Read Zotung Chin MARKA 10 Bible Online

MARKA 10 - Zotung Chin bible

MARKA 10

¹Jesu tuh tuin kyate toikuh zah Judea ram te Jordan vaw khuraw langkhe a cceih; ccungccaw hae nynh a kalan bua oun pumnuakuh hae zah, leih a ccangpya hae hawte bua a ccangpya hae.

²Farasi hae abang nynh oun thua hae zah amaw kha syntawtua khylan, “Pisepaw nynh a zu kha mya lan kawbya nynh a ua tou?” cite a khia hae.

³Jesu nynh, “Moses nynh pawtemou kawbya ae pya oh?” cite a khung hae.

⁴Minmin nynh, “Moses nynh myakunaw ccaw zei lan zah mya lan a ua,” cite a khung hae.

⁵Jesu nynh minmin kha, “Nae thinlung akhung keiccu nynh e kawbya hynh ae zeipya oh.

⁶Thuasalama raenaw athotakaw lya tuh, ‘Pachia nynh nopi te pise kha a rae.’

⁷‘Hynh-e keiccuze pise nynh a nung te a paaw kha a cciataw cih zah a zu te a umkheih cih hae;

⁸minmin lu ning tuh pyn pynkheit lang a tang cih hae.’ Tukeiccuze minmin tuh lu ning thua vae khyh hae, pyn pynkheit nynh athua vae hae.

⁹Tukeiccuze Pachia nynh a suelua vae paw kha humhung nynh mah phia nan sah,” a ci.

¹⁰Inn lungkhu khe a zuitu hae nynh tuh-e kong kha bua a khia hae.

¹¹Jesu nynh minmin kha, “Humhung zemah a zu kha mah zah ccangpaw zu a hoipaw tuh zu ccangpaw kya seinaw a raepaw nynh thua.

¹²Nopinung nynh a vawpaw kha mah zah ccangpaw vawpaw a hoi zetuh vawpaw ccangpaw kya seinaw a raenung nynh thua,” a cipya hae.

¹³Ccungccaw hae nynh imua taraw hae kha Jesu kalan haesah khylan oun cciakhae hae; a zuitu hae nynh oun cciakhaetu hae kha a pe hae.

¹⁴Jesu nynh tuh-e tuh he a muih te, a thinria zah minmin kha, “Imua taraw hae kha ka kalan oun cceih hae sah, kang nan oh; pawccecize Pachia peenaw tuh hynhcihawpaw hae elang nynh thua.

¹⁵Byaccaccing kae hopya oh, humhung zemah Pachia peenaw kha imua taraw hawte a lawku khyh ze, tuh-e peenaw lungkhu lang tee lan khyh,” a cipya hae.

¹⁶Imua hae kha dua hae zah mih tungvaw kya a kuih khang zah hythua a pya hae.

¹⁷Jesu tuh khuaccong lan a thoku lyakhe lukheitpaw nynh a kalan yn ccue zah a malang ccukharutungte, “Sazae hoypaw, zungzae hiinnaw ka ccou nawlan pawmou ka cyih cih?” cite a khia.

¹⁸Jesu nynh, “Pawccemou kae hynh ahoypaw cite nae ko? Pachia lu kheit laelan ahoypaw hum sanmah um khyh.

¹⁹Kawbya hae kha mang na nyh khaw: ‘Ccungccaw na theih lan khyh, milae zu milae vawpaw kya na sei lan khyh, na ruh lan khyh, ahme leipaw ccaekia lang na tang lan khyh, ccungccaw na ling lan khyh, na nung te na paaw kha sawtua,’ cipaw kha,” a cipya.

²⁰Tuh-e paw nynh, “Sazae, tuh-e hae balyn tuh ka di lya mawte pong ka zui vae,” a cipya.

²¹Jesu nynh tuh-e paw tuh sungsahnaw te dobia zah, “Ccangkheit na bou ung; la cceih lah na hoipaw balyn kha la zua lah ryachi hae kha la pya hae, te vaawlang khua kya sisua na hoi cih; tukoute rang lah yn zui,” a cipya.

²²Aning nynh tuh-e bya he a thae te, a maesue hoy leite ngaethyate po a cceih, pawccecize aning tuh myarya a hoirumpaw nynh thua.

²³Jesu nynh a pepan khe do zah a zuitu hae kyakhe, “Mihoi hae nynh Pachia peenaw kya tee lanpaw tuh pawcihmou aru cih!” cite a hopya hae.

²⁴A zuitu hae tuh tuh-e bya keiccuze mih ngaeangthua. Thuasalama Jesu nynh bua hopah hae zah, “Ka ccaaw oh, Pachia peenaw kya tee tuh pawcihmou aru!

²⁵Mihoipaw nynh Pachia peenaw kalan tee lae tuh kalauh nynh phynbang khu kya tee nynh azoihua,” a cipya hae.

²⁶Minmin tuh myarya mih ngaeangthua zah, “Tuhte athua ze hummou khumnaw a mue kho cih” cite lu kheit te lu kheit a hoku hae.

²⁷Jesu nynh minmin kha do hae zah, “Ccungccaw hanlan thua kho khyh, thuasalama Pachia hanlan athua kho leipaw um khyh; pawccecize Pachia hanlan tuh pawpaw balyn athua kho,” a ci.

²⁸Peter nynh Jesu kha, “Dotua, kaening tuh pawpaw balyn kae cciataw zah namaw kha kae zui vae,” a cipya.

