Read Zotung Chin MARKA 11 Bible Online

MARKA 11 - Zotung Chin bible

MARKA 11

¹Jesu te a zuitu hae nynh Jerusalem lang vyavya a thuadyn hae, Oliv Mua pe umpaw Bethfake khua te Bethani khua kya he a thua hae te, Jesu nynh a zuitu hae lu ning kha malang saw lalo hae zah,

²“Nae malang umpaw khua kalan la cceih oh lah tuh-e khua lungkhu lang he na tee miakaw oh te, hum nynh sanmah a cciku boi leipaw lann taraw a khii hae paw kha na la muih cih oh, tuh-e tuh oun supah oh lah oun sue oh.

³Lukhakheit nynh, ‘Pawccemou khahte na cyi oh?’ cite ae khia oh ze, ‘Bawipaw nynh a peki, taloi bua kae pya cih oh,’ na cipah cih oh,” cite a hopya hae.

⁴Minmin nynh cceih hae zah sakoih akhung lang laanpi atungkunaw kya a khii hae paw lann taraw kha muih hae zah a supya hae.

⁵Tuin kya a thadyn hae paw abang nynh minmin kha, “Pawccemou lann taraw kha na supya oh?” a ci hae.

⁶Jesu nynh a taw hae hawte hopah hae zah minmin nynh a cciasah hae.

⁷Zuitu hae nynh lann taraw kha Jesu kalan cciakhae hae zah a tungvaw khe mih boei kha de hae zah Jesu nynh a cciku.

⁸Ccungccaw patae nynh mih boei kha laanpi kya a phaepya hae; abang nynh anaw lungpaw thingnge hae kha khya hae zah laanpi kya a phaepya hae.

⁹Malang cceih hae paw te nulang a zuikuh hae paw nynh, “Hosanna! Bawipaw min te yn thuapaw tuh hythuaccou sah!

¹⁰Yn thua cih paw ah minpaaw David peenaw tuh hythuaccou sah! Ahang huanaw vaawlang khua kya Hosanna thua sah!” cite a sia hae.

¹¹Jesu tuh Jerusalem khua a thua te beikinn lungkhu lang a tee; pawpaw balyn kha pong a do koute zete he athua tuh lu haw lae ning ryte Bethani khua lang a cceih hae.

¹²Awkhualan Bethani khua te he a ki hae tuh Jesu tuh a vuelaw.

¹³Anaw asaepaw thaeku ku kha asawnaw te muih zah athae ccangkhakheit ka muihkuh cih vosi cite a ccianua; he a thuanua tuh anaw kyalya kha a muih; pawccecize thaeku a thae ccyh thua loh khyh.

¹⁴Jesu nynh thaeku ku kha, “Humhung nynh mah na thae la ae nan vae sah,” cite a cipya, tuh-e bya tuh a zuitu hae nynh phe a thae hae.

¹⁵Minmin tuh Jerusalem a thua hae. Jesu tuh beikinn voidu lungkhu lang tee zah tuin kya a zuatu hae te a retu hae kha a dee hae, te phuarutu hae ccaboi te valaele zuatu hae tungkhung kha phya a dawleihpya hae.

¹⁶Beikinn voidu lungkhu lang uccaw teekhae lan ua khyh hae.

¹⁷Ccangpah hae zah, “Ccathyaa kyaze, ‘Ka inn tuh minphuin hae balyn sawsangnaw inn cite ko athua cih,’ cite zeikuh khyh tou? Thuasalama nanning nynh miruh hae karung lang na rae vae oh,” a cipya hae.

¹⁸Kawbya sazae hae te ranpibawi lepaw hae nynh he a thae hae tuh Jesu chianaw laanpi kha a ccung hae; pawccecize ccungccaw balyn nynh a ccangpyanaw kha mih ngaeangthua keiccuze minmin nynh amaw raw a rih hae.

¹⁹Zetesang yn thua tuh Jesu te a zuitu hae tuh khua kyate a pou hae.

²⁰Minmin nynh awkhua a ccia lya hae khe a tharui kyate karae aroupaw thaeku ku kha a muih hae.

²¹Peter nynh liathui zah Jesu kha, “Sazae, dotua! Thya na lawpaw thaeku ku karae rou vae,” a cipya.

²²Jesu nynh minmin kha, “Pachia kya zynnaw hoi oh.

²³Pawccecize byaccaccing kae hopya oh, humhung zemah e mua hynh, ‘Nang nuekuh lah rili lungkhu lang phungkuh,’ cipah zah lunghiinnaw hoi leite a hopaw tuh acyikuh cih cite a zyn lanze, a ho hawte acyikuh cih.

²⁴Tukeiccuze kae hopya oh, sawsang te na ngia oh paw miakaw kha kae mue vae cite zyn oh lah na mue cih oh.

²⁵“Sawsang te na thadyn vae oh ze, lukhakheit tungvaw seibe lanpaw ccangkhakheit na hoi oh ze la ngaethya oh; tuhteze nynh vaawlang umpaw nae Paaw nynh mah nae seinaw kha ae ngaethya cih oh.

²⁶Thuasalama na ngaethya khyh oh ze, vaawlang umpaw nae Paaw nynh mah nae seinaw kha ae ngaethya lan khyh oh,” cite a hopya hae.

²⁷Jesu te a zuitu hae tuh Jerusalem lang bua oun thua hae. Jesu nynh beikinn voidu kya a ccia lyakhe ranpibawi lepaw hae, kawbya sazae hae te piccan hae nynh amaw kalan oun cceih hae zah,

²⁸“E uccaw hae hynh paw kawhoinaw te mou na cyi? E uccaw hae cyi lan hum nynh mou e kawhoinaw hynh ae pya?” cite a khia hae.

²⁹Jesu nynh minmin kha, “Kae mah bya kaw kheit kae khia cih oh; nae hopya oh ze, e uccaw hae hynh paw kawhoinaw te nynh ka cyi cipaw kae hopah ru cih oh.

³⁰Johan kya-e baptisma hynh vaawlang tetou yn thua? Tuhkhyhze ccungccaw hae kyate tou? Yn hopya tua oh,” cite a khia hae.

³¹Minmin tuh mimaw te mimaw eikuh hae zah, “Aening nynh, ‘Vaawlang kyate,’ ah ci oh ze, aning nynh, ‘Tuhteze pawccemou Johan kha na zyn khyh oh,’ yn ci cih.

³²Thuasalama, ‘Ccungccaw hae kyate,’ ah ci oh ze,” ci hae zah, minmin nynh ccungccaw hae raw kha a rih hae; pawccecize ccungccaw balyn nynh Johan tuh profeh ccaccing cite a tua hae paw nynh thua.

³³Tukeiccuze minmin nynh Jesu kha, “Kae nyh khyh,” a cipya hae. Jesu nynh, “Kae mah paw kawhoinaw te nynh e uccaw hae hynh ka cyi cipaw kae hopah lan khyh oh,” a cipya hae.