Read Zotung Chin MATTHAI 22 Bible Online

MATTHAI 22 - Zotung Chin bible

MATTHAI 22

¹Jesu nynh ccungccaw hae kha tousenaw phungpaw hae te bua a hopya hae. A hopaw tuh:

²“Vaawlang peenaw tuh a ccapaw hanlan zudy poi a tuapaw siapharanpaw te nynh aloku.

³Zudy poi kalan thuabua lan a ko hae paw kha kosah lan hae a see hae kha a saw hae; thuasalama minmin tuh oun thua ry khyh hae.

⁴Ccangpaw a see hae kha bua saw hae zah, ‘Kopaw ccungccaw hae kha hynhte la hopah oh: Dotua oh, ka loohdangkunaw tuh ka paccyn kou vae, ka tangnuapaw hae te athopaw sahiin hae kha phe ka chia vae, pawpaw balyn tuh paccyn athua vae, zudy poi loohdangkunaw kalan rang ccavae oh,’ cite a hosahpya hae.

⁵Thuasalama minmin nynh tuh-e tuh pawlangria leite mih rynaw lang a cceih hae, lukheitpaw nynh a loo lang cceih zah ccangpaw lu kheit nynh a kungkunaw lang a ccia.

⁶Te tuhlae hae nynh tuh-e see hae kha kyng hae zah sarisarya zuenah hae zah a chia hae.

⁷Thuasalama siapharan tuh myarya a thinria zah a rhawkaw hae kha saw hae zah tuh-e ccungccatheih hae kha a chiasah hae, te mih khuapi kha maee te a soipya hae.

⁸Tukoute a see hae kha, ‘Zudy poi tuh paccyn phe athua vae, thuasalama ko hae paw tuh ngaekuh vae khyh hae.

⁹Tukeiccuze nanning nynh laanluepi hae kalan la cceih oh lah na muih oh paw ccungccaw miakaw kha zudy poi kalan oun ko oh,’ cite a hopya hae.

¹⁰Tukeiccuze tuh-e see hae tuh laanluepi hae kalan cceih hae zah, a muih hae paw ccungccaw miakaw kha athah ahoy ci leite pum hae zah zudy poi tuh mikhia hae ryte phe abeih vae.

¹¹“Siapharanpaw nynh mikhia hae do lan he yn tee tuh zudy poi boeining a lawkuh leipaw ccungccaw lu kheit kha he a muih tuh,

¹²‘Ka ban, pawccemou zudy poi boeining lawku leite hynhlang nae tee?’ a cipya. Tuh-e paw nynh yccae khyh.

¹³Tetuh siapharanpaw nynh a see hae kyakhe, ‘A kuih te a ccu kha he oh lah, rawkhuinaw te hawzynaw a umnaw atolang mohnaw kalan khe vua oh,’ a cipya hae.

¹⁴Pawccecize kopaw tuh alung, thuasalama popaw tuh azya,” a ci.

¹⁵Farasi hae nynh cceih hae zah Jesu nynh a hopaw kya pawtemou kaangsyakhaw lan cipaw khua a khanku hae.

¹⁶Minmin nynh Herod pati hae ryte mimaw zuitu hae kha Jesu kalan saw hae zah, “Sazae, nang tuh ahmepaw nynh na thua, Pachia laanpi kha hmerarih lan na ccangpah hae zah mirymihua na tua khyh; pawccecize nang tuh ccungccaw hae mae na do khyh cipaw kae ny.

¹⁷Tukeiccuze na tuanaw kha oun hopya tua. Sizar kalan ngunto pya lan accan tou, ccan khyh tou?” cite a khiasah hae.

¹⁸Jesu nynh a thyaruhnaw hae kha phe nyh zah, “Thyaruh hae, pawccemou kae hynh nae syntawtua oh?

¹⁹Ngunto lang pya lanpaw phua tuh yn dosah tua oh,” a ci. Te minmin nynh denari kia kheit kha oun ccyngpya hae.

²⁰Jesu nynh minmin kha, “E hynh hum muinsan te hum min mou?” cite a khia hae.

²¹Minmin nynh, “Sizar muinsan te min,” a ci hae. Te Jesu nynh, “Tukeiccuze Sizar uccaw kha Sizar kalan pya oh lah, Pachia uccaw kha Pachia kalan pya oh,” cite a khung hae.

