Read Zotung Chin MARKA 1 Bible Online

MARKA 1 - Zotung Chin bible

MARKA 1

¹Pachia Ccapaw Jesu Khri thehoypaw athotakawnaw.

²Profeh Isaiah ccauh kya, “Dotua, na laanpi a paccyn cih paw ka zeccuetu kha na malang ka saw cih.

³Ramkaw kya a siapaw lukheitpaw roi nynh, ‘Bawipaw laanpi kha paccynpah oh, a laanpi kha lawbabin lan raepah oh,’ a ci,” cite azeiku hawte;

⁴Baptisma pyatu Johan tuh ramkaw kya yn langkuh zah, seinaw ngaethyanaw hanlan ngaesikunaw te asekuhpaw baptisma kong kha a ho.

⁵Judea ram um hae paw balyn te Jerusalem khuaccaaw hae balyn tuh Johan kalan oun cceih hae; mih seinaw phykuh hae zah Jordan vaw kya Johan nynh baptisma a pya hae.

⁶Johan tuh kalauh ming te kuakuhpaw boeining kha lawkuh zah a tae kya saving taeccia kha a cciaku, te tungkhipaw te ramkaw e khoitui kha nynh a ae.

⁷Te aning nynh, “Kae laeze a thung huapaw tuh kamaw koute yn thua cih, kae tuh tuh-e paw phanah rui phoupya lan sanmah ka ngaekuh khyh.

⁸Kae nynh nanning kha tui te baptisma kae pya oh, thuasalama aning nynh tuh Thyaa Muisaw te baptisma ae pya cih oh,” cite phung a ho.

⁹Tuin nin hae kyakhe Galilee pee Nazareth khua kyate Jesu yn thua zah Jordan vaw khe Johan nynh baptisma a pya.

¹⁰Tui lungkhu te yn pou miakaw te, vaawlang yn hungkupaw te Muisaw nynh vahu hawte a tungvaw yn ccupaw kha a muih.

¹¹Te vaawlang te roi yn ccae zah, “Nang tuh ka sungsahpaw ka Ccapaw nynh na thua; na tungvaw kya ka lungry accing,” a ci.

¹²Vaekheihmawte Muisaw nynh Jesu kha ramkaw lang cciakhae zah,

¹³tuin kyakhe nin sung pali um zah Satan nynh a tuhou; loramsaw hae ryte umkheih hae zah vaaw hae nynh a do-oih hae.

¹⁴Johan kha thong a sah kou hae te, Jesu tuh Galilee pee lang cceih zah Pachia thehoypaw kha ho zah,

¹⁵“Accyh phe ccing vae, Pachia peenaw tuh anae vae, ngaesikuh oh lah thehoypaw kha zyn oh,” a ci.

¹⁶Galilee Rili pe Jesu po a cceih tuh, Simon te a neitaw Andru nynh rili lungkhu mia a vua hae paw kha a muih, pawccecize minmin tuh ngasaw kyngtu hae nynh thua hae.

¹⁷Jesu nynh minmin kha, “Kae hynh yn zui oh lah nanning kha ccungccaw kyngtu hae lang kae rae cih oh,” a cipya hae.

¹⁸Vaekheihmawte mih mia kha cciataw hae zah amaw kha a zui hae.

¹⁹Tuin kyate takyh asawnaw lang he thua tuh, kohlung lungkhu mih mia a thue cciamang hae paw, Zebedi ccapaw James te a neitaw Johan kha a muih hae.

²⁰Minmin kha vaekheihmawte a ko hae; minmin nynh a hoh hae paw ccungccaw hae ryte mih paaw Zebedi kha kohlung kya cciataw hae zah amaw kha a zui hae.

²¹Jesu te a zuitu hae tuh Kapernaum khua lang cceih hae zah, sabbath nin khe Jesu nynh sinakok lungkhu lang tee zah a ccangpya hae.

²²A ccangpyanaw a thae hae paw tuh a ccangpyanaw kha mih ngaeangthua, pawccecize kawbya sazae hae hawte thua leite, kawhoipaw lu kheit hawte a ccangpya hae.

