Read Zotung Chin MARKA 15 Bible Online

MARKA 15 - Zotung Chin bible

MARKA 15

¹Awkhua takaw khe ranpibawi lepaw hae tuh piccan hae, kawbya sazae hae te kungsi hae balyn ryte arangte khua a khankuh hae; Jesu kha a he kou hae te cciakhae hae zah Pilat kuih kya a pya hae.

²Pilat nynh, “Nang hynh Judah hae Siapharan na thua tou?” cite a khia. Jesu nynh, “Na ho hawte nynh thua,” cite a khung.

³Ranpibawi lepaw hae nynh Jesu kha patae sei a be hae.

⁴Pilat nynh, “Kaw kheit san na khung khyh hae rei? Sei ae benaw hae paw hynh hohcihmou alung cipaw dotua!” cite bua a khia.

⁵Thuasalama Jesu nynh kaw kheit san bua khung khyh, tukeiccuze Pilat tuh a ngaeangthua.

⁶Kawtaw Poi kya ccungccaw hae nynh a ngia hae paw thongccahpaw lu kheit kha Pilat nynh leih a luesah.

⁷Rhawthonaw kya ccungccaw theihtu Barabbas a ci hae paw tuh ccangpaw rhawthotu hae ryte thong a ccahkheih hae.

⁸Ccungccaw zapi tuh oun thua hae zah mimaw elang leih a cyipya hae hawte oun cyipya ccaw cite Pilat kha a ngia hae.

⁹Pilat nynh, “Judah hae Siapharan hynh nae hanlan kae luesahpya oh ze na ry oh tou?” cite a khia hae.

¹⁰Pawccecize, ranpibawi lepaw hae nynh mih eiung keiccu nynh Jesu kha a ap hae cipaw Pilat nynh phe a ny.

¹¹Thuasalama Pilat nynh Barabbas kha minmin hanlan a luesah nawlan ranpibawi lepaw hae nynh ccungccaw zapi kha a tou hae.

¹²Pilat nynh, “Tuhte athua ze, Judah hae Siapharan na ci oh paw hynh so pawtemou nae cyisah ry oh?” cite bua a khia hae.

¹³Minmin nynh, “Amaw kha vaelantung kya khiade!” cite bua a sia hae.

¹⁴Pilat nynh, “Pawccemou? Aning nynh paw seinaw mou a rae?” cite a khia hae. Minmin nynh, “Amaw kha vaelantung kya khiade!” cite houh a sia hae.

¹⁵Pilat nynh ccungccaw zapi kha lunghoysah a ry keiccuze Barabbas kha a sawpya hae; te Jesu kha buasah hae zah vaelantung kya khiade lan a pya hae.

¹⁶Rhawkaw hae nynh Jesu kha uktu bawi maepaw langkhe teekhae hae zah rhawkawphu phu kheit kha abalynte a kobua hae.

¹⁷Minmin nynh sekakungpaw boeining kha a zingsaku hae, hinpaw kha lukhung lang khepah hae zah a lu vawlan a khungsah hae.

¹⁸Tuinte salaam pya hae zah, “Judah hae Siapharan tuh a she sae vae sah!” a ci hae.

¹⁹A lu kha phaeku te bua hae zah mih tuing te a thoi hae, te mih ccukharutung hae zah a bakhungpya hae.

²⁰Jesu kha a sarya kou hae te boei sepaw kha khah hae zah amaw a boeining kha bua a lawsahku hae, te vaelantung kya khiade lan a cciakhae hae.

²¹Alexanda te Rufas mih paaw Simon, Sairin khuapaw tuh khua taraw langte yn cceih zah, minmin nynh amaw kha Jesu vaelantung kha puih lan a nangse hae.

²²Jesu kha Golgotha a ci hae paw hmin langkhe a cciakhae hae (Golgotha cipaw tuh Luru Hmin cipaw nynh thua).

²³Jesu tuh mura te apykuhpaw misutui kha a pya hae; thuasalama Jesu nynh neih khyh.

²⁴Tukoute vaelantung kya khiade hae zah a boeining hae kha ccungthydungte ccarou a neeku hae.