²⁹Jesu nynh, “Byaccaccing kae hopya oh, kae te thehoypaw keiccuze inn, uteno hae, ccianung hae, paaw, nung, zu, ccaaw hae, loo hae, tuh-e hae hankhakheit kha a cciatawpaw tuh,

³⁰atu she kyahin inn hae, uteno hae, ccia hae, nung hae, ccaaw hae te loo hae kha tuaasahkunaw ryte leit za kheit a mue cih; yn thua cih paw she kya zungzae hiinnaw kha a mue cih.

³¹Thuasalama masaty e ccungccaw patae tuh nyathyakou athua cih hae zah nyathyakou e patae tuh masaty athua cih hae,” a ci.

³²Minmin nynh Jerusalem lang a cciathung lya hae laanpi kyakhe, Jesu tuh mih malang a cceih; zuitu hae tuh mih ngaeangthua zah nulang te a zuikuh hae paw mah a rih hae. Aning nynh lu haw lae ning kha ccanglang bua cciakhae hae zah a tungvaw yn cyihkuh lanpaw kha a hopya hae:

³³“Dotua oh, aening tuh Jerusalem lang nynh ah cciathung oh; Ccungccaw Ccapaw tuh ranpibawi lepaw hae te kawbya sazae hae kalan oun ap cih hae; minmin nynh chia lante bya oun pia cih hae zah Zenta hae kuih kalan oun ap cih hae;

³⁴tuh-e hae nynh amaw kha oun sarya cih hae zah oun bua cih hae, mih tuing te oun thoi cih hae zah oun theih cih hae; te nin thumnaw kya bua yn thoothui cih,” a ci.

³⁵Zebedi ccaaw hae James te Johan nynh Jesu kalan oun cceih hae zah, “Sazae, kaening nynh kae ngiakupaw nae cyipah ravo nyn ci kae ry,” a cipya hae.

³⁶Jesu nynh, “Nae hanlan pawmou nae cyisah ry oh?” cite a khia hae.

³⁷Minmin nynh, “Na phu-enaw kya lu kheit na ranglang, lu kheit na voilang kae haungbua nawlan oun ua,” a ci hae.

³⁸Thuasalama Jesu nynh, “Nanning nynh paw nynh kae ngia cipaw na nyh khyh oh; ka niapaw banang kha na neih kho cih oh tou? Baptisma ka inpaw kha na in kho cih oh tou?” a cipya hae.

³⁹Minmin nynh, “Kae cyih kho cih,” a ci hae. Jesu nynh minmin kha, “Ka niapaw banang kha na neihbua cih oh; ka inpaw baptisma kha mah na inbua cih oh.

⁴⁰Thuasalama ka ranglang te ka voilang haungnaw kaw kha kae nynh ka pya kho khyh; e hmin tuh Pachia nynh a paccynpya hae paw kha nynh a pya cih hae,” a cipya hae.

⁴¹Zuitu hae lu haw nynh tuh-e tuh he a thae hae tuh James te Johan tungvaw mih thinria.

⁴²Tukeiccuze Jesu nynh minmin kha ko hae zah, “Zenta hae a uktu hae nynh tuh a uk hae paw tungvaw kya huhan hoi hae zah, a lesae hae paw nynh kawhoinaw kha a mang hae cipaw na ny oh.

⁴³Thuasalama nanning kya tuh tuhte thua lan khyh; humhung zemah nanning lakuze a lesaepaw lang a tang rypaw tuh nae ryalahtu lang a tang cih.

⁴⁴Humhung zemah nanning lakuze lupihua lang a tang rypaw tuh ccungccaw balyn see lang a tang cih.

⁴⁵Pawccecize Ccungccaw Ccapaw tuh rya lawpyaku khylan yn thua khyh, ming hae rya kha lawpya khylan te ccungccaw patae shawkhaw nawlan a hiinnaw kha pyaku khylan nynh yn thua,” cite a hopya hae.

⁴⁶Minmin tuh Jeriko khua a thua hae; te a zuitu hae ry, ccungccaw pataepi ryte Jeriko kyate he a pou hae tuh, Timia ccapaw mitmohpaw Bartimu tuh laanrae khe ccungccaw ngiakute a la haung.

⁴⁷Nazareth khuapaw Jesu cipaw he a thae tuh, “David Ccapaw Jesu, kae hynh ngaethya yn umsah!” cite thawte a sia.

⁴⁸Ccungccaw patae nynh zya adae ccaw cite a pe hae; thuasalama aning nynh, “David Ccapaw, kae hynh ngaethya yn umsah,” cite houh ccae lan a sia.

⁴⁹Jesu nynh thadyn zah tuh-e paw tuh a kosah hae. Minmin nynh mitmohpaw kha ko hae zah, “Na lungtua sah, thokuh, nang kha ae ko,” cite a hopya hae.

⁵⁰Aning nynh a boeining kha ccaring a vua koute thohkuh zah Jesu kya a thua.

⁵¹Jesu nynh, “Na hanlan pawmou nae cyisah ry?” cite a khia. Mitmohpaw nynh, “Sazae, ngaw bua yn muih sah,” a cipya.

⁵²Jesu nynh, “La cceih ccavae, na zynnaw nynh ae dansah vae,” a cipya. Vaekheihmawte ngawmuih zah laanpi kya Jesu kha a zui vae.