Read Zotung Chin MARKA 3 Bible Online

MARKA 3 - Zotung Chin bible

MARKA 3

¹Jesu tuh sinakok lungkhu lang bua tee zah, tuin kya a kuih voikheit lang achihpaw lu kheit a la um.

²Minmin nynh Jesu kha seibe khylan, sabbath nin kyakhe tuh-e paw tuh yn dansah ta, yn dansah khyh ta cite a dokhaw hae.

³Jesu nynh a kuih achihpaw ccungccapaw kha, “Malang yn cceih,” a cipya.

⁴Tukoute Jesu nynh minmin kha, “Sabbath nin kya ahoypaw cyi lan kawbya nynh a ua tou? Tuhkhyhze ahoy leipaw cyi lan tou a ua? Hiinnaw kha so khum lan a ua tou? Tuhkhyhze chia lan tou a ua?” cite a khia hae. Thuasalama minmin tuh yccae khyh hae.

⁵Thinriate minmin kha po lekuh lan a do hae, mih lungkhungpaw elang a ngaethah zah tuh-e paw tuh, “Na kuih kha dyngtua,” a cipya. A kuih kha dyng zah phe a dan vae.

⁶Te Farasi hae tuh pou hae zah Jesu kha pawtemou chia lan cipaw tuh Herod ccungccaw hae ryte palou khua a khanku hae.

⁷Jesu te a zuitu hae tuh rili kalan cceih hae zah Galilee pee um hae paw ccungccaw patae nynh amaw kha a zui hae;

⁸Judea pee Jerusalem khua, Idumea pee, Jordan vaw khuraw lang, Tair khua te Sidon khua pepan um hae paw ccungccaw zapi tuh Jesu nynh a cyipaw balyn kha thae hae zah amaw kalan oun thua hae.

⁹Ccungccaw zapi nynh amaw kha a eihsei khyh nawlan hae, Jesu nynh a zuitu hae kha amaw elang kohlung ccangkheit nungdaepya lan a hopya hae.

¹⁰Ccungccaw patae a dansah hae keiccuze ccinaw hoipaw ccungccaw miakaw nynh amaw kha hae khylan a kalan a tuh-eihku hae.

¹¹Athyaa leipaw muisaw bahkuh hae paw nynh amaw kha he muih hae tuh a malang bakhung hae zah, “Nang tuh Pachia Ccapaw nynh na thua!” cite a sia hae.

¹²Jesu nynh amaw kong kha na nysah lan khyh oh cite tynkaring lan bya a kin hae.

¹³Jesu tuh mua vawlan kaethung zah a rypaw ccungccaw hae kha ko hae zah minmin tuh amaw kalan a cceih hae.

¹⁴Jesu nynh locceihtu hae cite mah min a phu hae paw lu haw lae ning kha amaw ryte umkheih khylan, phungho lan saw khylan te

¹⁵raerangsaro hae dee khonaw kaw hoi khylan a khang hae.

¹⁶Tuh-e a khang hae paw tuh: Simon (Peter cite min a phupaw);

¹⁷Zebedi ccapaw hae James te a neitaw Johan (minmin kha Boaneke cite min a phu hae, asuilan tuh ‘Ria ccapaw hae’ cipaw nynh thua);

¹⁸Andru, Filip, Bartholomew, Matthai, Thomas, Alfeas ccapaw James, Taddias, Kanaan khuapaw Simon,

¹⁹te Jesu pheetupaw Judas Iskariot nynh thua hae; tukoute Jesu tuh inn lang a cceih.

²⁰Ccungccaw zapi nynh bua oun thua hae keiccuze Jesu te a zuitu hae tuh ae san ae man khyh hae.

²¹Ccungccaw hae nynh, “Jesu tuh a lungkyh vae khyh,” a ci hae paw kha a vaeccaw hae nynh a thae hae keiccuze amaw kha oih lan a cceih hae.

²²Jerusalem kyate oun cceihbung hae paw kawbya sazae hae nynh, “Aning tuh Beelzebul a hoi, raerangsaro hae uktu bawi liate nynh raerangsaro hae kha a dee kho,” a ci hae.

²³Tetuh Jesu nynh minmin kha a kalan ko hae zah tousenaw phungpaw te a hopya hae paw tuh: “Pawtemou Satan nynh Satan tuh a dee kho cih?

²⁴Ram ramkheit nynh amaw te amaw phiakuh zah a rhawku ze, tuh-e ram tuh tyn kho lan khyh.

²⁵Innbyn byn kheit nynh amaw te amaw phiakuh zah a rhawku ze, tuh-e innbyn tuh tyn kho lan khyh.

²⁶Satan nynh amaw te amaw kha rawsekuh zah a phiaku ze tyn kho lan khyh zah phe azo cih.

²⁷A thawsaepaw lu kheit kha a khiide ty khyh ze, pawcihtemou tuh-e paw inn lungkhu lang a tee kho cih zah a uccaw hae kha a lua kho cih? A khiide ty ze nynh a inn kha a lua kho cih.

²⁸“Byaccaccing kae hopya oh, ccungccaw hae hynh mih seinaw te saryapaw bya a ho hae paw miakaw kha ngaethya athua cih.

²⁹Thuasalama Thyaa Muisaw kha saryanaw bya a hopaw miakaw tuh seingaethyanaw papin mue lan khyh, pawccecize zungzae tynpaw seinaw a raepaw nynh thua,” a ci.

³⁰Pawccemou hynhte a ho ci ze minmin nynh, “Aning tuh athyaa leipaw muisaw nynh a hoi,” a ci hae keiccu nynh thua.

³¹Jesu a nung te a neitawpaw hae tuh oun thua hae zah atolang khe a thadyn hae, te ccungccaw saw hae zah amaw kha a kosah hae.

³²Jesu pepan a haung hae paw ccungccaw zapi nynh amaw kha, “Dotua, na nung te na neitaw hae te na ccianung hae nynh tungku ae ry hae zah atolang nynh a um hae,” a cipya hae.

³³Jesu nynh, “Hum hae mou ka nung te ka neitaw hae tuh?” cite a khung hae.

³⁴Te a pepan a haung hae paw kha po do hae zah, “Dotua oh, e hae hynh ka nung te ka neitaw hae!

³⁵Humhung zemah Pachia rynaw a raepaw tuh ka neitaw, ka ccianung te ka nung nynh thua,” a ci.