²²Minmin nynh tuh-e bya he a thae hae tuh mih ngaeangthua; te amaw kha po cciataw hae.

²³Tuin nin khe thoothuinaw um khyh a cih hae paw Sadusi hae tuh Jesu kalan oun thua hae zah hynhte a khia hae:

²⁴“Sazaepaw, ‘Ccungccapaw lu kheit nynh ccaawsaah leite a zu kha a chitaw ze, tuh-e paw a neitawpaw nynh tuh-e zu tuh a umkhae cih zah a upaw elang ccaaw a saahpah cih,’ cite Moses nynh a la ho.

²⁵Atu kaening laku kya uno lu sari a umbua hae; atawccapaw tuh zu hoi zah ccaawsaah leite phe a chih, a zu kha a neitawpaw nynh zu lang a hoi.

²⁶Tuhawte lu ningnaw nynh zu lang bua a hoi, te lu thumnaw kyate lu sarinaw kyacia tuhcite a cyihkuh.

²⁷Nyathyakou tuh tuh-e nopinung mah a chihbua.

²⁸Tukeiccuze thoothuinaw kya tuh-e nung tuh lu sari hae kyaze hum zu lang mou a tang cih? Pawccecize tuh-e nung tuh mih balyn zu lang phe a tang vae,” a ci hae.

²⁹Jesu nynh minmin kha, “Nanning tuh na mesei oh; Ccathyaa thuasah, Pachia thungnaw thuasah na ny khyh oh keiccu nynh thua.

³⁰Pawccecize thoothuinaw kya tuh zuvaw tang ci um vae khyh, zu dypyaku ci mah um vae khyh, minmin tuh vaawlang e vaaw hae hawte nynh athua vae hae.

³¹Thuasalama a chih hae paw thoothuinaw konglang te Pachia nynh ae hopya oh paw kha na ria boi khyh oh tou? A hopaw tuh:

³²‘Kae tuh Abraham Pachia, Isak Pachia te Jakob Pachia nynh ka thua,’ a ci. Pachia tuh a chih hae paw Pachia thua khyh, a hiin hae paw Pachia nynh thua,” cite a hopya hae.

³³Ccungccaw zapi nynh tuh-e bya he a thae hae tuh a ccangpyanaw kha mih ngaeangthua.

³⁴Jesu nynh Sadusi hae kha zya a daesah hae cipaw kha Farasi hae nynh a thae hae tuh pynkheihlan a tungkuh hae.

³⁵Minmin kyaze kawbya sazae lu kheit nynh Jesu kha syntawtua khylan hynhte bya a khia:

³⁶“Sazaepaw, kawbya kyaze paw kawbya mou alehua?” cite a khia.

³⁷Jesu nynh, “ ‘Bawipaw na Pachia kha na thinlung balyn te, na hiinnaw balyn te, na tuanaw balyn te na sungsah cih,’ acikuh.

³⁸E hynh ale huapaw te abyapi huapaw kawbya nynh thua.

³⁹Ccangningnaw tuh tuh-e te alokuh. ‘Na innpaw kha namaw toulou hawte na sungsah cih,’ acikuh.

⁴⁰Kawbya balyn te profeh ccauh hae balyn tuh hynh-e kawbya ccangning kyahin marya akyngkuh,” a cipya.

⁴¹Farasi hae tuh pynkheihlan a pumku lya hae khe Jesu nynh,

⁴²“Messiah hynh pawtemou na tua oh? Aning tuh hum ccaaw mou athua?” cite a khia hae. Minmin nynh, “David Ccapaw nynh thua,” a ci hae.

⁴³Jesu nynh, “Tuhteze pawccemou David nynh Muisaw liate amaw kha Bawipaw a ci. David nynh,

⁴⁴‘Bawipaw nynh ka Bawipaw kha, “Na rhaw hae kha na ccu kaw kya ka nung mawlaezung tuh ka ranglang khe haung,” a cipya,’ a ci.

⁴⁵David nynh Messiah kha Bawipaw cite a ko lanze, pawtemou Messiah tuh David Ccapaw athuathya cih?” cite a khia hae.

⁴⁶Te bya kaw kheit a khung khopaw hum sanmah um khyh; tuh-e nin kyate hum nynh sanmah byakhia ngan vae khyh hae.