Read Zotung Chin MARKA 13 Bible Online

MARKA 13 - Zotung Chin bible

MARKA 13

¹Jesu tuh beikinn kyate a toiku lyakhe a zuitu hae kya-e lukheitpaw nynh, “Sazae, dotua, e lung hae te inn hae nynh ale baban hynh!” a cipya.

²Jesu nynh, “E inn pipi hae hynh na muih khaw? Hein kyahin lung ccangkheit vawlan ccangkheit a khangthykuh lei lan ciate marya tingsah bung yn thua cih,” a cipya.

³Jesu tuh Oliv Mua vawlan khe beikinn lang hawi zah a haung lyakhe Peter, James, Johan te Andru nynh mih makhaete,

⁴“E uccaw hae hynh hohtuhmou yn cyihkuh cih? E uccaw hae balyn yn ccing lan vae ze, paw muihsahnaw mou yn langkuh cih? Oun hopya tua,” cite a khia hae.

⁵Jesu nynh minmin kha, “Humhung nynh mah ae ling khyh nawlan oh la raeringkuh oh.

⁶Pawccecize ccungccaw patae nynh ka min te oun thua cih hae zah, ‘Kae tuh amaw nynh ka thua,’ oun ci cih hae zah ccungccaw patae kha oun ling cih hae.

⁷Rhawtukkunaw kong te rhawtho lanpaw kong kha na thae oh ze, nae bung la zou nan sah; tuhcihawpaw tuh oun cyihkuh cih, thuasalama athangnaw tuh thua loh khyh.

⁸Pawccecize minphuin phuin kheit te phuin kheit, ram kheit te ram kheit oun rhawkuh cih hae; ram takyh kya ccakan yn ccih cih zah innry yn suekuh cih. E hae tuh neitangia accih takawpaw hawte nynh thua.

⁹“Thuasalama nanning tuh la raeringkuh oh; pawccecize minmin nynh nanning kha kungsi hae kalan ae ap cih oh; sinakok hae kya ae bua cih oh. Kae ka keiccuze uktu hae te siapharan hae malang na thadyn cih oh zah, minmin kyakhe ka ccaekia lang na tang cih oh.

¹⁰Thehoypaw hynh minphuin hae balyn kalan masaty hopya athua cih.

¹¹Minmin nynh byapianaw kalan ae cciakhae oh zah ae ap vae oh ze, na ho lan oh paw kha nae thawsia nan sah; tuin ccyh kya ho lan na mue oh paw bya kha ho oh; pawccecize a hopaw tuh naemaw thua khyh, Thyaa Muisaw nynh thua.

¹²Uteno nynh mimaw te mimaw kha chinaw kalan yn apkuh cih hae; paaw nynh a ccaaw kha yn ap cih; ccaaw hae nynh nungpaaw hae kha oun rawse cih hae zah oun chisah cih hae.

¹³Ccungccaw balyn nynh nanning kha ka min keiccuze ae hua cih oh; thuasalama athangnaw cia a tynpaw tuh khum athua cih.

¹⁴“Thuasalama anungsikuhpaw uccaw nynh um lan accan leinaw hmin kya a thadynpaw kha he nae muih oh te (Baebu a riapaw ccungccaw tuh thaethya sah), Judea ram kya um hae paw nynh mua lang ccue hae sah.

¹⁵Inn tungvaw umpaw ccungccaw nynh a inn lungkhu e ccangkhakheit law khylan inn lungkhu lang rungbung nan vae sah lah tee nan vae sah.

¹⁶Loo kya a umpaw nynh a boeining lawku khylan ki nan vae sah.

¹⁷Tuin ccyh kya tuh ccaaw a poipaw nopi hae te matei zupaw nosi a hoipaw nopi hae hanlan ngaethya lan kou um!

¹⁸Tuh-e ccyh tuh khuaccih ccyh athua khyh nawlan saw la sang oh.

¹⁹Pawccecize Pachia nynh a raepaw raenaw athotakawnaw kyate atu ccyh cia a la um boi leipaw te nyalang mah a um vae cih leipaw teingnaw tuh tuin ccyh kya yn thua cih.

²⁰Bawipaw nynh tuh-e ccyh tuh a dynsah khyh lanze humhung mah lue lan khyh; thuasalama amaw nynh a popaw ccungccaw hae hanlan tuh-e ccyh tuh a dynsah cih.

²¹Tuin ccyh kyakhe lukhakheit nynh nanning kha, ‘Dotua! Messiah tuh hein kya nynh a um!’ Tuhkhyhze, ‘Dotua! Khuin kya nynh a um,’ ae cipya oh ze la zyn nan oh.

²²Pawccecize lingthya messiah hae te lingthya profeh hae oun langkuh cih hae zah, athua kho ze popaw ccungccaw hae maw kha ling khylan muihsahnaw te ngaeangnaw hae kha oun langsakuh cih hae.

²³Tukeiccuze la raeringkuh oh; pawpaw balyn kha pong kae hopya vae oh.

²⁴“Tuh-e vawsawnaw koute, tuin ccyh kya khuanin tuh yn moh cih zah sawpaw mah aw vae lan khyh.

²⁵Vaawlang e awsi hae tuh oun ccah cih hae zah vaawlang e huhan balyn tuh yn hy cih.

²⁶Ccungccaw Ccapaw tuh alesaepaw huhan te phu-enaw ryte maeking kyate yn rungpaw kha oun muih cih hae.

²⁷Aning nynh a vaaw hae kha a saw cih hae zah a popaw ccungccaw hae kha laephi adianaw kyate vaawlang adianaw kyacia, laephi ki kipali kyate oun suelua cih hae.

²⁸“Thaeku ku kya-e tousenaw phungpaw hynh atu ccangku tua oh; aran tuh notazyh lan yn cih zah anaw he yn toih tuh hawnin anae vae cipaw na ny oh.

²⁹Tuhawte nanning nynh e uccaw hae hynh he nae muih vae oh ze Ccungccaw Ccapaw yn thua lanpaw tuh anae vae, thuakaw kin cia yn naekuh vae cipaw la nyh ccavae oh.

³⁰Byaccaccing kae hopya oh, e uccaw hae balyn acyiku kou makhia atu she e ccungccaw hae hynh zo lan khyh hae.

³¹Vaaw te laephi tuh azo cih, thuasalama ka bya tuh zo lan khyh.

³²“Thuasalama tuh-e nin te ccyh tuh hum nynh sanmah nyh khyh, vaawlang umpaw vaaw hae te Ccapaw nynh mah nyh khyh hae, Paaw rou nynh a nyh.

³³Accyh tuh hohtuh cipaw na ny khyh oh keiccuze raeringkuh oh lah paccynkute la um oh.

³⁴Pawtemou aloku ci ze, khuaccong lan a cceihpaw ccungccapaw nynh a inn kha cciataw zah a see hae kha mih ryalaw raveih law lan pyasya hae zah thuakaw ngawtupaw kha thuakaw ngaw lan kaw a pyapaw te nynh aloku.

³⁵Tukeiccuze inn hoitupaw tuh zete ccyh tou, ziraccyng tou, awhykhua ccyh tou, khuadaetakaw tou, hohtuh ccyh nynh yn thua cih cipaw na ny khyh oh keiccuze raeringkute la ngaw oh.

³⁶Aning tuh tualeipite mang yn thua cih zah na i oh paw kha ae muihsei cih oh.

³⁷Kae hopya oh paw hynh ccungccaw balyn kha ka hopya hae, raeringkute la ngaw oh!” a ci.