²⁵Awkhua suimilan ccangtakua ccyh khe Jesu kha vaelantung kya a khiade hae.

²⁶A seisahnaw hae paw ccawkhia tuh: “Judah hae Siapharan,” cite a zei hae.

²⁷Damiah hae lu ning kha Jesu ryte a ranglang lu kheit, a voilang lu kheit vaelantung kya a khiade bua hae.

²⁸Tuhcite Ccathyaa kya, “Aning tuh misei hae ryte riakheih athua,” a cipaw kha accing.

²⁹Laanpi kya a cceih bungthung hae paw nynh mih lu thuhpah hae zah, “Alei! Beikinn kha roh zah nin thum lungkhu a sakthuipaw nang,

³⁰namaw te namaw kha khumkuh lah vaelantung kyate yn rungtua!” cite a sarya hae.

³¹Tuhawte ranpibawi lepaw hae te kawbya sazae hae nynh mah, “Aning nynh ming hae ze khum hae zah amaw ze khumkuh kho khyh.

³²Kaening nynh kae muih zah kae zyn nawlan, Israel Siapharan, Messiah tuh atu vaelantung kyate yn rungtua sah!” cite sarya hae zah a hoku hae. Jesu ryte vaelantung kya a khiadekheih hae paw nynh mah a saryabua hae.

³³Ninthuccynglyn kyate zete suimilan ccangthum cia ram balyn tuh pong amoh.

³⁴Zete suimilan ccangthum ccyh kyakhe Jesu nynh, “Eloi, Eloi, lama sabakthani?” cite thawte a sia. Asuilan tuh, “Ka Pachia, ka Pachia, pawccemou nae vua?” cipaw nynh thua.

³⁵A pe a thadyn hae paw abang nynh thae hae zah, “Ngaetua oh, aning nynh Elijah nynh a ko,” a ci hae.

³⁶Lukheitpaw nynh ccue zah boeipuepaw kha misutui ariapaw kya dung zah ccungngue dung kya a heede koute nia lan pya zah, “Umtua hin; vaelantung kyate sawbung khylan Elijah yn thua ta, do hin oh sih!” a ci.

³⁷Jesu tuh thawte sia zah a hy athang.

³⁸Beikinn lungkhu a zo hae paw boei tuh alu te alia cia zung ning lang aseiikuh.

³⁹Jesu malang a thadynpaw rhawbawipaw nynh tuhcite Jesu a hy athangpaw kha he a muih tuh, “E paw tuh Pachia Ccapaw ccaccing nynh thua!” a ci.

⁴⁰Asawnaw te a do hae paw nopi hae mah a um hae; tuh-e hae kyatuin Mary Magdalin, adih huapaw James te Joses mih nung Mary te Salomi mah a umbua hae.

⁴¹E hae tuh Galilee ram kya Jesu a um lyaze a zui hae paw te a bawm hae paw nynh thua hae, Jesu ryte Jerusalem lang oun cceihkheih hae paw ccangpaw nopi hae patae mah tuin kya a umbua hae.

⁴²Tuin nin tuh sabbath nin athua maw Paccynku nin athua keiccuze zetesang khe

⁴³Arimathea khuapaw Josef tuh yn thua; aning tuh sawtua lan umpaw kungsi memba lu kheit thua zah Pachia peenaw kha a ngaehoi buapaw nynh thua, Josef nynh rawthungte Pilat kalan tee zah Jesu rhua kha a ngia.

⁴⁴Pilat nynh Jesu a chih vae cipaw a thae tuh, a ngaeangthua zah rhawbawipaw kha ko zah, “Jesu a chinaw saw vae tou?” cite a khia.

⁴⁵Rhawbawipaw bya he a thae te, Pilat nynh Jesu rhua kha Josef a pya.

⁴⁶Josef nynh nebaleihpaw boei rawpaw kha re zah a rhua kha vaelantung kyate sahbung zah nebaleihpaw boei rawpaw khate a lung. Lung a karyn hae paw shaw kyakhe a ccy, athuhfu lang lungphepi kha tounua zah a husung.

⁴⁷Mary Magdalin te Joses a nung Mary nynh a rhua a ccynaw hae kha a muih hae.