balyn hynh na thaethya oh tou?” cite zuitu hae kha a khia hae. Minmin nynh, “Kae thaethya,” a ci hae.

⁵²Te Jesu nynh, “Tukeiccuze vaawlang peenaw kong ccangpya athua vae paw kawbya sazae miakaw tuh amaw a sisua bawng lungkhu te athawpaw te arynpaw uccaw hae yn thuakhaepaw inn hoitupaw te nynh aloku,” a cipya hae.

⁵³Jesu nynh tuh-e tousenaw phungpaw hae kha he a ho koute tuin kyate a pou.

⁵⁴Te amaw a khua lang he a thua tuh a khuaccaaw hae kha mih sinakok kyakhe a ccangpya hae; minmin tuh myarya mih ngaeangthua zah, “E paw nynh paw kyate mou hynh-e hawnaw te e ngaeangnaw rae khonaw hynh a mue?

⁵⁵E paw tuh lehccamapaw ccapaw thua khyh tou? A nung tuh Mary ci hae paw thua khyh tou? A neitaw hae tuh James, Joses, Simon te Judas thua khyh hae tou?

⁵⁶Te a ccianung hae tuh mih balynte aening ryte a um hae paw kha thua khyh tou? Tuhteze paw kyate mou e paw nynh e uccaw hae balyn hynh a mue?” a ci hae.

⁵⁷Tuhcite minmin nynh amaw kha a vua hae. Thuasalama Jesu nynh minmin kha, “Profeh hae tuh mimaw khua te mih innbyn kya holeite tuh sawtua leite um khyh hae,” a cipya hae.

⁵⁸Minmin nynh a zyn khyh hae keiccuze Jesu nynh tuin kya ngaeangnaw patae rae khyh.