Read Zotung Chin MARKA 4 Bible Online

MARKA 4 - Zotung Chin bible

MARKA 4

¹Jesu nynh rili pe khe bua a ccangpya hae. A pe kya a pumkuh hae paw ccungccaw hae tuh eih a lung hae keiccuze kohlung lungkhu lang tee zah a haung. Kohlung tuh tui lungkhu um zah ccungccaw hae tuh varang lang a thadyn hae.

²Jesu nynh tousenaw phungpaw hae khate patae a ccangpya hae; a ccangpyanaw kyaze minmin kha:

³“Ngaetua oh! Ccacii vuatu lu kheit nynh ccacii vua lan a cceih.

⁴Ccacii kha vua zah abang tuh laanpi pe accah, vaawlang e pavaw hae nynh oun thuanua hae zah phe a tuh hae.

⁵Abang tuh laephi zya zah lungpyng alungnaw kya accah; laephi thaawkalae lan a um khyh keiccuze taloi a po hae.

⁶Khuanin he yn thua tuh, tharui a saw khyh keiccuze karae arou hae.

⁷Abang ccacii tuh hinpaw laku ccah zah hinpaw nynh lethin zah phang a lungde keiccuze athae thae kho khyh.

⁸Te abang tuh lae hoy kya ccah zah a po, a pungthung, te athae thae zah leit sung thum, leit sung taruh, leit za kheit avoi.

⁹Thae nawlan nakaring a hoipaw ccungccaw tuh thae sah!” cite a hopya hae.

¹⁰Jesu tuh a makhaete a um lyakhe, zuitu lu haw lae ning te amaw pe a um hae paw nynh tousenaw phungpaw kong kha a khia hae.

¹¹Jesu nynh, “Pachia peenaw kya-e byakhupaw kha nanning tuh nysah na thua oh, thuasalama atolang um hae paw tuh pawpaw balyn kha tousenaw phungpaw te nynh hopya athua;

¹²tukeiccuze, ‘Minmin nynh muihpaw tuh mang a muih hae zemah nyhthya khyh hae; thaepaw tuh mang a thae hae zemah thaethya khyh hae, tuhkhyhze tuh minmin tuh mih lung a paleihkuh cih zah mih seinaw kha ngaethya athua cih hae paw,’ a ci,” cite a hopya hae.

¹³Jesu nynh minmin kha, “E tousenaw phungpaw hynh na thaethya khyh oh tou? Tuhteze ccangpaw tousenaw phungpaw hae balyn kha pawtemou na thaethya vae cih oh?

¹⁴Ccacii vuatu nynh Pachia bya kha a vua.

¹⁵Laanpi pe kya vuapaw bya tuh hynh-e hae hynh nynh thua: Minmin nynh Pachia bya kha he a thae hae tuh Satan nynh vaekheihmawte yn cceih zah mih thinlung kya a vua hae paw bya kha phe a lawpya hae.

¹⁶Tuhawte lung alungnaw kya vuapaw bya tuh hynh-e hae hynh nynh thua: Pachia bya kha he a thae hae tuh vaekheihmawte lungtuate a lawku hae;

¹⁷minmin nynh tharui a hoi khyh hae keiccuze sosoh rou nynh atyn. Tukoute Pachia bya keiccuze vawsawnaw te tuaasahnaw he yn thua tuh palou a maeleihkuh hae.

¹⁸Hinpaw hae laku vuapaw bya tuh hynh-e hae hynh nynh thua: Pachia bya kha a thae hae,

¹⁹thuasalama hynh-e laephi vaw e lungriathaenaw, hoirum rynaw, te ccangpaw uccaw hae duaanaw yn tee zah bya kha phang a lungde keiccuze athae thae kho vae khyh.

²⁰Lae hoy kya vuapaw bya tuh hynh-e hae nynh thua: Pachia bya kha thae hae zah a lawku hae, te leit sung thum, leit sung taruh, leit za kheit athae avoi,” a cipya hae.

²¹Jesu nynh, “Maeekhua tuh kee lungkhu thuasah, ikhung kaw thuasah a nung boi hae zawtou? Maee awnawpaw vawlan khang khyh hae tou?

²²Alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.

²³Thae nawlan nakaring a hoipaw ccungccaw tuh thae sah!” cite a hopya hae.

²⁴Jesu nynh, “Na thae oh paw kha raeringkuh oh, na tounaw oh paw tounawpaw te naemaw kha toupya ru na thua cih oh zah, houh lung lan heize pyachih na thua cih oh.

²⁵Pawccecize a hoipaw ccungccaw tuh pyachih athua cih; thuasalama a hoi leipaw ccungccaw tuh a hoi thypaw kha heize lawpya athua cih,” a cipya hae.

²⁶Jesu nynh, “Ccungccapaw lu kheit nynh loo kya ccacii a vua,

²⁷khuazi khe ih zah khua yn dae te a tho, te ccacii tuh po zah a lethung, pawtemou a lethung cipaw kha aning nynh nyh khyh.

²⁸Pawccecize laephi nynh lethungsah zah thae a thaesah; masaty adung atoih, te avui, tukoute avui kya ccathae yn um.

²⁹Thuasalama ccathae he yn voi tuh aning nynh rungkou te taloi a aw vae, pawccecize loohrue ccyh azaw vae,” a ci.

³⁰Te Jesu nynh, “Pachia peenaw hynh pawtemou ah khinkhia cih oh? Tuhkhyhze pawcihawpaw tousenaw phungpaw mou mang lan?

³¹Mungngia cii te nynh aloku, tuh-e tuh laephi kya a vua lya tuh laephi kya vuapaw ccacii balyn laeze adihhua.

³²Thuasalama yn po zah he yn le tuh enaw-eho hae balyn laeze alehua, te aran tuh yn le zah vaawlang e pavaw hae nynh a mynlyh kaw khe bu a luaku hae,” a ci.

³³Ccungccaw hae nynh a thaethya hae thyhte tuhcihawpaw tousenaw phungpaw patae kha mangte bya a hopya hae.

³⁴Tousenaw phungpaw mang leite bya hopah khyh hae, a zuitu hae ryte mih makhaete a um lya hae khe pawpaw balyn kha a ccaesahpya hae.

³⁵Tuin nin zete khe Jesu nynh a zuitu hae kha, “Khuraw lang khuin zua oh sih,” a cipya hae.

³⁶Zuitu hae nynh ccungccaw zapi kha cciataw hae zah kohlung kya a umty vae paw Jesu kha a cciakhae hae. Ccangpaw kohlung taraw hae mah amaw ryte a cceihbua hae.

³⁷Myarya arupaw khise yn tho zah tuileih nynh kohlung kha yn thenuakuh zah kohlung kya tui vyavya abeih.

³⁸Jesu tuh kohlung nulang sang khe lungngya ngya zah marya a ih; zuitu hae nynh tho hae zah, “Sazae, aening ah chih vae cih oh, na thawsia khyh tou?” a cipya hae.

³⁹Jesu nynh thokuh zah khise kha, “Zaw nan vae,” cite kawpya zah, rili kha, “Dae, zya dae ccavae!” a cipya. Khise tuh dae zah rili mah daebabi lan a um vae.

⁴⁰Te Jesu nynh minmin kha, “Pawccemou hynhcih baban na ri oh? Zynnaw na hoi loh khyh oh ii?” a cipya hae.

⁴¹Minmin tuh myaryamaw rih hae zah, “E paw hynh paw ccungccaw mou? Khise te rili nynh heize a kaw a ngae hae!” cite lu kheit te lu kheit a hoku hae.