Read Zotung Chin MARKA 7 Bible Online

MARKA 7 - Zotung Chin bible

MARKA 7

¹Farasi hae te Jerusalem kyate oun thua hae paw kawbya sazae hae abang tuh Jesu kalan oun sueluakuh hae zah,

²a zuitu hae abang nynh kuih singku leite athupaw mih kuih te sanlou a ae hae paw kha a muih hae.

³Pawccecize Farasi hae te Judah hae balyn tuh langmawlya e piccan hae phung kha zui hae zah mih kuih singku leite ae khyh hae.

⁴Kungkunaw hmin kyate a ki hae te, a re hae paw kha a sing khyh hae ze ae khyh hae; te banang hae singpaw, ang hae singpaw, sohin angphe hae singpaw, te haungnawpaw singpaw tahawpaw a zui hae paw ccangpaw patae a um ung.

⁵Farasi hae te kawbya sazae hae nynh, “Pawccemou na zuitu hae nynh langmawlya e piccan hae phung thyhte zui leite kuih singku leite sanlou a ae hae?” cite Jesu kha a khia hae.

⁶Jesu nynh khung hae zah, “Thyaruh hae, nanning konglang hynh Isaiah nynh hmerarih lan a la hoty vae; ‘E ccungccaw hae nynh mih munglae te saw oun tua hae; thuasalama mih thinlung tuh ka kyate asawkuh.

⁷Ccungccaw phung kha Pachia phung lang a ccangpya hae keiccuze kae yn beik hae paw tuh accakaepaw nynh thua,’ cite azeikuh.

⁸Nanning nynh Pachia kawbya kha na vua oh zah ccungccaw hae phung kha na zui oh,” a cipya hae.

⁹Jesu nynh minmin kha, “Naemaw phung zuithya nawlan, Pachia kawbya vuanaw zia kha myarya na thya oh.

¹⁰Pawccecize Moses nynh, ‘Na nung te na paaw kha sawtua hae,’ te ‘Humhung zemah a nung thuasah, a paaw thuasah thya a lahpaw tuh chia thua sah,’ a ci.

¹¹Thuasalama nanning nynh, ccungccaw lu kheit nynh a paaw te a nung kha, ‘Kamaw liate na mue lan oh paw bawmnaw tuh Korban nynh thua,’ a cipya hae ze, (tuh-e tuh Pachia pya lanpaw uccaw cipaw nynh thua),

¹²tuh-e paw tuh a nung te a paaw kha bawm ho vae khyh, na ci oh.

¹³Tuhcite nae minpaaw hae kyate na mue oh paw nae phung liate Pachia bya kha na vua vae oh; nanning nynh tuhcihawpaw patae kha na cyi oh,” a cipya hae.

¹⁴Jesu nynh ccungccaw hae balyn kha a kalan bua ko hae zah minmin kyakhe, “Nae balynte ka bya hynh ngae oh lah thaethya oh:

¹⁵Ccungccaw hynh atolang te alungkhu lang yn teepaw nynh thusah khyh; ccungccaw lungkhu langte yn poupaw uccaw nynh ccungccaw kha a thusah.

¹⁶Thae nawlan nakaring a hoipaw ccungccaw tuh thae sah,” a cipya hae.

¹⁷Ccungccaw zapi kyate inn lungkhu lang he a tee tuh, a zuitu hae nynh tousenaw phungpaw kong kha a khia hae.

¹⁸Jesu nynh, “Nanning so na thaethya khyh oh tou? Atolang te ccungccaw lungkhu lang a teepaw pawpaw uccaw nynh mah ccungccaw tuh thusah kho khyh cipaw na thaethya khyh oh tou?

¹⁹Pawccecize atolang te yn teepaw tuh bung lungkhu lang tee khyh, vue lungkhu lang nynh a tee; aepaw balyn kha thyaasah zah atolang po toikuh khyh tou?” cite a hopya hae. (E bya liate aepaw looh miakaw tuh athyaa cite a ho rypaw nynh thua).

²⁰Te Jesu nynh, “Ccungccaw lungkhu kyate a poupaw nynh ccungccaw kha a thusah.

²¹Pawccecize ahoy leipaw tuanaw tuh ccungccaw lungkhu e thinlung kyate oun poupaw nynh thua: ohhuakunaw, runaw, ccungccaw chianaw,

²²milae zu milae vawpaw kya seinaw, karankunaw, thyaruhnaw, lingnaw, ohhuaku rynaw, eiungnaw, milae thethya honaw, lysakunaw te ngaeenaw tuh oun pou hae.

²³E ahoy leipaw uccaw hae balyn tuh lungkhu langte oun pou zah ccungccaw kha a thusah,” a ci.

²⁴Jesu tuh tuin kyate thokuh zah Tair te Sidon ram lang a cceih. Inn innkheit lungkhu lang a teepaw kha humhung sanmah nysah ry khyh; thuasalama rekuh khualae khyh.

²⁵Pawccecize athyaa leipaw muisaw a hoipaw imuanung a nung nynh Jesu kong a thae pawte a kalan yn cceih zah a cculeihpaw khe a bakhung.

²⁶Nopinung tuh Siria ram Foenisia pee kya a puinung Zentanung nynh thua; a ccanung kyate raerangsaro kha a deepya ccaw cite Jesu kha a ngia.

²⁷Thuasalama Jesu nynh, “Ccaaw hae tuh masaty byn hin hae sah; pawccecize ccaaw hae looh kha law lan zah ui hae kha vuapya lan ccan khyh,” a cipya.

²⁸Te nopinung nynh, “Athua, Bawipaw; tuhzemah ccaaw hae nynh a hei hae paw loohmoi kha ui hae nynh ccaboi kaw te leih a ae hae,” cite a ci.

²⁹Te Jesu nynh, “E na hopaw na bya keiccu la cceih ccavae, na ccanung kyate raerangsaro phe a pou vae,” a cipya.

³⁰Tuh-e nung nynh a inn lang he a thua tuh, raerangsaro nynh a poutawpaw, ikhung vawlan a ihpaw a ccanung kha a muih.

³¹Jesu tuh Tair pee kyate ki zah Sidon pee kya po cceih zah Dekapolis pee lungkhu te Galilee rili lang po a cceih.

³²Ccungccaw hae nynh a nawpan zah bya a ho kho leipaw ccungccapaw kha a kalan oun cciakhae hae zah a tungvaw kya a kuih khang lan a ngia hae.

³³Jesu nynh tuh-e paw tuh ccungccaw zapi kyate toikhaekuh zah a kuihdung kha a nakaring lungkhu lang a pu, te a tuing te thoi zah a lae kha a haepya.

³⁴Te vaawlang dothung zah a hy puin a saw; te tuh-e paw tuh, “Effatha,” a cipya. Asuilan tuh, “Ua ccavae sah,” cipaw nynh thua.

³⁵Vaekheihmawte a naw yn ua zah a laezan ne zah ccaepapeih lan bya a ho vae.

³⁶Jesu nynh tuh-e kong tuh humhung kya mah a ho khyh nawlan hae kaw a pya hae; thuasalama houh khee hae zah houh a ho hae.

³⁷Ho kho um lei lan mih ngaeangthua zah, “Aning nynh pawpaw balyn kha kou hoy lan a rae; a nawpanpaw naw phe thaesah zah bya a ho kho leipaw kha bya phe a hosah,” a ci hae.