Read Zotung Chin MARKA 2 Bible Online

MARKA 2 - Zotung Chin bible

MARKA 2

¹Nin beihtaraw aro koute Jesu tuh Kapernaum khua lang yn ki zah aning tuh innvaw nynh a um cipaw kha a thae hae.

²Vaekheihmawte ccungccaw patae tuh oun sueluakuh hae, tukeiccuze thuakaw kin cia umnaw um lei lan inn nynh ccawng khyh hae; te Jesu nynh minmin kha phung a hopya hae.

³Ccungccaw lu pali nynh oun puih hae paw a kuihccu chihpaw lu kheit kha Jesu kalan oun cciakhae hae.

⁴Ccungccaw alung keiccuze Jesu kalan naekuh kho khyh hae zah a umnaw luki innccukaly kha a kiabia hae; poh a uasah kou hae te ngeccihpaw kha a inawpaw iphae ryte a sawbung hae.

⁵Jesu nynh mih zynnaw kha he a muih tuh kuihccu chihpaw kha, “Ka ccapaw, na seinaw tuh ngaethya athua vae,” a cipya.

⁶Tuin kya a haung hae paw kawbya sazae hae abang nynh mih lungkaw te,

⁷“E Paw hynh pawccemou tuhte Pachia saryapaw bya a ho? Pachia laelan hummou seinaw a ngaethya kho,” cite a tua hae.

⁸Jesu nynh mih lungkaw te a tua hae paw kha a thinlung te palou nyh zah, “Nae thinlung kya pawccemou tuhte na tua oh?

⁹Kuihccu chihpaw ngeccihpaw kha, ‘Na seinaw tuh ngaethya athua vae,’ cipya tou azoihua, tuhkhyhze ‘Thokuh lah na iphae kha lawkuh lah cceih ccavae,’ cipya tou azoihua?

¹⁰Ccungccaw Ccapaw tuh laephi vawlan seingaethya kaw a hoi cipaw na ny nawlan oh nynh thua,” cite a hopah kou hae te,

¹¹Jesu nynh kuihccu chihpaw kha “Nang kae hopya, thokuh lah na iphae kha lawkuh lah na inn lang cceih ccavae,” a cipya.

¹²Tuh-e paw nynh thokuh zah vaekheihmawte a iphae kha lawkuh zah tuh-e hae balyn malang khe a cceih vae, mih balynte mih ngaeangthua zah, “Hynhcihawpaw hynh kharouh kae muih boi khyh!” ci hae zah Pachia kha a phu-esah hae.

¹³Jesu tuh rili kin lang bua a cceih; ccungccaw zapi balyn tuh a kalan oun thua hae zah minmin kha a ccangpya hae.

¹⁴A ccia lyakhe ngunto khoinaw zung kya a haungpaw Alfeas ccapaw Levi kha muih zah, “Yn zui,” a cipya. Levi nynh thokuh zah a zui.

¹⁵Jesu tuh Levi inn kya zete zerya a mang lyakhe, ngunto khoitu hae te misei hae patae mah Jesu ry, a zuitu hae ryte pynkheihlan a koihbua hae, pawccecize tuin kyakhe amaw a zui hae paw ccungccaw patae a um hae.

¹⁶Kawbya sazae hae te Farasi hae nynh Jesu tuh ngunto khoitu hae te misei hae ryte a aekheih hae paw he a muih hae tuh a zuitu hae kyakhe, “Pawccemou aning nynh ngunto khoitu hae te misei hae ryte a aekheih hae?” cite a khia hae.

¹⁷Tuh-e bya tuh Jesu nynh he a thae tuh minmin kha, “A dan hae paw nynh sibawi peki khyh hae, ngeccih hae rou nynh khaw a peki hae, kae tuh miding hae ko khylan kae thua khyh, misei hae ko khylan nynh kae thua,” a cipya hae.

¹⁸Johan zuitu hae te Farasi hae zuitu hae tuh looh-ae leih a sung hae, te minmin nynh oun cceih hae zah Jesu kha, “Johan zuitu hae te Farasi hae zuitu hae tuh looh-ae kae sung, pawccemou nang na zuitu hae ze looh-ae a sung khyh hae?” a cipya hae.

¹⁹Jesu nynh minmin kha, “Zudy ccangvaepaw tuh zudy poi oun too hae paw kya a umbua lungkhu tuh tuh-e ccungccaw hae tuh looh-ae a sung cih hae zawtou? Zudy ccangvaepaw tuh minmin ryte a um lungkhu balyn tuh looh-ae sung lan khyh hae.

²⁰Thuasalama zudy ccangvaepaw kha minmin kyate lawpya ccyh yn thua cih, tuin ccyh vae tuh looh-ae oun sung vae cih hae.

²¹“Humhung nynh mah arynpaw boeining kha athawpaw boeibia te bia boi khyh, tuhte a bia lanze bianawpaw nynh arynpaw boeining kha po lah zah houh aseiikuh paleih vae.

²²Humhung nynh mah athawpaw misutui kha arynpaw misutui-saphuabawng lungkhu lang ruin boi khyh. A ruin lanze misutui athawpaw nynh misutui-saphuabawng kha phae pawsah zah misutui azu, te misutui-saphuabawng tuh aroh; thuasalama athawpaw misutui tuh athawpaw misutui-saphuabawng kya nynh ruin lan accan,” a cipya hae.

²³Jesu tuh sabbath nin kya loo kyakhe po a cceih; a ccia lya hae khe a zuitu hae nynh looh avui kha a zuku hae.

²⁴Farasi hae nynh Jesu kha, “Dotua, pawccemou sabbath nin kya kawbya nynh a kheepaw kha minmin nynh a cyi hae?” cite a khia hae.

²⁵Jesu nynh, “David nynh amaw te a umkheih hae paw ryte mih vuelaw zah looh a ry lya hae ze, paw nynh a cyi cipaw kha na ria boi khyh oh tou?

²⁶Ranpibawi lupi Abiathar ccyh lyaze aning nynh Pachia inn lungkhu lang tee zah kawbya nynh ranpibawi laelan humhung mah ae lan a ua leipaw Nungpyapaw sanlou kha ae zah amaw ryte umkheih hae paw kha mah a pyabua hae,” cite a khung hae.

²⁷Jesu nynh, “Sabbath tuh ccungccaw hanlan raepaw nynh thua, ccungccaw tuh sabbath hanlan raepaw thua khyh.

²⁸Tukeiccuze Ccungccaw Ccapaw tuh sabbath Bawipaw mah athua,” a cipya hae.