²³Tuh ccyh lyakhe mih sinakok kya athyaa leipaw muisaw bahkuhpaw lu kheit a um,

²⁴tuh-e paw nynh, “Nazareth paw Jesu, nang te kaening tuh pawmou ah sekuh oh? Kaening ro khylan tou nae thua? Nang tuh hum nynh na thua cipaw kae ny, Pachia kya-e Athyaapaw nynh na thua,” cite a sia.

²⁵Jesu nynh kawpya zah, “Yccae nan, khah-e paw lungkhu kyate toikuh,” a cipya.

²⁶Athyaa leipaw muisaw nynh tuh-e paw tuh thawte a dungsah koute raerae sia zah tuh-e paw kyate phe a toikuh.

²⁷Te ccungccaw hae balyn tuh mih ngaeangthua zah, “E hynh pawtemou athua? E hynh athawpaw ccangpyakunaw tou? Pawccecize athyaa leipaw muisaw hae kha heize kawpya zah minmin nynh a kaw phe a ngae hae ccarei,” cite a hoku hae.

²⁸Vaekheihmawte a thongpang tuh Galilee pepan balyn pong pazaekuh vae.

²⁹Sinakok kyate ccahe a pou hae te, Simon te Andru hae inn langkhe James te Johan ryte a tee hae.

³⁰Simon a zu nung tuh ccih zah a ih cite Jesu kalan palou a hopya hae.

³¹Jesu nynh cceih zah a kuih te kyng zah a tho, te a ngesaw lingpaw tuh vaekheihmawte phe dan zah minmin elang rya a lawpah vae hae.

³²Zete khuanin he ccah te, ccinaw hoi hae paw balyn te raerangsaro bahkuh hae paw kha Jesu kalan oun cciakhae hae.

³³Khuapi balynte thuakawzung khe oun sueluakuh hae.

³⁴Ccinaw aphuinphuin te a ccih hae paw patae kha dansah hae zah raerangsaro patae a dee; aning nynh raerangsaro hae kha byaho lan kaw-ua khyh hae, pawccecize minmin nynh amaw kha a ny hae.

³⁵Awkhua takaw khuadae mawkhe Jesu tuh tho zah a pou, te ccungccaw um leinaw langkhe cceih zah tuin kya saw a sang.

³⁶Simon te a ban hae nynh Jesu kha ccung hae zah,

³⁷he a muih hae te, “Ccungccaw balyn nynh nang kha ae ccung hae,” cite a hopya hae.

³⁸Jesu nynh, “Anaenaw khua hae kalan cceih oh sih, tuin kya phung ka ho ccaw, pawccecize tuh-e tuh nynh kae thuanuathepaw,” a cipya hae.

³⁹Galilee ram po lekuh lan mih sinakok hae kya phungho zah raerangsaro hae kha a dee.

⁴⁰Vaethyakaepaw lu kheit nynh a kalan yn thua zah a malang bakhungte, “Na ry ze kae hynh nae thyaasah kho,” cite Jesu kha a ngiaku.

⁴¹Jesu nynh ngaethya a umsah pawte a kuih kha dyng zah tuh-e paw tuh hae zah, “Nang hynh thyaasah kae ry, thyaa ccavae,” a cipya.

⁴²Tuhte a ho koute vaekheihmawte vaethya ccinaw tuh thyaa zah aning tuh a dan vae.

⁴³Jesu nynh tuh-e paw tuh tynkaring lan byatawsya zah,

⁴⁴“E konglang hynh humhung kya mah na ho khyh nawlan la raeringkuh; thuasalama ranpibawi kalan la cceih lah la dosakuh; te ccungccaw hae kya na dannawpaw ccaekia lang Moses kawbya thyhte silawnaw kha la rae,” cite a hopah koute palou a cciasah.

⁴⁵Thuasalama tuh-e paw nynh cceih zah tuh-e kong tuh pawpaw kya balyn pong a zeihsaku, tukeiccuze Jesu tuh khuapi lungkhu lang rythyte tee kho vae khyh; khuate lang ramkaw khe um zah, ccungccaw hae nynh mih umnaw raveih kyate amaw kalan oun thua hae.