Read Zotung Chin MATTHAI 21 Bible Online

MATTHAI 21 - Zotung Chin bible

MATTHAI 21

¹Jesu te a zuitu hae nynh Jerusalem lang naekuh hae zah Oliv Mua leihpaw Bethfeih khua he a thua hae tuh Jesu nynh zuitu lu ning kha saw hae zah,

²“Nae malang umpaw khua langkhe la cceih oh lah, a khii hae paw lann pinung te lann taraw kha ccahe na la muih cih oh; tuh-e lann hae kha oun supah oh lah ka kalan oun sue oh.

³Lukhakheit nynh ae khia oh ze, ‘Bawipaw nynh a peki,’ nae cipah cih oh; tetuh tuh-e paw nynh palou ae sawpah vae cih oh,” a cipya hae.

⁴Hynh-e tuh profeh nynh a la hosyapaw kha accing nawlan nynh thua; a hosyapaw tuh:

⁵“Dotua, na siapharan tuh na kalan yn cceih cciamang; aning tuh a lungnepaw thua zah, lann kha yn ccikuh, lann taraw kha yn ccikuh, cite Zion ccanung kha hopah oh,” acikuh.

⁶Zuitu hae nynh cceih hae zah Jesu nynh kaw a pya hae hawte a cyi hae.

⁷Lann pinung te lann taraw kha oun thuakhae hae zah lann hae tungvaw khe mih boei hae kha de hae zah tuh-e vawlan khe Jesu nynh a cciku.

⁸Myarya lungpaw ccungccaw zapi nynh mih uccaw hae kha laanpi kya a phaepya hae; mingccang hae nynh thingku kya-e thingnge hae kha bae hae zah laanpi kya a phaepya hae.

⁹Jesu malang a cceih hae paw te a nulang a zuikuh hae paw zapi hae nynh, “David Ccapaw, Hosanna! Bawipaw min te yn thuapaw tuh hythuaccou sah! Ahang huanaw kya Hosanna thua sah!” cite a sia hae.

¹⁰Jesu nynh Jerusalem lang he a tee tuh, khualae balyn tuh ngaluin-ngaluin ccae zah, “E paw hynh hummou athua?” a ci hae.

¹¹Ccungccaw zapi nynh, “E paw tuh Galilee ram e Nazareth paw profeh Jesu nynh thua,” a ci hae.

¹²Jesu nynh Pachia beikinn lungkhu lang tee zah beikinn kya a zuatu hae te a retu hae balyn kha a dee hae; phuaru hae paw mih ccaboi te vahu zua hae paw kya-e dahungnaw hae kha dawleihpah hae zah,

¹³“Ccathyaa kyaze, ‘Ka inn tuh sawsangnaw inn ci athua cih,’ cite azeikuh; thuasalama nanning nynh miruh hae karung lang na rae oh,” a cipya hae.

¹⁴Te mitzu hae te ccukhou hae nynh beikinn lang amaw kalan oun thua hae zah minmin kha a dansah hae.

¹⁵Jesu nynh a raepaw ngaeangnaw hae te imua hae nynh beikinn kya, ‘David Ccapaw kya Hosanna thua sah,’ cite a sia hae paw kha, ranpibawi lepaw hae te kawbya sazae hae nynh he muih hae tuh mih thinria zah,

¹⁶Jesu kha, “E imua hae nynh a ho hae paw tuh na thae tou?” a cipya hae. Jesu nynh, “Ou, ka thae; ‘Imua hae te matei zu hae paw nosi hae munglae kyate namaw thehoysahnaw kha na paccyn vae,’ acikuhpaw kha na ria boi khyh oh tou?” a cipya hae.

¹⁷Te minmin kha cciataw hae zah khualae te pou zah Bethani khua lang a cceih; te tuin kya a rya.

¹⁸Awkhua khe khualae lang he a ki tuh a vuelaw vae.

¹⁹Laanpi pe khe thaeku ku kha muih zah a ccianua, thuasalama a naw laelan paw sanmah muih khyh; tukeiccuze thaeku ku kha, “Papinmaw athae la thae boi nan vae!” a cipya. Te vaekheihmawte thaeku ku tuh karae arou.

²⁰Tuh-e tuh zuitu hae nynh a muih hae tuh mih ngaeangthua zah, “Thaeku ku hynh vaekheihmawte karae arou kangmaw rei!” a ci hae.

²¹Jesu nynh minmin kha, “Byaccaccing kae hopya oh, lunghiinnaw hoi leite zynnaw na hoi oh ze, thaeku ku kya acyihkuhpaw kyalya thua leite, e mua hynh, ‘Nuekuh lah rili lungkhu lang phungkuh,’ na ci oh ze a phungkuh cih.

²²Na zyn oh ze sawsang te na ngia oh paw miakaw kha na mue cih oh,” a cipya hae.

²³Jesu nynh beikinn lungkhu lang tee zah a ccangpya lya hae khe, ranpibawi lepaw hae te piccan hae nynh a kalan oun cceih hae zah, “E uccaw hae hynh paw kawhoinaw te mou na cyi? E kawhoinaw hynh hum nynh mou ae pya?” cite a khia hae.

