Read Zotung Chin MARKA 16 Bible Online

MARKA 16 - Zotung Chin bible

MARKA 16

¹Sabbath nin koute Mary Magdalin, James a nung Mary te Salomi nynh cceih hae zah a rhua thuh lanpaw zimuin kha a re hae.

²Lonaw naw kheit kyaze masaty nin awkhua takaw khuanin a thua khe minmin tuh shawku lang a cceih hae.

³Minmin nynh, “Shaw athuhfu lung pipi kha hum nynh mou oun nuepah cih?” cite a hoku hae.

⁴Minmin nynh he a do hae tuh, myarya lepaw lung pipi phe a nuekuh vae paw kha a muih hae.

⁵Shaw lungkhu lang he a tee hae tuh boei rawpaw zingkuh zah ranglang a haungpaw ccangvaepaw lu kheit kha muih hae zah a siikuh hae.

⁶Aning nynh minmin kha, “Siikuh nan oh, vaelantung kya a khiade hae paw Nazareth paw Jesu kha nanning nynh na ccung oh. Aning tuh phe a thoo vae! Hein kya um vae khyh. A rhua a ccynaw hae hynh dotua oh.

⁷La cceih oh lah a zuitu hae te Peter kha, aning tuh nae malang Galilee lang nynh a ccia; ae hopya oh hawte tuin kya na la muih cih oh, cite la hopah oh,” a cipya hae.

⁸Tukeiccuze minmin tuh shawku kyate pou hae zah thyngkute ngaeangthuate a ccue hae; a ri hae keiccuze hum sanmah hopah khyh hae.

⁹Jesu tuh lonaw kyaze masaty nin awkhua takaw kya a thoothui koute, raerangsaro lu sari a deepyapaw Mary Magdalin kyakhe masaty a langkuh.

¹⁰Mary nynh cceih zah Jesu ryte a umkheih boi hae paw tuh rawkhuite a um lya hae khe a hopya hae.

¹¹Thuasalama minmin nynh Jesu tuh a hiin vae cipaw te Mary nynh a muih cipaw he a thae hae tuh zyn khyh hae.

¹²Tukoute zuitu hae lu ning nynh khua taraw lang a ccia lya hae khe Jesu tuh ccangpaw muinsan lante mih kya a langkuh.

¹³Minmin nynh ki hae zah tuhlaepaw zuitu hae kyakhe tuh-e kong tuh a hopya hae; thuasalama zyn khyh hae.

¹⁴Tukoute zuitu hae lu haw lae kheit nynh looh a ae lya hae khe Jesu tuh mih kya a langkuh, Jesu a thoothui koute amaw a muihtu hae bya kha a zyn khyh hae keiccuze mih zyn leinaw te mih lungkhungnaw elang minmin kha a pe hae.

¹⁵Jesu nynh minmin kha, “Laephi vaw balyn la cceih oh lah raepaw miakaw kyakhe thehoypaw la ho oh.

¹⁶Zyn zah baptisma a inpaw tuh khum athua cih; thuasalama a zyn leipaw tuh byapianaw a ing cih.

¹⁷A zyn hae paw tuh hynh-e muihsahnaw hae hynh pya athua cih hae: ka min te raerangsaro hae kha a dee cih hae; bya thawpaw kha a ho cih hae;

¹⁸Minmin nynh hupaw hae kha a kyng cih hae; a chisah khopaw asy kha a nia hae zemah pawtua-ung lan khyh hae; ngeccih hae tungvaw mih kuih a khang cih hae zah ngeccih hae tuh a dan cih hae,” cite a hopya hae.

¹⁹Tuhcite Bawipaw Jesu nynh minmin kha a hopah kou hae te amaw tuh vaawlang lawthung thua zah Pachia a ranglang khe a haung vae.

²⁰Zuitu hae tuh cceih hae zah khua takyh kya thehoypaw a siakhae hae, Bawipaw nynh minmin ryte ryalah zah, minmin nynh phung a ho hae paw tuh ahme cipaw kha a rae hae paw muihsahnaw liate a langkuh. Amen.