²⁴Jesu nynh khung hae zah, “Kae mah bya kaw kheit kae khia cih oh, aphi nae hopya oh ze, kae mah e uccaw hae hynh paw kawhoinaw te nynh ka cyi cipaw kae hopah ru cih oh:

²⁵Johan kya-e baptisma hynh paw kyate mou yn thua? Vaawlang tetou? Tuhkhyhze ccungccaw kyate tou?” cite a khia hae. Mimaw te mimaw bya eikuh hae zah, “Aening nynh, ‘Vaawlang kyate,’ ah ci oh ze, aning nynh, ‘Tuhteze pawccemou Johan kha na zyn khyh oh,’ oun ci cih.

²⁶‘Ccungccaw hae kyate,’ ah ci oh ze, ccungccaw hae rawri lan a um; pawccecize ccungccaw balyn nynh Johan tuh profeh lu kheit hawte a tua hae paw nynh thua,” a ciku hae.

²⁷Tukeiccuze minmin nynh Jesu kha, “Kae nyh khyh,” cite a khung hae. Jesu nynh, “Kae mah paw kawhoinaw te nynh e uccaw hae hynh ka cyi cipaw kae hopah lan khyh oh.

²⁸“Nanning pawte na tua oh? Ccungccapaw lu kheit nynh ccapaw lu ning a hoi; aning nynh atawccapaw kalan cceih zah, ‘Ka ccapaw, atunin misu khokhu lang la cceih lah rya la lah,’ a cipya.

²⁹A ccapaw nynh, ‘Ka cceih lan khyh,’ a ci; thuasalama khuekheih acih te ngaesikuh zah a cceih.

³⁰Te mih paaw nynh asoipaw kalan cceih zah, tuh-e hawte bua a hopya. Aning nynh, ‘Ka la cceih vae sah, apang,’ a cipya, thuasalama cceih khyh.

³¹Tuh-e lu ning hae kyaze hum tuh mou a paaw rynaw a cyih?” cite a khia hae. Minmin nynh, “Atawccapaw,” a ci hae. Jesu nynh minmin kha, “Byaccaccing kae hopya oh, ngunto khoi hae paw te ohhuanung hae nynh Pachia peenaw lungkhu lang nae malang te ae teetaw vae cih oh.

³²Pawccecize Johan nynh dingnaw laanpi kha zuite nae kalan yn thua zah na zyn khyh oh; thuasalama ngunto khoi hae paw te ohhuanung hae nynh amaw kha a zyn hae; te nanning nynh tuh-e tuh mang na muih oh pite nae lung na paleihkuh khyh oh zah zyn mah na zyn khyh oh.

³³“Ccangpaw tousenaw phungpaw hynh ngaetua oh: loram a hoipaw lu kheit nynh misu khokhu kha rae zah hohung po a koih, te misu mianaw khu kha karouh zah buhang ccangkheit a sak, te khokhu kha a hohtu hae kalan hohsakuh hae zah ramccang lang a cceih.

³⁴Misu thae lo yn zaw te, a mue lanpaw kha law khylan a see hae kha a hohtu hae kalan a saw hae.

³⁵Khokhu a hohtu hae nynh a see hae kha kyng hae zah lu kheit kha a bua hae, lu kheit kha a chia hae, lu kheit kha lung te a deih hae.

³⁶Aning nynh masaty e see hae laeze alunghua lante ccangpaw see hae kha bua a saw hae; minmin nynh tuh-e hae tuh langmaw hawte bua a cyi hae.

³⁷Nyathyakou tuh, ‘Minmin nynh ka ccapaw tuh saw a tua cih hae,’ ci zah a ccapaw kha minmin kalan a saw.

³⁸Thuasalama khokhu a hohtu hae nynh a ccapaw kha he a muih hae tuh, ‘E paw hynh rhoccoutu nynh thua, rang oh, amaw hynh theih oh sih lah a rho kha lawkuh oh sih’ cite a hoku hae.

³⁹Te tuh-e paw tuh kyng hae zah misu khokhu akhung lang vua hae zah a chia hae.

⁴⁰Tukeiccuze misu khokhu a hoitupaw he yn thua te, khokhu a hohtu hae kha pawtemou a cyih cih hae?” cite a khia hae.

⁴¹Minmin nynh, “Tuh-e ccungccaw hoylei hae paw kha myarya ccih lante a theih cih hae; te a misu khokhu kha athae lo ccyh kya athae hoyte a pya cih hae paw ccangpaw khokhu a hohtu hae kalan a hohsakuh cih hae,” a ci hae.

⁴²Jesu nynh minmin kha, “Ccathyaa kyaze, ‘Inn sak hae paw nynh a nuee hae paw lung tuh inn saknaw kya abyapi huapaw apaki lang e lung lang yn tang, hynh-e tuh Bawipaw nynh a cyipaw thua zah, aening muihnaw kya ngaeang lan umpaw nynh thua,’ cite azeikuhpaw kha na ria boi khyh oh tou?

⁴³Tukeiccuze kae hopya oh, Pachia peenaw tuh nae kyate lawpya athua cih zah tuh-e peenaw thae a thaepaw minphuin kalan pya athua cih.

⁴⁴Humhung zemah tuh-e lung vawlan a ccahpaw tuh phe akingkuh cih; humhung zemah tuh-e lung nynh a ccawphupaw tuh palae tui cih,” a cipya hae.

⁴⁵Te ranpibawi lepaw hae te Farasi hae nynh tuh-e tousenaw phungpaw hae kha he a thae hae tuh kaening kong nynh oun honua cipaw a nyku hae.

⁴⁶Minmin nynh Jesu kha kyng lan a ry hae zemah ccungccaw zapi raw kha a rih hae; pawccecize ccungccaw hae nynh Jesu tuh profeh cite a tua hae paw nynh thua.